8. නාගසමාලවග්ගො

1. නාගසමාලත්ථෙරඅපදානං

1. ‘‘අපාටලිං අහං පුප්ඵං, උජ්ඣිතං සුමහාපථෙ;

ථූපම්හි අභිරොපෙසිං, සිඛිනො ලොකබන්ධුනො.

2. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, ථූපපූජායිදං ඵලං.

3. ‘‘ඉතො පන්නරසෙ කප්පෙ, භූමියො [පුප්ඵියො (ස්‍යා.)] නාම ඛත්තියො;

සත්තරතනසම්පන්නො, චක්කවත්තී මහබ්බලො.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා නාගසමාලො ථෙරො ඉමා ගාථායො අභාසිත්ථාති.

නාගසමාලත්ථෙරස්සාපදානං පඨමං.

2. පදසඤ්ඤකත්ථෙරඅපදානං

5. ‘‘අක්කන්තඤ්ච පදං දිස්වා, තිස්සස්සාදිච්චබන්ධුනො;

හට්ඨො හට්ඨෙන චිත්තෙන, පදෙ චිත්තං පසාදයිං.

6. ‘‘ද්වෙනවුතෙ ඉතො කප්පෙ, යං සඤ්ඤමලභිං තදා;

දුග්ගතිං නාභිජානාමි, පදසඤ්ඤායිදං ඵලං.

7. ‘‘ඉතො සත්තමකෙ කප්පෙ, සුමෙධො නාම ඛත්තියො;

සත්තරතනසම්පන්නො, චක්කවතී මහබ්බලො.

8. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පදසඤ්ඤකො ථෙරො ඉමා ගාථායො අභාසිත්ථාති.

පදසඤ්ඤකත්ථෙරස්සාපදානං දුතියං.

3. බුද්ධසඤ්ඤකත්ථෙරඅපදානං

9. ‘‘දුමග්ගෙ පංසුකූලිකං, ලග්ගං දිස්වාන සත්ථුනො;

තතො තමඤ්ජලිං කත්වා, පංසුකූලං අවන්දහං.

10. ‘‘ද්වෙනවුතෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධසඤ්ඤායිදං ඵලං.

11. ‘‘ඉතො චතුත්ථකෙ කප්පෙ, දුමසාරොසි ඛත්තියො;

චාතුරන්තො විජිතාවී, චක්කවත්තී මහබ්බලො.

12. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා බුද්ධසඤ්ඤකො ථෙරො ඉමා ගාථායො අභාසිත්ථාති.

බුද්ධසඤ්ඤකත්ථෙරස්සාපදානං තතියං.

4. භිසාලුවදායකත්ථෙරඅපදානං

13. ‘‘කානනං වනමොගය්හ, වසාමි විපිනෙ අහං;

විපස්සිං අද්දසං බුද්ධං, ආහුතීනං පටිග්ගහං.

14. ‘‘භිසාලුවඤ්ච පාදාසිං, උදකං හත්ථධොවනං;

වන්දිත්වා සිරසා පාදෙ, පක්කාමි උත්තරාමුඛො.

15. ‘‘එකනවුතිතො කප්පෙ, භිසාලුවමදං තදා;

දුග්ගතිං නාභිජානාමි, පුඤ්ඤකම්මස්සිදං ඵලං.

16. ‘‘ඉතො තතියකෙ කප්පෙ, භිසසම්මතඛත්තියො;

සත්තරතනසම්පන්නො, චක්කවත්තී මහබ්බලො.

17. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා භිසාලුවදායකො ථෙරො ඉමා ගාථායො අභාසිත්ථාති.

භිසාලුවදායකත්ථෙරස්සාපදානං චතුත්ථං.

ඡට්ඨභාණවාරං.

5. එකසඤ්ඤකත්ථෙරඅපදානං

18. ‘‘ඛණ්ඩො නාමාසි නාමෙන, විපස්සිස්සග්ගසාවකො;

එකා භික්ඛා මයා දින්නා, ලොකාහුතිපටිග්ගහෙ.

19. ‘‘තෙන චිත්තප්පසාදෙන, ද්විපදින්ද නරාසභ;

දුග්ගතිං නාභිජානාමි, එකභික්ඛායිදං ඵලං.

20. ‘‘චත්තාලීසම්හිතො කප්පෙ, වරුණො නාම ඛත්තියො;

සත්තරතනසම්පන්නො, චක්කවත්තී මහබ්බලො.

21. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකසඤ්ඤකො ථෙරො ඉමා ගාථායො අභාසිත්ථාති.

එකසඤ්ඤකත්ථෙරස්සාපදානං පඤ්චමං.

6. තිණසන්ථරදායකත්ථෙරඅපදානං

22. ‘‘හිමවන්තස්සාවිදූරෙ, මහාජාතස්සරො අහු;

සතපත්තෙහි සඤ්ඡන්නො, නානාසකුණමාලයො.

23. ‘‘තම්හි න්හත්වා ච පිත්වා [පීත්වා (සී. ස්‍යා.)] ච, අවිදූරෙ වසාමහං;

අද්දසං සමණානග්ගං, ගච්ඡන්තං අනිලඤ්ජසෙ.

24. ‘‘මම සඞ්කප්පමඤ්ඤාය, සත්ථා ලොකෙ අනුත්තරො;

අබ්භතො ඔරුහිත්වාන, භූමියංඨාසි තාවදෙ.

25. ‘‘විසාණෙන [ලායනෙන (ස්‍යා.)] තිණං ගය්හ, නිසීදනමදාසහං;

නිසීදි භගවා තත්ථ, තිස්සො ලොකග්ගනායකො.

26. ‘‘සකං චිත්තං පසාදෙත්වා, අවන්දි ලොකනායකං;

පටිකුටිකො [උක්කුටිකො (ස්‍යා. ක.)] අපසක්කිං, නිජ්ඣායන්තො මහාමුනිං.

27. ‘‘තෙන චිත්තප්පසාදෙන, නිම්මානං උපපජ්ජහං;

දුග්ගතිං නාභිජානාමි, සන්ථරස්ස ඉදං ඵලං.

28. ‘‘ඉතො දුතියකෙ කප්පෙ, මිග [මිත්ත (ස්‍යා.)] සම්මතඛත්තියො;

සත්තරතනසම්පන්නො, චක්කවත්තී මහබ්බලො.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිණසන්ථරදායකො ථෙරො ඉමා ගාථායො අභාසිත්ථාති.

තිණසන්ථරදායකත්ථෙරස්සාපදානං ඡට්ඨං.

7. සූචිදායකත්ථෙරඅපදානං

30. ‘‘තිංසකප්පසහස්සම්හි, සම්බුද්ධො ලොකනායකො;

සුමෙධො නාම නාමෙන, බාත්තිංසවරලක්ඛණො.

31. ‘‘තස්ස කඤ්චනවණ්ණස්ස, ද්විපදින්දස්ස තාදිනො;

පඤ්ච සූචී මයා දින්නා, සිබ්බනත්ථාය චීවරං.

32. ‘‘තෙනෙව සූචිදානෙන, නිපුණත්ථවිපස්සකං;

තික්ඛං ලහුඤ්ච ඵාසුඤ්ච, ඤාණං මෙ උදපජ්ජථ.

33. ‘‘කිලෙසා ඣාපිතා මය්හං, භවා සබ්බෙ සමූහතා;

ධාරෙමි අන්තිමං දෙහං, සම්මාසම්බුද්ධසාසනෙ.

34. ‘‘ද්විපදාධිපතී නාම, රාජානො චතුරො අහුං;

සත්තරතනසම්පන්නා, චක්කවත්තී මහබ්බලා.

35. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සූචිදායකො ථෙරො ඉමා ගාථායො අභාසිත්ථාති.

සූචිදායකත්ථෙරස්සාපදානං සත්තමං.

8. පාටලිපුප්ඵියත්ථෙරඅපදානං

36. ‘‘සුවණ්ණවණ්ණං සම්බුද්ධං, ගච්ඡන්තං අන්තරාපණෙ;

කඤ්චනග්ඝියසඞ්කාසං, බාත්තිංසවරලක්ඛණං.

37. ‘‘සෙට්ඨිපුත්තො තදා ආසිං, සුඛුමාලො සුඛෙධිතො;

උච්ඡඞ්ගෙ පාටලිපුප්ඵං, කත්වාන [කත්වා තං (සී. ස්‍යා.)] අභිසංහරිං.

38. ‘‘හට්ඨො හට්ඨෙන චිත්තෙන, පුප්ඵෙහි අභිපූජයිං;

තිස්සං ලොකවිදුං නාථං, නරදෙවං නමස්සහං.

39. ‘‘ද්වෙනවුතෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, පුප්ඵපූජායිදං ඵලං.

40. ‘‘ඉතො තෙසට්ඨිකප්පම්හි, අභිසම්මතනාමකො;

සත්තරතනසම්පන්නො, චක්කවත්තී මහබ්බලො.

41. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාටලිපුප්ඵියො ථෙරො ඉමා ගාථායො අභාසිත්ථාති.

පාටලිපුප්ඵියත්ථෙරස්සාපදානං අට්ඨමං.

9. ඨිතඤ්ජලියත්ථෙරඅපදානං

42. ‘‘මිගලුද්දො පුරෙ ආසිං, අරඤ්ඤෙ කානනෙ අහං;

තත්ථ අද්දසං [තත්ථද්දසාසිං (සී. ස්‍යා.)] සම්බුද්ධං, බාත්තිංසවරලක්ඛණං.

43. ‘‘තත්ථාහං අඤ්ජලිං කත්වා, පක්කාමිං පාචිනාමුඛො;

අවිදූරෙ නිසින්නස්ස, නියකෙ පණ්ණසන්ථරෙ.

44. ‘‘තතො මෙ අසනීපාතො, මත්ථකෙ නිපතී තදා;

සොහං මරණකාලම්හි, අකාසිං පුනරඤ්ජලිං.

45. ‘‘ද්වෙනවුතෙ ඉතො කප්පෙ, අඤ්ජලිං අකරිං තදා;

දුග්ගතිං නාභිජානාමි, අඤ්ජලිස්ස ඉදං ඵලං.

46. ‘‘චතුපණ්ණාසකප්පම්හි, මිගකෙතුසනාමකො;

සත්තරතනසම්පන්නො, චක්කවත්තී මහබ්බලො.

47. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඨිතඤ්ජලියො ථෙරො ඉමා ගාථායො අභාසිත්ථාති.

ඨිතඤ්ජලියත්ථෙරස්සාපදානං නවමං.

10. තිපදුමියත්ථෙරඅපදානං

48. ‘‘පදුමුත්තරො නාම ජිනො, සබ්බධම්මාන පාරගූ;

දන්තො දන්තපරිවුතො, නගරා නික්ඛමී තදා.

49. ‘‘නගරෙ හංසවතියං, අහොසිං මාලිකො තදා;

යං තත්ථ උත්තමං තොණි, පද්මපුප්ඵානි [උත්තමං පුප්ඵං, තීණි පුප්ඵානි (සී.)] අග්ගහිං.

50. ‘‘අද්දසං විරජං බුද්ධං, පටිමග්ගන්තරාපණෙ;

සහ [සොහං (සී.)] දිස්වාන සම්බුද්ධං, එවං චින්තෙසහං තදා.

51. ‘‘කිං මෙ ඉමෙහි පුප්ඵෙහි, රඤ්ඤො උපනිතෙහි මෙ;

ගාමං වා ගාමඛෙත්තං වා, සහස්සං වා ලභෙය්‍යහං.

52. ‘‘අදන්තදමනං වීරං, සබ්බසත්තසුඛාවහං;

ලොකනාථං පූජයිත්වා, ලච්ඡාමි අමතං ධනං.

53. ‘‘එවාහං චින්තයිත්වාන, සකං චිත්තං පසාදයිං;

තීණි ලොහිතකෙ ගය්හ, ආකාසෙ උක්ඛිපිං තදා.

54. ‘‘මයා උක්ඛිත්තමත්තම්හි, ආකාසෙ පත්ථරිංසු තෙ;

ධාරිංසු මත්ථකෙ තත්ථ, උද්ධංවණ්ටා අධොමුඛා.

55. ‘‘යෙ කෙචි මනුජා දිස්වා, උක්කුට්ඨිං සම්පවත්තයුං;

දෙවතා අන්තලික්ඛම්හි, සාධුකාරං පවත්තයුං.

56. ‘‘අච්ඡෙරං ලොකෙ උප්පන්නං, බුද්ධසෙට්ඨස්ස වාහසා;

සබ්බෙ ධම්මං සුණිස්සාම, පුප්ඵානං වාහසා මයං.

57. ‘‘පදුමුත්තරො ලොකවිදූ, ආහුතීනං පටිග්ගහො;

වීථියඤ්හි ඨිතො සන්තො, ඉමා ගාථා අභාසථ.

58. ‘‘‘යො සො බුද්ධං අපූජෙසි, රත්තපද්මෙහි [රත්තපදුමෙහි (සී. ස්‍යා.)] මාණවො;

තමහං කිත්තයිස්සාමි, සුණාථ මම භාසතො.

59. ‘‘‘තිංසකප්පසහස්සානි, දෙවලොකෙ රමිස්සති;

තිංසකප්පානි [තිංසක්ඛත්තුඤ්ච (ස්‍යා.)] දෙවින්දො, දෙවරජ්ජං කරිස්සති.

60. ‘‘‘මහාවිත්ථාරිකං නාම, බ්‍යම්හං හෙස්සති තාවදෙ;

තියොජනසතුබ්බිද්ධං, දියඩ්ඪසතවිත්ථතං.

61. ‘‘‘චත්තාරිසතසහස්සානි, නිය්‍යූහා ච සුමාපිතා;

කූටාගාරවරූපෙතා, මහාසයනමණ්ඩිතා.

62. ‘‘‘කොටිසතසහස්සියො, පරිවාරෙස්සන්ති අච්ඡරා;

කුසලා නච්චගීතස්ස, වාදිතෙපි පදක්ඛිණා.

63. ‘‘‘එතාදිසෙ බ්‍යම්හවරෙ, නාරීගණසමාකුලෙ;

වස්සිස්සති පුප්ඵවස්සො, දිබ්බො [පද (ක.)] ලොහිතකො සදා.

64. ‘‘‘භිත්තිඛීලෙ නාගදන්තෙ, ද්වාරබාහාය තොරණෙ;

චක්කමත්තා ලොහිතකා, ඔලම්බිස්සන්ති තාවදෙ.