4. භිසාලුවදායකත්ථෙරඅපදානං

13. ‘‘කානනං වනමොගය්හ, වසාමි විපිනෙ අහං;

විපස්සිං අද්දසං බුද්ධං, ආහුතීනං පටිග්ගහං.

14. ‘‘භිසාලුවඤ්ච පාදාසිං, උදකං හත්ථධොවනං;

වන්දිත්වා සිරසා පාදෙ, පක්කාමි උත්තරාමුඛො.

15. ‘‘එකනවුතිතො කප්පෙ, භිසාලුවමදං තදා;

දුග්ගතිං නාභිජානාමි, පුඤ්ඤකම්මස්සිදං ඵලං.

16. ‘‘ඉතො තතියකෙ කප්පෙ, භිසසම්මතඛත්තියො;

සත්තරතනසම්පන්නො, චක්කවත්තී මහබ්බලො.

17. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා භිසාලුවදායකො ථෙරො ඉමා ගාථායො අභාසිත්ථාති.

භිසාලුවදායකත්ථෙරස්සාපදානං චතුත්ථං.

ඡට්ඨභාණවාරං.