8. ලොමසකඞ්ගියත්ථෙරඅපදානං

225. ‘‘ඉමම්හි භද්දකෙ කප්පෙ, බ්‍රහ්මබන්ධු මහායසො;

කස්සපො නාම ගොත්තෙන, උප්පජ්ජි වදතං වරො.

226. ‘‘තදාහං චන්දනො චෙව, පබ්බජිත්වාන සාසනෙ;

ආපාණකොටිකං ධම්මං, පූරයිත්වාන සාසනෙ.

227. ‘‘තතො චුතා සන්තුසිතං, උපපන්නා උභො මයං;

තත්ථ දිබ්බෙහි නච්චෙහි, ගීතෙහි වාදිතෙහි ච.

228. ‘‘රූපාදිදසහඞ්ගෙහි, අභිභොත්වාන සෙසකෙ;

යාවතායුං වසිත්වාන, අනුභොත්වා මහාසුඛං.

229. ‘‘තතො චවිත්වා තිදසං, චන්දනො උපපජ්ජථ;

අහං කපිලවත්ථුස්මිං, අජායිං සාකියත්‍රජො.

230. ‘‘යදා උදායිත්ථෙරෙන, අජ්ඣිට්ඨො ලොකනායකො;

අනුකම්පිය සක්‍යානං, උපෙසි කපිලව්හයං.

231. ‘‘තදාතිමානිනො සක්‍යා, න බුද්ධස්ස ගුණඤ්ඤුනො;

පණමන්ති න සම්බුද්ධං, ජාතිථද්ධා අනාදරා.

232. ‘‘තෙසං සඞ්කප්පමඤ්ඤාය, ආකාසෙ චඞ්කමී ජිනො;

පජ්ජුන්නො විය වස්සිත්ථ, පජ්ජලිත්ථ යථා සිඛී.

233. ‘‘දස්සෙත්වා රූපමතුලං, පුන අන්තරධායථ;

එකොපි හුත්වා බහුධා, අහොසි පුනරෙකකො.

234. ‘‘අන්ධකාරං පකාසඤ්ච, දස්සයිත්වා අනෙකධා;

පාටිහෙරං කරිත්වාන, විනයී ඤාතකෙ මුනි.

235. ‘‘චාතුද්දීපො මහාමෙඝො, තාවදෙව පවස්සථ;

තදා හි ජාතකං බුද්ධො, වෙස්සන්තරමදෙසයි.

236. ‘‘තදා තෙ ඛත්තියා සබ්බෙ, නිහන්ත්වා ජාතිජං මදං;

උපෙසුං සරණං බුද්ධං, ආහ සුද්ධොදනො තදා.

237. ‘‘‘ඉදං තතියං තව භූරිපඤ්ඤ, පාදානි වන්දාමි සමන්තචක්ඛු;

යදාභිජාතො පථවී පකම්පයී, යදා ච තං නජ්ජහි ජම්බුඡායා’.

238. ‘‘තදා බුද්ධානුභාවං තං, දිස්වා විම්හිතමානසො;

පබ්බජිත්වාන තත්ථෙව, නිවසිං මාතුපූජකො.

239. ‘‘චන්දනො දෙවපුත්තො මං, උපගන්ත්වානුපුච්ඡථ;

භද්දෙකරත්තස්ස තදා, සඞ්ඛෙපවිත්ථාරං නයං.

240. ‘‘චොදිතොහං තදා තෙන, උපෙච්ච නරනායකං;

භද්දෙකරත්තං සුත්වාන, සංවිග්ගො වනමාමකො.

241. ‘‘තදා මාතරමපුච්ඡිං, වනෙ වච්ඡාමි එකකො;

සුඛුමාලොති මෙ මාතා, වාරයී තං [තෙ (ස්‍යා. පී. ක.)] තදා වචං.

242. ‘‘කාසං [දබ්බං (සී. ස්‍යා. පී.)] කුසං පොටකිලං, උසීරං මුඤ්ජපබ්බජං [මුඤ්ජබබ්බජං (සී. පී.)];

උරසා පනුදිස්සාමි, විවෙකමනුබ්‍රූහයං.

243. ‘‘තදා වනං පවිට්ඨොහං, සරිත්වා ජිනසාසනං;

භද්දෙකරත්තඔවාදං, අරහත්තමපාපුණිං.

244. ‘‘‘අතීතං නාන්වාගමෙය්‍ය, නප්පටිකඞ්ඛෙ අනාගතං;

යදතීතං පහීනං තං, අප්පත්තඤ්ච අනාගතං.

245. ‘‘‘පච්චුප්පන්නඤ්ච යො ධම්මං, තත්ථ තත්ථ විපස්සති;

අසංහීරං අසංකුප්පං, තං විද්වා මනුබ්‍රූහයෙ.

246. ‘‘‘අජ්ජෙව කිච්චමාතප්පං, කො ජඤ්ඤා මරණං සුවෙ;

න හි නො සඞ්ගරං [සඞ්කරං (ක.)] තෙන, මහාසෙනෙන මච්චුනා.

247. ‘‘‘එවංවිහාරිං ආතාපිං, අහොරත්තමතන්දිතං;

තං වෙ භද්දෙකරත්තොති, සන්තො ආචික්ඛතෙ මුනි’.

248. ‘‘කිලෙසා ඣාපිතා මය්හං…පෙ… විහරාමි අනාසවො.

249. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

250. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ලොමසකඞ්ගියො [ලොමසඞ්ඛියො (ස්‍යා. ක.)] ථෙරො ඉමා ගාථායො

අභාසිත්ථාති.

ලොමසකඞ්ගියත්ථෙරස්සාපදානං අට්ඨමං.