9. වනවච්ඡත්ථෙරඅපදානං

251. ‘‘ඉමම්හි භද්දකෙ කප්පෙ, බ්‍රහ්මබන්ධු මහායසො;

කස්සපො නාම ගොත්තෙන, උප්පජ්ජි වදතං වරො.

252. ‘‘තදාහං පබ්බජිත්වාන, තස්ස බුද්ධස්ස සාසනෙ;

යාවජීවං චරිත්වාන, බ්‍රහ්මචාරං තතො චුතො.

253. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

254. ‘‘තතො චුතො අරඤ්ඤම්හි, කපොතො ආසහං තහිං;

වසතෙ ගුණසම්පන්නො, භික්ඛු ඣානරතො සදා.

255. ‘‘මෙත්තචිත්තො කාරුණිකො, සදා පමුදිතානනො;

උපෙක්ඛකො මහාවීරො, අප්පමඤ්ඤාසු කොවිදො.

256. ‘‘විනීවරණසඞ්කප්පෙ, සබ්බසත්තහිතාසයෙ;

විසට්ඨො නචිරෙනාසිං, තස්මිං සුගතසාවකෙ.

257. ‘‘උපෙච්ච පාදමූලම්හි, නිසින්නස්ස තදාස්සමෙ;

කදාචි සාමිසං දෙති, ධම්මං දෙසෙසි චෙකදා.

258. ‘‘තදා විපුලපෙමෙන, උපාසිත්වා ජිනත්‍රජං;

තතො චුතො ගතො සග්ගං, පවාසො සඝරං යථා.

259. ‘‘සග්ගා චුතො මනුස්සෙසු, නිබ්බත්තො පුඤ්ඤකම්මුනා;

අගාරං ඡඩ්ඩයිත්වාන, පබ්බජිං බහුසො අහං.

260. ‘‘සමණො තාපසො විප්පො, පරිබ්බජො තථෙවහං;

හුත්වා වසිං අරඤ්ඤම්හි, අනෙකසතසො අහං.

261. ‘‘පච්ඡිමෙ ච භවෙ දානි, රම්මෙ කපිලවත්ථවෙ;

වච්ඡගොත්තො දිජො තස්ස, ජායාය අහමොක්කමිං.

262. ‘‘මාතු මෙ දොහළො ආසි, තිරොකුච්ඡිගතස්ස මෙ;

ජායමානසමීපම්හි, වනවාසාය නිච්ඡයො.

263. ‘‘තතො මෙ අජනී මාතා, රමණීයෙ වනන්තරෙ;

ගබ්භතො නික්ඛමන්තං මං, කාසායෙන පටිග්ගහුං.

264. ‘‘තතො කුමාරො සිද්ධත්ථො, ජාතො සක්‍යකුලද්ධජො;

තස්ස මිත්තො පියො ආසිං, සංවිසට්ඨො සුමානියො.

265. ‘‘සත්තසාරෙභිනික්ඛන්තෙ, ඔහාය විපුලං යසං;

අහම්පි පබ්බජිත්වාන, හිමවන්තමුපාගමිං.

266. ‘‘වනාලයං භාවනීයං, කස්සපං ධුතවාදිකං;

දිස්වා සුත්වා ජිනුප්පාදං, උපෙසිං නරසාරථිං.

267. ‘‘සො මෙ ධම්මමදෙසෙසි, සබ්බත්ථං සම්පකාසයං;

තතොහං පබ්බජිත්වාන, වනමෙව පුනාගමං [පුනාගමිං (සී. පී.), පුනොක්කමං (ස්‍යා.)].

268. ‘‘තත්ථාප්පමත්තො විහරං, ඡළභිඤ්ඤා අඵස්සයිං [අපස්සයිං (ස්‍යා. ක.)];

අහො සුලද්ධලාභොම්හි, සුමිත්තෙනානුකම්පිතො.

269. ‘‘කිලෙසා ඣාපිතා මය්හං…පෙ… විහරාමි අනාසවො.

270. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

271. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා වනවච්ඡො ථෙරො ඉමා ගාථායො

අභාසිත්ථාති.

වනවච්ඡත්ථෙරස්සාපදානං නවමං.