7. අභයත්ථෙරඅපදානං

195. ‘‘පදුමුත්තරො නාම ජිනො, සබ්බධම්මෙසු චක්ඛුමා;

ඉතො සතසහස්සම්හි, කප්පෙ උප්පජ්ජි නායකො.

196. ‘‘සරණගමනෙ කිඤ්චි, නිවෙසෙසි තථාගතො;

කිඤ්චි සීලෙ නිවෙසෙසි, දසකම්මපථුත්තමෙ.

197. ‘‘දෙති කස්සචි සො වීරො, සාමඤ්ඤඵලමුත්තමං;

සමාපත්තී තථා අට්ඨ, තිස්සො විජ්ජා පවච්ඡති.

198. ‘‘ඡළභිඤ්ඤාසු යොජෙසි, කිඤ්චි සත්තං නරුත්තමො;

දෙති කස්සචි නාථො සො, චතස්සො පටිසම්භිදා.

199. ‘‘බොධනෙය්‍යං පජං දිස්වා, අසඞ්ඛෙය්‍යම්පි යොජනං [අසඞ්ඛෙය්‍යෙපි යොජනෙ සී. ස්‍යා. පී.)];

ඛණෙන උපගන්ත්වාන, විනෙති නරසාරථි.

200. ‘‘තදාහං හංසවතියං, අහොසිං බ්‍රාහ්මණත්‍රජො;

පාරගූ සබ්බවෙදානං, වෙය්‍යාකරණසම්මතො.

201. ‘‘නිරුත්තියා ච කුසලො, නිඝණ්ඩුම්හි විසාරදො;

පදකො කෙටුභවිදූ, ඡන්දොවිචිතිකොවිදො.

202. ‘‘ජඞ්ඝාවිහාරං විචරං, හංසාරාමමුපෙච්චහං;

අද්දසං වරදං [වදතං (සී. පී.), පවරං (ස්‍යා.)] සෙට්ඨං, මහාජනපුරක්ඛතං.

203. ‘‘දෙසෙන්තං විරජං ධම්මං, පච්චනීකමතී අහං;

උපෙත්වා තස්ස කල්‍යාණං, සුත්වාන විමලං අහං [වාක්‍යානි, සුත්වාන විමලානහං (සී. ස්‍යා. පී.)].

204. ‘‘බ්‍යාහතං පුනරුත්තං වා, අපත්ථං වා නිරත්ථකං;

නාද්දසං තස්ස මුනිනො, තතො පබ්බජිතො අහං.

205. ‘‘නචිරෙනෙව කාලෙන, සබ්බසත්තවිසාරදො;

නිපුණො බුද්ධවචනෙ, අහොසිං ගුණිසම්මතො.

206. ‘‘තදා චතස්සො ගාථායො, ගන්ථයිත්වා සුබ්‍යඤ්ජනා;

සන්ථවිත්වා තිලොකග්ගං, දෙසයිස්සං දිනෙ දිනෙ.

207. ‘‘විරත්තොසි මහාවීරො, සංසාරෙ සභයෙ වසං;

කරුණාය න නිබ්බායි, තතො කාරුණිකො මුනි.

208. ‘‘පුථුජ්ජනො වයො සන්තො, න කිලෙසවසො අහු;

සම්පජානො සතියුත්තො, තස්මා එසො අචින්තියො.

209. ‘‘දුබ්බලානි කිලෙසානි, යස්සාසයගතානි මෙ;

ඤාණග්ගිපරිදඩ්ඪානි, න ඛීයිංසු තමබ්භුතං.

210. ‘‘යො සබ්බලොකස්ස ගරු, ලොකො [ලොකෙ (ස්‍යා. ක.)] යස්ස තථා ගරු;

තථාපි ලොකාචරියො, ලොකො තස්සානුවත්තකො.

211. ‘‘එවමාදීහි සම්බුද්ධං, කිත්තයං ධම්මදෙසනං;

යාවජීවං කරිත්වාන, ගතො සග්ගං තතො චුතො.

212. ‘‘සතසහස්සිතො කප්පෙ, යං බුද්ධමභිකිත්තයිං;

දුග්ගතිං නාභිජානාමි, කිත්තනාය ඉදං ඵලං.

213. ‘‘දෙවලොකෙ මහාරජ්ජං, පාදෙසිං කඤ්චනග්ඝියං [දිබ්බානුභොජහං තදා (ස්‍යා.), රජ්ජං පාදෙසි කංචයං (සී.)];

චක්කවත්තී මහාරජ්ජං, බහුසොනුභවිං අහං.

214. ‘‘දුවෙ භවෙ පජායාමි, දෙවත්තෙ අථ මානුසෙ;

අඤ්ඤං ගතිං න ජානාමි, කිත්තනාය ඉදං ඵලං.

215. ‘‘දුවෙ කුලෙ පජායාමි, ඛත්තියෙ අථ බ්‍රාහ්මණෙ;

නීචෙ කුලෙ න ජායාමි, කිත්තනාය ඉදං ඵලං.

216. ‘‘පච්ඡිමෙ ච භවෙ දානි, ගිරිබ්බජපුරුත්තමෙ;

රඤ්ඤොහං බිම්බිසාරස්ස, පුත්තො නාමෙන චාභයො.

217. ‘‘පාපමිත්තවසං ගන්ත්වා, නිගණ්ඨෙන විමොහිතො;

පෙසිතො නාටපුත්තෙන, බුද්ධසෙට්ඨමුපෙච්චහං.

218. ‘‘පුච්ඡිත්වා නිපුණං පඤ්හං, සුත්වා බ්‍යාකරණුත්තමං;

පබ්බජිත්වාන නචිරං, අරහත්තමපාපුණිං.

219. ‘‘කිත්තයිත්වා ජිනවරං, කිත්තිතො හොමි සබ්බදා;

සුගන්ධදෙහවදනො, ආසිං සුඛසමප්පිතො.

220. ‘‘තික්ඛහාසලහුපඤ්ඤො, මහාපඤ්ඤො තථෙවහං;

විචිත්තපටිභානො ච, තස්ස කම්මස්ස වාහසා.

221. ‘‘අභිත්ථවිත්වා පදුමුත්තරාහං, පසන්නචිත්තො අසමං සයම්භුං;

න ගච්ඡි කප්පානි අපායභූමිං, සතං සහස්සානි බලෙන තස්ස.

222. ‘‘කිලෙසා ඣාපිතා මය්හං…පෙ… විහරාමි අනාසවො.

223. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

224. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අභයො ථෙරො ඉමා ගාථායො

අභාසිත්ථාති.

අභයත්ථෙරස්සාපදානං සත්තමං.