6. කාළුදායිත්ථෙරඅපදානං

165. ‘‘පදුමුත්තරො නාම ජිනො, සබ්බධම්මෙසු චක්ඛුමා;

ඉතො සතසහස්සම්හි, කප්පෙ උප්පජ්ජි නායකො.

166. ‘‘නායකානං වරො සත්ථා, ගුණාගුණවිදූ ජිනො;

කතඤ්ඤූ කතවෙදී ච, තිත්ථෙ යොජෙති පාණිනෙ [පාණිනො (සී. ස්‍යා පී.)].

167. ‘‘සබ්බඤ්ඤුතෙන ඤාණෙන, තුලයිත්වා දයාසයො;

දෙසෙති පවරං ධම්මං, අනන්තගුණසඤ්චයො.

168. ‘‘ස කදාචි මහාවීරො, අනන්තජිනසංසරි [අනන්තජනසංසදි (සී.), අනන්තජනසංසුධි (ස්‍යා.), අනන්තජනසංසරී (පී.)];

දෙසෙති මධුරං ධම්මං, චතුසච්චූපසඤ්හිතං.

169. ‘‘සුත්වාන තං ධම්මවරං, ආදිමජ්ඣන්තසොභණං;

පාණසතසහස්සානං, ධම්මාභිසමයො අහු.

170. ‘‘නින්නාදිතා තදා භූමි, ගජ්ජිංසු ච පයොධරා;

සාධුකාරං පවත්තිංසු, දෙවබ්‍රහ්මනරාසුරා.

171. ‘‘‘අහො කාරුණිකො සත්ථා, අහො සද්ධම්මදෙසනා;

අහො භවසමුද්දම්හි, නිමුග්ගෙ උද්ධරී ජිනො’.

172. ‘‘එවං පවෙදජාතෙසු, සනරාමරබ්‍රහ්මසු;

කුලප්පසාදකානග්ගං, සාවකං වණ්ණයී ජිනො.

173. ‘‘තදාහං හංසවතියං, ජාතොමච්චකුලෙ අහුං;

පාසාදිකො දස්සනියො, පහූතධනධඤ්ඤවා.

174. ‘‘හංසාරාමමුපෙච්චාහං, වන්දිත්වා තං තථාගතං;

සුණිත්වා මධුරං ධම්මං, කාරං කත්වා ච තාදිනො.

175. ‘‘නිපච්ච පාදමූලෙහං, ඉමං වචනමබ්‍රවිං;

‘කුලප්පසාදකානග්ගො, යො තයා සන්ථුතො [යො තව සාසනෙ (ස්‍යා.)] මුනෙ.

176. ‘‘‘තාදිසො හොමහං වීර [තාදිසොහං මහාවීර (ස්‍යා. ක.)], බුද්ධසෙට්ඨස්ස සාසනෙ’;

තදා මහාකාරුණිකො, සිඤ්චන්තො වා මතෙන මං.

177. ‘‘ආහ මං ‘පුත්ත උත්තිට්ඨ, ලච්ඡසෙ තං මනොරථං;

කථං නාම ජිනෙ කාරං, කත්වාන විඵලො සියා.

178. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

179. ‘‘‘තස්ස ධම්මෙසු දායාදො, ඔරසො ධම්මනිම්මිතො;

උදායි නාම නාමෙන, හෙස්සති සත්ථු සාවකො’.

180. ‘‘තං සුත්වා මුදිතො හුත්වා, යාවජීවං තදා ජිනං;

මෙත්තචිත්තො පරිචරිං, පච්චයෙහි විනායකං.

181. ‘‘තෙන කම්මවිපාකෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

182. ‘‘පච්ඡිමෙ ච භවෙ දානි, රම්මෙ කපිලවත්ථවෙ;

ජාතො මහාමච්චකුලෙ, සුද්ධොදනමහීපතෙ [සුද්ධොදනො මහීපති (ස්‍යා.)].

183. ‘‘තදා අජායි සිද්ධත්ථො, රම්මෙ ලුම්බිනිකානනෙ;

හිතාය සබ්බලොකස්ස, සුඛාය ච නරාසභො.

184. ‘‘තදහෙව අහං ජාතො, සහ තෙනෙව වඩ්ඪිතො;

පියො සහායො දයිතො, වියත්තො නීතිකොවිදො.

185. ‘‘එකූනතිංසො වයසා, නික්ඛමිත්වා අගාරතො [නික්ඛන්තො පබ්බජිත්ථසො (සී. ස්‍යා.)];

ඡබ්බස්සං වීතිනාමෙත්වා, ආසි බුද්ධො විනායකො.

186. ‘‘ජෙත්වා සසෙනකං මාරං, ඛෙපයිත්වාන ආසවෙ;

භවණ්ණවං තරිත්වාන, බුද්ධො ආසි සදෙවකෙ.

187. ‘‘ඉසිව්හයං ගමිත්වාන [ඉසිව්හයං පතනං ගන්ත්වා (ස්‍යා.)], විනෙත්වා පඤ්චවග්ගියෙ;

තතො විනෙසි භගවා, ගන්ත්වා ගන්ත්වා තහිං තහිං.

188. ‘‘වෙනෙය්‍යෙ විනයන්තො සො, සඞ්ගණ්හන්තො සදෙවකං;

උපෙච්ච මගධෙ ගිරිං [මාගදගිරිං (සී.), මඞ්ගලාගිරිං (පී.)], විහරිත්ථ තදා ජිනො.

189. ‘‘තදා සුද්ධොදනෙනාහං, භූමිපාලෙන පෙසිතො;

ගන්ත්වා දිස්වා දසබලං, පබ්බජිත්වාරහා අහුං.

190. ‘‘තදා මහෙසිං යාචිත්වා, පාපයිං කපිලව්හයං;

තතො පුරාහං ගන්ත්වාන, පසාදෙසිං මහාකුලං.

191. ‘‘ජිනො තස්මිං ගුණෙ තුට්ඨො, මං මහාපරිසාය සො [මමාහ පුරිසාසභො (ස්‍යා. පී.)];

කුලප්පසාදකානග්ගං, පඤ්ඤාපෙසි විනායකො.

192. ‘‘කිලෙසා ඣාපිතා මය්හං…පෙ… විහරාමි අනාසවො.

193. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

194. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කාළුදායිථෙරො ඉමා ගාථායො

අභාසිත්ථාති.

කාළුදායිත්ථෙරස්සාපදානං ඡට්ඨං.