5. නන්දකත්ථෙරඅපදානං

143. ‘‘පදුමුත්තරො නාම ජිනො, සබ්බධම්මෙසු චක්ඛුමා;

ඉතො සතසහස්සම්හි, කප්පෙ උප්පජ්ජි නායකො.

144. ‘‘හිතාය සබ්බසත්තානං, සුඛාය වදතං වරො;

අත්ථාය පුරිසාජඤ්ඤො, පටිපන්නො සදෙවකෙ.

145. ‘‘යසග්ගපත්තො සිරිමා, කිත්තිවණ්ණභතො [කිත්තිවණ්ණ භටො (ස්‍යා. ක.)] ජිනො;

පූජිතො සබ්බලොකස්ස, දිසා සබ්බාසු විස්සුතො.

146. ‘‘උත්තිණ්ණවිචිකිච්ඡො සො, වීතිවත්තකථංකථො;

පරිපුණ්ණමනසඞ්කප්පො, පත්තො සම්බොධිමුත්තමං.

147. ‘‘අනුප්පන්නස්ස මග්ගස්ස, උප්පාදෙතා නරුත්තමො;

අනක්ඛාතඤ්ච අක්ඛාසි, අසඤ්ජාතඤ්ච සඤ්ජනී.

148. ‘‘මග්ගඤ්ඤූ මග්ගවිදූ [සො මග්ගවිදූ (සී. පී.)] ච, මග්ගක්ඛායී නරාසභො;

මග්ගස්ස කුසලො සත්ථා, සාරථීනං වරුත්තමො [නරුත්තමො (ස්‍යා.)].

149. ‘‘තදා මහාකාරුණිකො, ධම්මං දෙසෙසි නායකො;

නිමුග්ගෙ කාමපඞ්කම්හි [මොහපඞ්කම්හි (සී. ස්‍යා.), මොහමග්ගම්හි (පී.)], සමුද්ධරති පාණිනෙ.

150. ‘‘භික්ඛුනීනං ඔවදනෙ, සාවකං සෙට්ඨසම්මතං;

වණ්ණයං එතදග්ගම්හි, පඤ්ඤපෙසි මහාමුනි.

151. ‘‘තං සුත්වාහං පමුදිතො, නිමන්තෙත්වා තථාගතං;

භොජයිත්වා සසඞ්ඝං තං, පත්ථයිං ඨානමුත්තමං.

152. ‘‘තදා පමුදිතො නාථො, මං අවොච මහාඉසි;

‘සුඛී භවස්සු දීඝාවු [දීඝායු (සී. ස්‍යා.)], ලච්ඡසෙ තං මනොරථං.

153. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

154. ‘‘‘තස්ස ධම්මෙසු දායාදො, ඔරසො ධම්මනිම්මිතො;

නන්දකො නාම නාමෙන, හෙස්සති සත්ථු සාවකො’.

155. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසූපගො අහං.

156. ‘‘පච්ඡිමෙ ච භවෙ දානි, ජාතො සෙට්ඨිකුලෙ අහං;

සාවත්ථියං පුරෙ වරෙ, ඉද්ධෙ ඵීතෙ මහද්ධනෙ.

157. ‘‘පුරප්පවෙසෙ සුගතං, දිස්වා විම්හිතමානසො;

ජෙතාරාමපටිග්ගාහෙ, පබ්බජිං අනගාරියං.

158. ‘‘නචිරෙනෙව කාලෙන, අරහත්තමපාපුණිං;

තතොහං තිණ්ණසංසාරො, සාසිතො සබ්බදස්සිනා.

159. ‘‘භික්ඛුනීනං ධම්මකථං, පටිපුච්ඡාකරිං අහං;

සාසිතා තා මයා සබ්බා, අභවිංසු අනාසවා.

160. ‘‘සතානි පඤ්චනූනානි, තදා තුට්ඨො මහාහිතො;

භික්ඛුනීනං ඔවදතං, අග්ගට්ඨානෙ ඨපෙසි මං.

161. ‘‘සතසහස්සෙ කතං කම්මං, ඵලං දස්සෙසි මෙ ඉධ;

සුමුත්තො සරවෙගොව, කිලෙසෙ ඣාපයිං මම.

162. ‘‘කිලෙසා ඣාපිතා මය්හං…පෙ… විහරාමි අනාසවො.

163. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

164. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නන්දකො ථෙරො ඉමා ගාථායො

අභාසිත්ථාති.

නන්දකත්ථෙරස්සාපදානං පඤ්චමං.