3. සීවලිත්ථෙරඅපදානං

54. ‘‘පදුමුත්තරො නාම ජිනො, සබ්බධම්මෙසු චක්ඛුමා;

ඉතො සතසහස්සම්හි, කප්පෙ උප්පජ්ජි නායකො.

55. ‘‘සීලං තස්ස අසඞ්ඛෙය්‍යං, සමාධි වජිරූපමො;

අසඞ්ඛෙය්‍යං ඤාණවරං, විමුත්ති ච අනොපමා.

56. ‘‘මනුජාමරනාගානං, බ්‍රහ්මානඤ්ච සමාගමෙ;

සමණබ්‍රාහ්මණාකිණ්ණෙ, ධම්මං දෙසෙසි නායකො.

57. ‘‘සසාවකං මහාලාභිං, පුඤ්ඤවන්තං ජුතින්ධරං;

ඨපෙසි එතදග්ගම්හි, පරිසාසු විසාරදො.

58. ‘‘තදාහං ඛත්තියො ආසිං, නගරෙ හංසසව්හයෙ;

සුත්වා ජිනස්ස තං වාක්‍යං, සාවකස්ස ගුණං බහුං.

59. ‘‘නිමන්තයිත්වා සත්තාහං, භොජයිත්වා සසාවකං;

මහාදානං දදිත්වාන, තං ඨානමභිපත්ථයිං.

60. ‘‘තදා මං විනතං පාදෙ, දිස්වාන පුරිසාසභො;

සරෙන මහතා වීරො [සුස්සරෙන මහාවීරො (සී. පී.)], ඉදං වචනමබ්‍රවි.

61. ‘‘‘තතො ජිනස්ස වචනං, සොතුකාමා මහාජනා;

දෙවදානවගන්ධබ්බා, බ්‍රහ්මානො ච මහිද්ධිකා’.

62. ‘‘සමණබ්‍රාහ්මණා චෙව, නමස්සිංසු කතඤ්ජලී;

‘නමො තෙ පුරිසාජඤ්ඤ, නමො තෙ පුරිසුත්තම.

63. ‘‘‘ඛත්තියෙන මහාදානං, දින්නං සත්තාහිකම්පි වො [සත්තහිකං මි වො (සී.), සත්තහිකාධිකං (ස්‍යා.), සත්තහිකං විභො (පී.)];

සොතුකාමා ඵලං තස්ස, බ්‍යාකරොහි මහාමුනෙ’.

64. ‘‘තතො අවොච භගවා, ‘සුණාථ මම භාසිතං;

අප්පමෙය්‍යම්හි බුද්ධම්හි, සසඞ්ඝම්හි පතිට්ඨිතා [සංඝම්හි සුප්පතිට්ඨිතා (සී. පී.)].

65. ‘‘‘දක්ඛිණා තාය [දක්ඛිණාදාය (ස්‍යා. පී.)] කො වත්තා, අප්පමෙය්‍යඵලා හි සා;

අපි චෙ ස මහාභොගො, ඨානං පත්ථෙති උත්තමං.

66. ‘‘‘ලාභී විපුලලාභානං, යථා භික්ඛු සුදස්සනො;

තථාහම්පි භවෙය්‍යන්ති, ලච්ඡසෙ තං අනාගතෙ.

67. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

68. ‘‘‘තස්ස ධම්මෙසු දායාදො, ඔරසො ධම්මනිම්මිතො;

සීවලි නාම නාමෙන, හෙස්සති සත්ථු සාවකො’.

69. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසූපගො අහං.

70. ‘‘එකනවුතිතො කප්පෙ, විපස්සී ලොකනායකො;

උප්පජ්ජි චාරුදස්සනො, සබ්බධම්මවිපස්සකො.

71. ‘‘තදාහං බන්ධුමතියං, කුලස්සඤ්ඤතරස්ස ච;

දයිතො පස්සිතො චෙව, ආසිං කම්මන්තවාවටො [කම්මන්තබ්‍යාවටො (සී. ස්‍යා. ක.)].

72. ‘‘තදා අඤ්ඤතරො පූගො, විපස්සිස්ස මහෙසිනො;

පරිවෙසං අකාරයි, මහන්තමතිවිස්සුතං.

73. ‘‘නිට්ඨිතෙ ච මහාදානෙ, දදුං ඛජ්ජකසඤ්හිතං;

නවං දධිං මධුඤ්චෙව, විචිනං නෙව අද්දසුං.

74. ‘‘තදාහං තං ගහෙත්වාන, නවං දධිං මධුම්පි ච;

කම්මස්සාමිඝරං ගච්ඡිං, තමෙසන්තා මමද්දසුං.

75. ‘‘සහස්සමපි දත්වාන, නාලභිංසු ච තං ද්වයං;

තතොහං එවං චින්තෙසිං, ‘නෙතං හෙස්සති ඔරකං.

76. ‘‘‘යථා ඉමෙ ජනා සබ්බෙ, සක්කරොන්ති තථාගතං;

අහම්පි කාරං කස්සාමි, සසඞ්ඝෙ ලොකනායකෙ’.

77. ‘‘තදාහමෙවං චින්තෙත්වා, දධිං මධුඤ්ච එකතො;

මද්දිත්වා ලොකනාථස්ස, සසඞ්ඝස්ස අදාසහං.

78. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

79. ‘‘පුනාහං බාරාණසියං, රාජා හුත්වා මහායසො;

සත්තුකස්ස තදා දුට්ඨො, ද්වාරරොධමකාරයිං.

80. ‘‘තදා තපස්සිනො රුද්ධා, එකාහං රක්ඛිතා අහුං;

තතො තස්ස විපාකෙන, පාපතිං [පාපිට්ඨං (ස්‍යා.) පාපත්තං (ක.)] නිරයං භුසං.

81. ‘‘පච්ඡිමෙ ච භවෙ දානි, ජාතොහං කොලියෙ පුරෙ;

සුප්පවාසා ච මෙ මාතා, මහාලි ලිච්ඡවී පිතා.

82. ‘‘ඛත්තියෙ පුඤ්ඤකම්මෙන, ද්වාරරොධස්ස වාහසා;

සත්ත වස්සානි නිවසිං, මාතුකුච්ඡිම්හි දුක්ඛිතො.

83. ‘‘සත්තාහං ද්වාරමූළ්හොහං, මහාදුක්ඛසමප්පිතො;

මාතා මෙ ඡන්දදානෙන, එවං ආසි සුදුක්ඛිතා.

84. ‘‘සුවත්ථිතොහං නික්ඛන්තො, බුද්ධෙන අනුකම්පිතො;

නික්ඛන්තදිවසෙයෙව, පබ්බජිං අනගාරියං.

85. ‘‘උපජ්ඣා සාරිපුත්තො මෙ, මොග්ගල්ලානො මහිද්ධිකො;

කෙසෙ ඔරොපයන්තො මෙ, අනුසාසි මහාමති.

86. ‘‘කෙසෙසු ඡිජ්ජමානෙසු, අරහත්තමපාපුණිං;

දෙවා නාගා මනුස්සා ච, පච්චයෙ උපනෙන්ති මෙ.

87. ‘‘පදුමුත්තරනාථඤ්ච, විපස්සිඤ්ච විනායකං;

යං පූජයිං පමුදිතො, පච්චයෙහි විසෙසතො.

88. ‘‘තතො තෙසං විසෙසෙන, කම්මානං විපුලුත්තමං;

ලාභං ලභාමි සබ්බත්ථ, වනෙ ගාමෙ ජලෙ ථලෙ.

89. ‘‘රෙවතං දස්සනත්ථාය, යදා යාති විනායකො;

තිංසභික්ඛුසහස්සෙහි, සහ ලොකග්ගනායකො.

90. ‘‘තදා දෙවොපණීතෙහි, මමත්ථාය මහාමති;

පච්චයෙහි මහාවීරො, සසඞ්ඝො ලොකනායකො.

91. ‘‘උපට්ඨිතො මයා බුද්ධො, ගන්ත්වා රෙවතමද්දස;

තතො ජෙතවනං ගන්ත්වා, එතදග්ගෙ ඨපෙසි මං.

92. ‘‘‘ලාභීනං සීවලි අග්ගො, මම සිස්සෙසු භික්ඛවො’;

සබ්බලොකහිතො සත්ථා, කිත්තයී පරිසාසු මං.

93. ‘‘කිලෙසා ඣාපිතා මය්හං…පෙ… විහරාමි අනාසවො.

94. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

95. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සීවලිථෙරො ඉමා ගාථායො

අභාසිත්ථාති.

සීවලිත්ථෙරස්සාපදානං තතියං.