2. කඞ්ඛාරෙවතත්ථෙරඅපදානං

34. ‘‘පදුමුත්තරො නාම ජිනො, සබ්බධම්මෙසු චක්ඛුමා;

ඉතො සතසහස්සම්හි, කප්පෙ උප්පජ්ජි නායකො.

35. ‘‘සීහහනු බ්‍රහ්මගිරො, හංසදුන්දුභිනිස්සනො [හංසදුන්දුභිනිස්සරො (සී.) … නිස්සවනො (පී.) … සාවනො (ස්‍යා.)];

නාගවික්කන්තගමනො, චන්දසූරාදිකප්පභො.

36. ‘‘මහාමතී මහාවීරො, මහාඣායී මහාබලො [මහාගති (ස්‍යා.), මහාහිතො (පී.)];

මහාකාරුණිකො නාථො, මහාතමපනූදනො [මහාතමවිධංසනො (ස්‍යා.), මහාතමනිසූදනො (පී.)].

37. ‘‘ස කදාචි තිලොකග්ගො, වෙනෙය්‍යං විනයං බහුං [වෙනෙය්‍යෙ විනියං බහූ (සී.)];

ධම්මං දෙසෙසි සම්බුද්ධො, සත්තාසයවිදූ මුනි.

38. ‘‘ඣායිං ඣානරතං වීරං, උපසන්තං අනාවිලං;

වණ්ණයන්තො පරිසතිං, තොසෙසි [තොසෙති (ස්‍යා. පී. ක.)] ජනතං ජිනො.

39. ‘‘තදාහං හංසවතියං, බ්‍රාහ්මණො වෙදපාරගූ;

ධම්මං සුත්වාන මුදිතො, තං ඨානමභිපත්ථයිං.

40. ‘‘තදා ජිනො වියාකාසි, සඞ්ඝමජ්ඣෙ විනායකො;

‘මුදිතො හොහි ත්වං බ්‍රහ්මෙ, ලච්ඡසෙ තං මනොරථං.

41. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

42. ‘‘‘තස්ස ධම්මෙසු දායාදො, ඔරසො ධම්මනිම්මිතො;

රෙවතො නාම නාමෙන, හෙස්සති සත්ථු සාවකො’.

43. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

44. ‘‘පච්ඡිමෙ ච භවෙ දානි, ජාතොහං කොලියෙ පුරෙ;

ඛත්තියෙ කුලසම්පන්නෙ, ඉද්ධෙ ඵීතෙ මහද්ධනෙ.

45. ‘‘යදා කපිලවත්ථුස්මිං, බුද්ධො ධම්මමදෙසයි;

තදා පසන්නො සුගතෙ, පබ්බජිං අනගාරියං.

46. ‘‘කඞ්ඛා මෙ බහුලා ආසි, කප්පාකප්පෙ තහිං තහිං;

සබ්බං තං විනයී බුද්ධො, දෙසෙත්වා ධම්මමුත්තමං.

47. ‘‘තතොහං තිණ්ණසංසාරො, සදා ඣානසුඛෙ රතො;

විහරාමි තදා බුද්ධො, මං දිස්වා එතදබ්‍රවි.

48. ‘‘‘යා කාචි කඞ්ඛා ඉධ වා හුරං වා, සකවෙදියා වා පරවෙදියා වා;

යෙ ඣායිනො තා පජහන්ති සබ්බා, ආතාපිනො බ්‍රහ්මචරියං චරන්තා’.

49. ‘‘සතසහස්සෙ කතං කම්මං, ඵලං දස්සෙසි මෙ ඉධ;

සුමුත්තො සරවෙගොව කිලෙසෙ ඣාපයිං මම.

50. ‘‘තතො ඣානරතං දිස්වා, බුද්ධො ලොකන්තගූ මුනි;

ඣායීනං භික්ඛූනං අග්ගො, පඤ්ඤාපෙති මහාමති.

51. ‘‘කිලෙසා ඣාපිතා මය්හං…පෙ… විහරාමි අනාසවො.

52. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

53. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කඞ්ඛාරෙවතො ථෙරො ඉමා ගාථායො

අභාසිත්ථාති.

කඞ්ඛාරෙවතත්ථෙරස්සාපදානං දුතියං.