8. උරුවෙළකස්සපත්ථෙරඅපදානං

251. ‘‘පදුමුත්තරො නාම ජිනො, සබ්බලොකවිදූ මුනි;

ඉතො සතසහස්සම්හි, කප්පෙ උප්පජ්ජි චක්ඛුමා.

252. ‘‘ඔවාදකො විඤ්ඤාපකො, තාරකො සබ්බපාණිනං;

දෙසනාකුසලො බුද්ධො, තාරෙසි ජනතං බහුං.

253. ‘‘අනුකම්පකො කාරුණිකො, හිතෙසී සබ්බපාණිනං;

සම්පත්තෙ තිත්ථියෙ සබ්බෙ, පඤ්චසීලෙ පතිට්ඨපි.

254. ‘‘එවං නිරාකුලං ආසි, සුඤ්ඤතං තිත්ථියෙහි ච;

විචිත්තං අරහන්තෙහි, වසීභූතෙහි තාදිභි.

255. ‘‘රතනානට්ඨපඤ්ඤාසං, උග්ගතො සො මහාමුනි;

කඤ්චනග්ඝියසඞ්කාසො, බාත්තිංසවරලක්ඛණො.

256. ‘‘වස්සසතසහස්සානි, ආයු විජ්ජති තාවදෙ;

තාවතා තිට්ඨමානො සො, තාරෙසි ජනතං බහුං.

257. ‘‘තදාහං හංසවතියා, බ්‍රාහ්මණො සාධුසම්මතො;

උපෙච්ච ලොකපජ්ජොතං, අස්සොසිං ධම්මදෙසනං.

258. ‘‘තදා මහාපරිසතිං, මහාපරිසසාවකං;

ඨපෙන්තං එතදග්ගම්හි, සුත්වාන මුදිතො අහං.

259. ‘‘මහතා පරිවාරෙන, නිමන්තෙත්වා මහාජිනං;

බ්‍රාහ්මණානං සහස්සෙන, සහදානමදාසහං.

260. ‘‘මහාදානං දදිත්වාන, අභිවාදිය නායකං;

එකමන්තං ඨිතො හට්ඨො, ඉදං වචනමබ්‍රවිං.

261. ‘‘‘තයි සද්ධාය මෙ වීර, අධිකාරගුණෙන ච;

පරිසා මහතී හොතු, නිබ්බත්තස්ස තහිං තහිං’.

262. ‘‘තදා අවොච පරිසං, ගජගජ්ජිතසුස්සරො;

කරවීකරුතො සත්ථා, ‘එතං පස්සථ බ්‍රාහ්මණං.

263. ‘‘‘හෙමවණ්ණං මහාබාහුං, කමලානනලොචනං;

උදග්ගතනුජං හට්ඨං, සද්ධවන්තං ගුණෙ මම.

264. ‘‘‘එස පත්ථයතෙ ඨානං [පත්ථයි තං ඨානං (ස්‍යා.)], සීහඝොසස්ස භික්ඛුනො;

අනාගතම්හි අද්ධානෙ, ලච්ඡසෙ තං මනොරථං.

265. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

266. ‘‘‘තස්ස ධම්මෙසු දායාදො, ඔරසො ධම්මනිම්මිතො;

කස්සපො නාම ගොත්තෙන, හෙස්සති සත්ථු සාවකො’.

267. ‘‘ඉතො ද්වෙනවුතෙ කප්පෙ, අහු සත්ථා අනුත්තරො;

අනූපමො අසදිසො, ඵුස්සො ලොකග්ගනායකො.

268. ‘‘සො ච සබ්බං තමං හන්ත්වා, විජටෙත්වා මහාජටං;

වස්සතෙ අමතං වුට්ඨිං, තප්පයන්තො සදෙවකං.

269. ‘‘තදා හි බාරාණසියං, රාජා පච්චා අහුම්හසෙ;

භාතරොම්හ තයො සබ්බෙ, සංවිසට්ඨාව රාජිනො.

270. ‘‘වීරඞ්ගරූපා බලිනො, සඞ්ගාමෙ අපරාජිතා;

තදා කුපිතපච්චන්තො [කුප්පති පච්චන්තො (ක.)], අම්හෙ ආහ මහීපති.

271. ‘‘‘එථ ගන්ත්වාන පච්චන්තං, සොධෙත්වා අට්ටවීබලං;

ඛෙමං විජිරිතං කත්වා, පුන දෙථාති භාසථ’.

272. ‘‘තතො මයං අවොචුම්හ, යදි දෙය්‍යාසි නායකං;

උපට්ඨානාය අම්හාකං, සාධයිස්සාම වො තතො.

273. ‘‘තතො මයං ලද්ධවරා, භූමිපාලෙන පෙසිතා;

නික්ඛිත්තසත්ථං පච්චන්තං, කත්වා පුනරුපච්ච තං.

274. ‘‘යාචිත්වා සත්ථුපට්ඨානං, රාජානං ලොකනායකං;

මුනිවීරං ලභිත්වාන, යාවජීවං යජිම්හ තං.

275. ‘‘මහග්ඝානි ච වත්ථානි, පණීතානි රසානි ච;

සෙනාසනානි රම්මානි, භෙසජ්ජානි හිතානි ච.

276. ‘‘දත්වා සසඞ්ඝමුනිනො [සසංඝස්ස මුනෙ (සී. පී.)], ධම්මෙනුප්පාදිතානි නො;

සීලවන්තො කාරුණිකා, භාවනායුත්තමානසා.

277. ‘‘සද්ධා පරිචරිත්වාන, මෙත්තචිත්තෙන නායකං;

නිබ්බුතෙ තම්හි ලොකග්ගෙ, පූජං කත්වා යථාබලං.

278. ‘‘තතො චුතා සන්තුසිතං [තාවතිංසං (ස්‍යා.)], ගතා තත්ථ මහාසුඛං;

අනුභූතා මයං සබ්බෙ, බුද්ධපූජායිදං ඵලං.

279. ‘‘මායාකාරො යථා රඞ්ගෙ [ලද්ධො (ස්‍යා. පී.)], දස්සෙසි විකතිං බහුං;

තථා භවෙ භමන්තොහං [ගමෙන්තොහං (ක.), භවන්තොහං (ස්‍යා.)], විදෙහාධිපතී අහුං.

280. ‘‘ගුණාචෙළස්ස වාක්‍යෙන, මිච්ඡාදිට්ඨිගතාසයො;

නරකං මග්ගමාරූළ්හො, රුචාය මම ධීතුයා.

281. ‘‘ඔවාදං නාදියිත්වාන, බ්‍රහ්මුනා නාරදෙනහං;

බහුධා සංසිතො සන්තො, දිට්ඨිං හිත්වාන පාපිකං.

282. ‘‘පූරයිත්වා විසෙසෙන, දස කම්මපථානිහං;

හිත්වාන දෙහමගමිං, සග්ගං සභවනං යථා.

283. ‘‘පච්ඡිමෙ භවෙ සම්පත්තෙ, බ්‍රහ්මබන්ධු අහොසහං;

බාරාණසියං ඵීතායං, ජාතො විප්පමහාකුලෙ.

284. ‘‘මච්චුබ්‍යාධිජරා භීතො, ඔගාහෙත්වා මහාවනං [ජහිත්වාන මහාධනං (සී.), ජහිත්වා ච මහාධනං (පී.)];

නිබ්බානං පදමෙසන්තො, ජටිලෙසු පරිබ්බජිං.

285. ‘‘තදා ද්වෙ භාතරො මය්හං, පබ්බජිංසු මයා සහ;

උරුවෙළායං මාපෙත්වා, අස්සමං නිවසිං අහං.

286. ‘‘කස්සපො නාම ගොත්තෙන, උරුවෙළනිවාසිකො [උරුවෙළාය නිවසිං (ස්‍යා.)];

තතො මෙ ආසි පඤ්ඤත්ති, උරුවෙළකස්සපො ඉති.

287. ‘‘නදීසකාසෙ භාතා මෙ, නදීකස්සපසව්හයො;

ආසී සකාසනාමෙන, ගයායං ගයාකස්සපො.

288. ‘‘ද්වෙ සතානි කනිට්ඨස්ස, තීණි මජ්ඣස්ස භාතුනො;

මම පඤ්ච සතානූනා, සිස්සා සබ්බෙ මමානුගා.

289. ‘‘තදා උපෙච්ච මං බුද්ධො, කත්වාන විවිධානි මෙ [කත්වා නානාවිධානි මෙ (සී.)];

පාටිහීරානි ලොකග්ගො, විනෙසි නරසාරථි.

290. ‘‘සහස්සපරිවාරෙන, අහොසිං එහිභික්ඛුකො;

තෙහෙව සහ සබ්බෙහි, අරහත්තමපාපුණිං.

291. ‘‘තෙ චෙවඤ්ඤෙ ච බහවො, සිස්සා මං පරිවාරයුං;

සාසිතුඤ්ච සමත්ථොහං, තතො මං ඉසිසත්තමො.

292. ‘‘මහාපරිසභාවස්මිං, එතදග්ගෙ ඨපෙසි මං;

අහො බුද්ධෙ කතං කාරං, සඵලං මෙ අජායථ.

293. ‘‘කිලෙසා ඣාපිතා මය්හං…පෙ… විහරාමි අනාසවො.

294. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

295. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උරුවෙළකස්සපො ථෙරො ඉමා ගාථායො

අභාසිත්ථාති.

උරුවෙළකස්සපත්ථෙරස්සාපදානං අට්ඨමං.