2. වක්කලිත්ථෙරඅපදානං

28. ‘‘ඉතො සතසහස්සම්හි, කප්පෙ උප්පජ්ජි නායකො;

අනොමනාමො අමිතො, නාමෙන පදුමුත්තරො.

29. ‘‘පදුමාකාරවදනො, පදුමාමලසුච්ඡවී;

ලොකෙනානුපලිත්තොව තොයෙන පදුමං යථා.

30. ‘‘වීරො පදුමපත්තක්ඛො, කන්තො ච පදුමං යථා;

පදුමුත්තරගන්ධොව, තස්මා සො පදුමුත්තරො.

31. ‘‘ලොකජෙට්ඨො ච නිම්මානො, අන්ධානං නයනූපමො;

සන්තවෙසො ගුණනිධි, කරුණාමතිසාගරො.

32. ‘‘ස කදාචි මහාවීරො, බ්‍රහ්මාසුරසුරච්චිතො;

සදෙවමනුජාකිණ්ණෙ, ජනමජ්ඣෙ ජිනුත්තමො [ජනුත්තමො (ස්‍යා. පී.), අනුත්තමො (ක.) වඞ්ගීසත්ථෙරාපදානෙපි].

33. ‘‘වදනෙන සුගන්ධෙන, මධුරෙන රුතෙන ච;

රඤ්ජයං පරිසං සබ්බං, සන්ථවී සාවකං සකං.

34. ‘‘සද්ධාධිමුත්තො සුමති, මම දස්සනලාලසො [දස්සනසාලයො (ස්‍යා.)];

නත්ථි එතාදිසො අඤ්ඤො, යථායං භික්ඛු වක්කලි.

35. ‘‘තදාහං හංසවතියං, නගරෙ බ්‍රාහ්මණත්‍රජො;

හුත්වා සුත්වා ච තං වාක්‍යං, තං ඨානමභිරොචයිං.

36. ‘‘සසාවකං තං විමලං, නිමන්තෙත්වා තථාගතං;

සත්තාහං භොජයිත්වාන, දුස්සෙහච්ඡාදයිං තදා.

37. ‘‘නිපච්ච සිරසා තස්ස, අනන්තගුණසාගරෙ;

නිමුග්ගො පීතිසම්පුණ්ණො, ඉදං වචනමබ්‍රවිං.

38. ‘‘‘යො සො තයා සන්ථවිතො, ඉතො සත්තමකෙ මුනි [ඉධ සද්ධාධිමුත්තො ඉසි (ස්‍යා.), ඉතො සත්තමකෙහනි (සී. පී.)];

භික්ඛු සද්ධාවතං අග්ගො, තාදිසො හොමහං මුනෙ’.

39. ‘‘එවං වුත්තෙ මහාවීරො, අනාවරණදස්සනො;

ඉමං වාක්‍යං උදීරෙසි, පරිසාය මහාමුනි.

40. ‘‘‘පස්සථෙතං මාණවකං, පීතමට්ඨනිවාසනං;

හෙමයඤ්ඤොපචිතඞ්ගං [හෙමයඤ්ඤොපවීතඞ්ගං (සී.)], ජනනෙත්තමනොහරං.

41. ‘‘‘එසො අනාගතද්ධානෙ, ගොතමස්ස මහෙසිනො;

අග්ගො සද්ධාධිමුත්තානං, සාවකොයං භවිස්සති.

42. ‘‘‘දෙවභූතො මනුස්සො වා, සබ්බසන්තාපවජ්ජිතො;

සබ්බභොගපරිබ්‍යූළ්හො, සුඛිතො සංසරිස්සති.

43. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

44. ‘‘‘තස්ස ධම්මෙසු දායාදො, ඔරසො ධම්මනිම්මිතො;

වක්කලි නාම නාමෙන, හෙස්සති සත්ථු සාවකො’.

45. ‘‘තෙන කම්මවිසෙසෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

46. ‘‘සබ්බත්ථ සුඛිතො හුත්වා, සංසරන්තො භවාභවෙ;

සාවත්ථියං පුරෙ ජාතො, කුලෙ අඤ්ඤතරෙ අහං.

47. ‘‘නොනීතසුඛුමාලං මං, ජාතපල්ලවකොමලං;

මන්දං උත්තානසයනං, පිසාචභයතජ්ජිතා.

48. ‘‘පාදමූලෙ මහෙසිස්ස, සායෙසුං දීනමානසා;

ඉමං දදාම තෙ නාථ, සරණං හොහි නායක.

49. ‘‘තදා පටිග්ගහි සො මං, භීතානං සරණො මුනි;

ජාලිනා චක්කඞ්කිතෙන [සඞ්කලඞ්කෙන (සී.)], මුදුකොමලපාණිනා.

50. ‘‘තදා පභුති තෙනාහං, අරක්ඛෙය්‍යෙන රක්ඛිතො;

සබ්බවෙරවිනිමුත්තො [සබ්බබ්‍යාධිවිනිමුත්තො (ස්‍යා.), සබ්බූපධිවිනිමුත්තො (පී.)], සුඛෙන පරිවුද්ධිතො.

51. ‘‘සුගතෙන විනා භූතො, උක්කණ්ඨාමි මුහුත්තකං;

ජාතියා සත්තවස්සොහං, පබ්බජිං අනගාරියං.

52. ‘‘සබ්බපාරමිසම්භූතං, නීලක්ඛිනයනං [ලඞ්කිනීලයනං (සී.)] වරං;

රූපං සබ්බසුභාකිණ්ණං, අතිත්තො විහරාමහං [විහයාමහං (සී. පී.)].

53. ‘‘බුද්ධරූපරතිං [බුද්ධො රූපරතිං (සී.)] ඤත්වා, තදා ඔවදි මං ජිනො;

‘අලං වක්කලි කිං රූපෙ, රමසෙ බාලනන්දිතෙ.

54. ‘‘‘යො හි පස්සති සද්ධම්මං, සො මං පස්සති පණ්ඩිතො;

අපස්සමානො සද්ධම්මං, මං පස්සම්පි න පස්සති.

55. ‘‘‘අනන්තාදීනවො කායො, විසරුක්ඛසමූපමො;

ආවාසො සබ්බරොගානං, පුඤ්ජො දුක්ඛස්ස කෙවලො.

56. ‘‘‘නිබ්බින්දිය තතො රූපෙ, ඛන්ධානං උදයබ්බයං;

පස්ස උපක්කිලෙසානං, සුඛෙනන්තං ගමිස්සති’.

57. ‘‘එවං තෙනානුසිට්ඨොහං, නායකෙන හිතෙසිනා;

ගිජ්ඣකූටං සමාරුය්හ, ඣායාමි ගිරිකන්දරෙ.

58. ‘‘ඨිතො පබ්බතපාදම්හි, අස්සාසයි [මමාහසො (සී.)] මහාමුනි;

වක්කලීති ජිනො වාචං, තං සුත්වා මුදිතො අහං.

59. ‘‘පක්ඛන්දිං සෙලපබ්භාරෙ, අනෙකසතපොරිසෙ;

තදා බුද්ධානුභාවෙන, සුඛෙනෙව මහිං ගතො.

60. ‘‘පුනොපි [පුනාපි (ස්‍යා.), මුනි මං (ක.)] ධම්මං දෙසෙති, ඛන්ධානං උදයබ්බයං;

තමහං ධම්මමඤ්ඤාය, අරහත්තමපාපුණිං.

61. ‘‘සුමහාපරිසමජ්ඣෙ, තදා මං චරණන්තගො;

අග්ගං සද්ධාධිමුත්තානං, පඤ්ඤපෙසි මහාමති.

62. ‘‘සතසහස්සිතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධපූජායිදං ඵලං.

63. ‘‘කිලෙසා ඣාපිතා මය්හං…පෙ… විහරාමි අනාසවො.

64. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

65. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා වක්කලිත්ථෙරො ඉමා ගාථායො

අභාසිත්ථාති.

වක්කලිත්ථෙරස්සාපදානං දුතියං.