3. මහාකප්පිනත්ථෙරඅපදානං

66. ‘‘පදුමුත්තරො නාම ජිනො, සබ්බධම්මාන පාරගූ;

උදිතො අජටාකාසෙ [ජගදාකාසෙ (සී.), ජලදාකාසෙ (පී.)], රවීව සරදම්බරෙ.

67. ‘‘වචනාභාය බොධෙති, වෙනෙය්‍යපදුමානි සො;

කිලෙසපඞ්කං සොසෙති, මතිරංසීහි නායකො.

68. ‘‘තිත්ථියානං යසෙ [යසො (සී. පී.)] හන්ති, ඛජ්ජොතාභා යථා රවි;

සච්චත්ථාභං පකාසෙති, රතනංව දිවාකරො.

69. ‘‘ගුණානං ආයතිභූතො, රතනානංව සාගරො;

පජ්ජුන්නොරිව භූතානි, ධම්මමෙඝෙන වස්සති.

70. ‘‘අක්ඛදස්සො තදා ආසිං, නගරෙ හංසසව්හයෙ;

උපෙච්ච ධම්මමස්සොසිං, ජලජුත්තමනාමිනො.

71. ‘‘ඔවාදකස්ස භික්ඛූනං, සාවකස්ස කතාවිනො;

ගුණං පකාසයන්තස්ස, තප්පයන්තස්ස [තොසයන්තස්ස (සී.), හාසයන්තස්ස (ස්‍යා.), වාසයන්තස්ස (පී.)] මෙ මනං.

72. ‘‘සුත්වා පතීතො සුමනො, නිමන්තෙත්වා තථාගතං;

සසිස්සං භොජයිත්වාන, තං ඨානමභිපත්ථයිං.

73. ‘‘තදා හංසසමභාගො, හංසදුන්දුභිනිස්සනො [හංසදුන්දුභිසුස්සරො (සී.)];

පස්සථෙතං මහාමත්තං, විනිච්ඡයවිසාරදං.

74. ‘‘පතිතං පාදමූලෙ මෙ, සමුග්ගතතනූරුහං;

ජීමූතවණ්ණං පීණංසං, පසන්නනයනානනං.

75. ‘‘පරිවාරෙන මහතා, රාජයුත්තං මහායසං;

එසො කතාවිනො ඨානං, පත්ථෙති මුදිතාසයො.

76. ‘‘‘ඉමිනා පණිපාතෙන, චාගෙන පණිධීහි ච [පිණ්ඩපාතෙන, චෙතනා පණිධීහි ච (සී.)];

කප්පසතසහස්සානි, නුපපජ්ජති දුග්ගතිං.

77. ‘‘‘දෙවෙසු දෙවසොභග්ගං, මනුස්සෙසු මහන්තතං;

අනුභොත්වාන සෙසෙන [අභුත්වාව සෙසෙන (සී.), අනුභොත්වාව සෙසෙන (ස්‍යා.)], නිබ්බානං පාපුණිස්සති.

78. ‘‘‘සතසහස්සිතො කප්පෙ, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

79. ‘‘‘තස්ස ධම්මෙසු දායාදො, ඔරසො ධම්මනිම්මිතො;

කප්පිනො නාම නාමෙන, හෙස්සති සත්ථු සාවකො’.

80. ‘‘තතොහං සුකතං කාරං, කත්වාන ජිනසාසනෙ;

ජහිත්වා මානුසං දෙහං, තුසිතං අගමාසහං.

81. ‘‘දෙවමානුසරජ්ජානි, සතසො අනුසාසිය;

බාරාණසියමාසන්නෙ, ජාතො කෙනියජාතියං.

82. ‘‘සහස්සපරිවාරෙන [සතසහස්සපරිවාරො (ස්‍යා.)], සපජාපතිකො අහං;

පඤ්ච පච්චෙකබුද්ධානං, සතානි සමුපට්ඨහිං.

83. ‘‘තෙමාසං භොජයිත්වාන, පච්ඡාදම්හ තිචීවරං;

තතො චුතා මයං සබ්බෙ, අහුම්හ තිදසූපගා.

84. ‘‘පුනො සබ්බෙ මනුස්සත්තං, අගමිම්හ තතො චුතා;

කුක්කුටම්හි පුරෙ ජාතා, හිමවන්තස්ස පස්සතො.

85. ‘‘කප්පිනො නාමහං ආසිං, රාජපුත්තො මහායසො;

සෙසාමච්චකුලෙ ජාතා, මමෙව පරිවාරයුං.

86. ‘‘මහාරජ්ජසුඛං පත්තො, සබ්බකාමසමිද්ධිමා;

වාණිජෙහි සමක්ඛාතං, බුද්ධුප්පාදමහං සුණිං.

87. ‘‘‘බුද්ධො ලොකෙ සමුප්පන්නො, අසමො එකපුග්ගලො;

සො පකාසෙති සද්ධම්මං, අමතං සුඛමුත්තමං.

88. ‘‘‘සුයුත්තා තස්ස සිස්සා ච, සුමුත්තා ච අනාසවා’;

‘‘සුත්වා නෙසං සුවචනං, සක්කරිත්වාන වාණිජෙ.

89. ‘‘පහාය රජ්ජං සාමච්චො, නික්ඛමිං බුද්ධමාමකො;

නදිං දිස්වා මහාචන්දං, පූරිතං සමතිත්තිකං.

90. ‘‘අප්පතිට්ඨං අනාලම්බං, දුත්තරං සීඝවාහිනිං;

ගුණං සරිත්වා බුද්ධස්ස, සොත්ථිනා සමතික්කමිං.

91. ‘‘‘භවසොතං සචෙ බුද්ධො, තිණ්ණො ලොකන්තගූ විදූ [විභූ (ක.)];

එතෙන සච්චවජ්ජෙන, ගමනං මෙ සමිජ්ඣතු.

92. ‘‘‘යදි සන්තිගමො මග්ගො, මොක්ඛො චච්චන්තිකං [මොක්ඛදං සන්තිකං (ස්‍යා.)] සුඛං;

එතෙන සච්චවජ්ජෙන, ගමනං මෙ සමිජ්ඣතු.

93. ‘‘‘සඞ්ඝො චෙ තිණ්ණකන්තාරො, පුඤ්ඤක්ඛෙත්තො අනුත්තරො;

එතෙන සච්චවජ්ජෙන, ගමනං මෙ සමිජ්ඣතු’.

94. ‘‘සහ කතෙ සච්චවරෙ, මග්ගා අපගතං ජලං;

තතො සුඛෙන උත්තිණ්ණො, නදීතීරෙ මනොරමෙ.

95. ‘‘නිසින්නං අද්දසං බුද්ධං, උදෙන්තංව පභඞ්කරං;

ජලන්තං හෙමසෙලංව, දීපරුක්ඛංව ජොතිතං.

96. ‘‘සසිංව තාරාසහිතං, සාවකෙහි පුරක්ඛතං;

වාසවං විය වස්සන්තං, දෙසනාජලදන්තරං [දෙවෙන ජලනන්දනං (ස්‍යා. පී.)].

97. ‘‘වන්දිත්වාන සහාමච්චො, එකමන්තමුපාවිසිං;

තතො නො ආසයං [තතො අජ්ඣාසයං (ස්‍යා.)] ඤත්වා, බුද්ධො ධම්මමදෙසයි.

98. ‘‘සුත්වාන ධම්මං විමලං, අවොචුම්හ මයං ජිනං;

‘පබ්බාජෙහි මහාවීර, නිබ්බින්දාම්හ [නිබ්බින්නාම්හ (සී. පී.), ඔතිණ්ණම්හ (ස්‍යා.)] මයං භවෙ’.

99. ‘‘‘ස්වක්ඛාතො භික්ඛවෙ ධම්මො, දුක්ඛන්තකරණාය වො;

චරථ බ්‍රහ්මචරියං’, ඉච්චාහ මුනිසත්තමො.

100. ‘‘සහ වාචාය සබ්බෙපි, භික්ඛුවෙසධරා මයං;

අහුම්හ උපසම්පන්නා, සොතාපන්නා ච සාසනෙ.

101. ‘‘තතො ජෙතවනං ගන්ත්වා, අනුසාසි විනායකො;

අනුසිට්ඨො ජිනෙනාහං, අරහත්තමපාපුණිං.

102. ‘‘තතො භික්ඛුසහස්සානි [භික්ඛුසහස්සං තං (සී. පී.)], අනුසාසිමහං තදා;

මමානුසාසනකරා, තෙපි ආසුං අනාසවා.

103. ‘‘ජිනො තස්මිං ගුණෙ තුට්ඨො, එතදග්ගෙ ඨපෙසි මං;

භික්ඛුඔවාදකානග්ගො, කප්පිනොති මහාජනෙ.

104. ‘‘සතසහස්සෙ කතං කම්මං, ඵලං දස්සෙසි මෙ ඉධ;

පමුත්තො සරවෙගොව, කිලෙසෙ ඣාපයිං [ඣාපයී (සී.)] මම.

105. ‘‘කිලෙසා ඣාපිතා මය්හං…පෙ… විහරාමි අනාසවො.

106. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

107. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මහාකප්පිනො ථෙරො ඉමා ගාථායො

අභාසිත්ථාති.

මහාකප්පිනත්ථෙරස්සාපදානං තතියං.