10. මොඝරාජත්ථෙරඅපදානං

327. ‘‘පදුමුත්තරො නාම ජිනො, සබ්බලොකවිදූ මුනි;

ඉතො සතසහස්සම්හි, කප්පෙ උප්පජ්ජි චක්ඛුමා.

328. ‘‘ඔවාදකො විඤ්ඤාපකො, තාරකො සබ්බපාණිනං;

දෙසනාකුසලො බුද්ධො, තාරෙසි ජනතං බහුං.

329. ‘‘අනුකම්පකො කාරුණිකො, හිතෙසී සබ්බපාණිනං;

සම්පත්තෙ තිත්ථියෙ සබ්බෙ, පඤ්චසීලෙ පතිට්ඨපි.

330. ‘‘එවං නිරාකුලං ආසි, සුඤ්ඤතං තිත්ථියෙහි ච;

විචිත්තං අරහන්තෙහි, වසීභූතෙහි තාදිභි.

331. ‘‘රතනානට්ඨපඤ්ඤාසං, උග්ගතො සො මහාමුනි;

කඤ්චනග්ඝියසඞ්කාසො, බාත්තිංසවරලක්ඛණො.

332. ‘‘වස්සසතසහස්සානි, ආයු විජ්ජති තාවදෙ;

තාවතා තිට්ඨමානො සො, තාරෙසි ජනතං බහුං.

333. ‘‘තදාහං හංසවතියං, කුලෙ අඤ්ඤතරෙ අහුං;

පරකම්මායනෙ යුත්තො, නත්ථි මෙ කිඤ්චි සංධනං.

334. ‘‘පටික්කමනසාලායං, වසන්තො කතභූමියං;

අග්ගිං උජ්ජාලයිං තත්ථ, දළ්හං කණ්හාසි සා [කණ්හා සියා (සී. පී.), ඩය්හකණ්හා සිලා (ස්‍යා.)] හී.

335. ‘‘තදා පරිසතිං නාථො, චතුසච්චපකාසකො;

සාවකං සම්පකිත්තෙසි, ලූඛචීවරධාරකං.

336. ‘‘තස්ස තම්හි ගුණෙ තුට්ඨො, පණිපච්ච [පතිපජ්ජ (ස්‍යා.)] තථාගතං;

ලූඛචීවරධාරග්ගං, පත්ථයිං ඨානමුත්තමං.

337. ‘‘තදා අවොච භගවා, සාවකෙ පදුමුත්තරො;

‘පස්සථෙතං පුරිසකං, කුචෙලං තනුදෙහකං.

338. ‘‘‘පීතිප්පසන්නවදනං, සද්ධාධනසමන්විතං [සද්ධාස්නෙහසමන්වතං (ක.)];

උදග්ගතනුජං හට්ඨං, අචලං සාලපිණ්ඩිතං.

339. ‘‘‘එසො පත්ථෙති තං ඨානං, සච්චසෙනස්ස භික්ඛුනො;

ලූඛචීවරධාරිස්ස, තස්ස වණ්ණසිතාසයො [වණ්ණගතාසයො (සී. ස්‍යා. පී.)].

340. ‘‘තං සුත්වා මුදිතො හුත්වා, නිපච්ච සිරසා ජිනං;

යාවජීවං සුභං කම්මං, කරිත්වා ජිනසාසනෙ.

341. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසූපගො අහං.

342. ‘‘පටික්කමනසාලායං, භූමිදාහකකම්මුනා;

සමසහස්සං නිරයෙ, අදය්හිං වෙදනාට්ටිතො.

343. ‘‘තෙන කම්මාවසෙසෙන, පඤ්ච ජාතිසතානිහං;

මනුස්සො කුලජො හුත්වා, ජාතියා ලක්ඛණඞ්කිතො.

344. ‘‘පඤ්ච ජාතිසතානෙව, කුට්ඨරොගසමප්පිතො;

මහාදුක්ඛං අනුභවිං, තස්ස කම්මස්ස වාහසා.

345. ‘‘ඉමස්මිං භද්දකෙ කප්පෙ, උපරිට්ඨං යසස්සිනං;

පිණ්ඩපාතෙන තප්පෙසිං, පසන්නමානසො අහං.

346. ‘‘තෙන කම්මවිසෙසෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

347. ‘‘පච්ඡිමෙ භවෙ සම්පත්තෙ, අජායිං ඛත්තියෙ කුලෙ;

පිතුනො අච්චයෙනාහං, මහාරජ්ජසමප්පිතො.

348. ‘‘කුට්ඨරොගාධිභූතොහං, න රතිං න සුඛං ලභෙ;

මොඝං රජ්ජං සුඛං යස්මා, මොඝරාජා තතො අහං.

349. ‘‘කායස්ස දොසං දිස්වාන, පබ්බජිං අනගාරියං;

බාවරිස්ස දිජග්ගස්ස, සිස්සත්තං අජ්ඣුපාගමිං.

350. ‘‘මහතා පරිවාරෙන, උපෙච්ච නරනායකං;

අපුච්ඡිං නිපුණං පඤ්හං, තං වීරං වාදිසූදනං.

351. ‘‘‘අයං ලොකො පරො ලොකො, බ්‍රහ්මලොකො සදෙවකො;

දිට්ඨිං නො [දිට්ඨා නො (සී.), දිට්ඨං නො (පී.), දිට්ඨිං තෙ (ස්‍යා.)] නාභිජානාමි, ගොතමස්ස යසස්සිනො.

352. ‘‘‘එවාභික්කන්තදස්සාවිං, අත්ථි පඤ්හෙන ආගමං;

කථං ලොකං අවෙක්ඛන්තං, මච්චුරාජා න පස්සති’.

353. ‘‘‘සුඤ්ඤතො ලොකං අවෙක්ඛස්සු, මොඝරාජ සදා සතො;

අත්තානුදිට්ඨිං උහච්ච, එවං මච්චුතරො සියා.

354. ‘‘‘එවං ලොකං අවෙක්ඛන්තං, මච්චුරාජා න පස්සති’;

ඉති මං අභණි බුද්ධො, සබ්බරොගතිකිච්ඡකො.

355. ‘‘සහ ගාථාවසානෙන, කෙසමස්සුවිවජ්ජිතො;

කාසාවවත්ථවසනො, ආසිං භික්ඛු තථාරහා.

356. ‘‘සඞ්ඝිකෙසු විහාරෙසු, න වසිං රොගපීළිතො;

මා විහාරො පදුස්සීති, වාතරොගෙහි පීළිතො [වාචායාභිසුපීළිතො (ස්‍යා. පී.), වාතරොගී සුපීළිතො (ක.)].

357. ‘‘සඞ්කාරකූටා ආහිත්වා, සුසානා රථිකාහි ච;

තතො සඞ්ඝාටිං කරිත්වා, ධාරයිං ලූඛචීවරං.

358. ‘‘මහාභිසක්කො තස්මිං මෙ, ගුණෙ තුට්ඨො විනායකො;

ලූඛචීවරධාරීනං, එතදග්ගෙ ඨපෙසි මං.

359. ‘‘පුඤ්ඤපාපපරික්ඛීණො, සබ්බරොගවිවජ්ජිතො;

සිඛීව අනුපාදානො, නිබ්බායිස්සමනාසවො.

360. ‘‘කිලෙසා ඣාපිතා මය්හං…පෙ… විහරාමි අනාසවො.

361. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

362. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මොඝරාජා ථෙරො ඉමා ගාථායො

අභාසිත්ථාති.

මොඝරාජත්ථෙරස්සාපදානං දසමං.

කච්චායනවග්ගො චතුපඤ්ඤාසමො.