1. මහාකච්චායනත්ථෙරඅපදානං

1. ‘‘පදුමුත්තරො නාම ජිනො, අනෙජො අජිතං ජයො;

සතසහස්සෙ කප්පානං, ඉතො උප්පජ්ජි නායකො.

2. ‘‘වීරො කමලපත්තක්ඛො, සසඞ්කවිමලානනො;

කනකාචලසඞ්කාසො [කඤ්චනතචසඞ්කාසො (ස්‍යා.)], රවිදිත්තිසමප්පභො.

3. ‘‘සත්තනෙත්තමනොහාරී, වරලක්ඛණභූසිතො;

සබ්බවාක්‍යපථාතීතො, මනුජාමරසක්කතො.

4. ‘‘සම්බුද්ධො බොධයං සත්තෙ, වාගීසො මධුරස්සරො;

කරුණානිබන්ධසන්තානො, පරිසාසු විසාරදො.

5. ‘‘දෙසෙති මධුරං ධම්මං, චතුසච්චූපසංහිතං;

නිමුග්ගෙ මොහපඞ්කම්හි, සමුද්ධරති පාණිනෙ.

6. ‘‘තදා එකචරො හුත්වා, තාපසො හිමවාලයො;

නභසා මානුසං ලොකං, ගච්ඡන්තො ජිනමද්දසං.

7. ‘‘උපෙච්ච සන්තිකං තස්ස, අස්සොසිං ධම්මදෙසනං;

වණ්ණයන්තස්ස වීරස්ස, සාවකස්ස මහාගුණං.

8. ‘‘සඞ්ඛිත්තෙන මයා වුත්තං, විත්ථාරෙන පකාසයං;

පරිසං මඤ්ච තොසෙති, යථා කච්චායනො අයං.

9. ‘‘‘නාහං එවමිධෙකච්චං [එවංවිධං කඤ්චි (සී. පී.)], අඤ්ඤං පස්සාමි සාවකං;

තස්මාතදග්ගෙ [තස්මෙතදග්ගෙ (සී.)] එසග්ගො, එවං ධාරෙථ භික්ඛවො’.

10. ‘‘තදාහං විම්හිතො හුත්වා, සුත්වා වාක්‍යං මනොරමං;

හිමවන්තං ගමිත්වාන, ආහිත්වා [ආහත්වා (සී. පී.)] පුප්ඵසඤ්චයං.

11. ‘‘පූජෙත්වා ලොකසරණං, තං ඨානමභිපත්ථයිං;

තදා මමාසයං ඤත්වා, බ්‍යාකාසි ස රණඤ්ජහො.

12. ‘‘‘පස්සථෙතං ඉසිවරං, නිද්ධන්තකනකත්තචං;

උද්ධග්ගලොමං පීණංසං, අචලං පඤ්ජලිං ඨිතං.

13. ‘‘‘හාසං සුපුණ්ණනයනං, බුද්ධවණ්ණගතාසයං;

ධම්මජං උග්ගහදයං [ධම්මංව විග්ගහවරං (සී.), ධම්මපටිග්ගහවරං (පී.)], අමතාසිත්තසන්නිභං’.

14. ‘‘කච්චානස්ස ගුණං සුත්වා, තං ඨානං පත්ථයං ඨිතො;

අනාගතම්හි අද්ධානෙ, ගොතමස්ස මහාමුනෙ.

15. ‘‘තස්ස ධම්මෙසු දායාදො, ඔරසො ධම්මනිම්මිතො;

කච්චානො නාම නාමෙන, හෙස්සති සත්ථු සාවකො.

16. ‘‘බහුස්සුතො මහාඤාණී, අධිප්පායවිදූ මුනෙ;

පාපුණිස්සති තං ඨානං, යථායං බ්‍යාකතො මයා.

17. ‘‘සතසහස්සිතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධපූජායිදං ඵලං.

18. ‘‘දුවෙ භවෙ සංසරාමි, දෙවත්තෙ අථ මානුසෙ;

අඤ්ඤං ගතිං න ගච්ඡාමි, බුද්ධපූජායිදං ඵලං.

19. ‘‘දුවෙ කුලෙ පජායාමි, ඛත්තියෙ අථ බ්‍රාහ්මණෙ;

නීචෙ කුලෙ න ජායාමි, බුද්ධපූජායිදං ඵලං.

20. ‘‘පච්ඡිමෙ ච භවෙ දානි, ජාතො උජ්ජෙනියං පුරෙ [ජාතො, උජ්ජෙනියං පුරෙ රමෙ (ස්‍යා.)];

පජ්ජොතස්ස ච චණ්ඩස්ස, පුරොහිතදිජාධිනො [පුරොහිතදිජාතිනො (සී. පී.)].

21. ‘‘පුත්තො තිරිටිවච්ඡස්ස [තිරිටවච්ඡස්ස (සී.), තිපිතිවච්ඡස්ස (ස්‍යා.)], නිපුණො වෙදපාරගූ;

මාතා ච චන්දිමා නාම, කච්චානොහං වරත්තචො.

22. ‘‘වීමංසනත්ථං බුද්ධස්ස, භූමිපාලෙන පෙසිතො;

දිස්වා මොක්ඛපුරද්වාරං, නායකං ගුණසඤ්චයං.

23. ‘‘සුත්වා ච විමලං වාක්‍යං, ගතිපඞ්කවිසොසනං;

පාපුණිං අමතං සන්තං, සෙසෙහි සහ සත්තහි.

24. ‘‘අධිප්පායවිදූ ජාතො, සුගතස්ස මහාමතෙ;

ඨපිතො එතදග්ගෙ ච, සුසමිද්ධමනොරථො.

25. ‘‘කිලෙසා ඣාපිතා මය්හං, භවා සබ්බෙ සමූහතා;

නාගොව බන්ධනං ඡෙත්වා, විහරාමි අනාසවො.

26. ‘‘ස්වාගතං වත මෙ ආසි, මම බුද්ධස්ස සන්තිකෙ;

‘‘ස්වාගතං වත මෙ ආසි, මම බුද්ධස්ස සන්තිකෙ; තිස්සො විජ්ජා අනුප්පත්තා, කතං බුද්ධස්ස සාසනං.

27. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා මහාකච්චායනො ථෙරො ඉමා ගාථායො

අභාසිත්ථාති.

මහාකච්චායනත්ථෙරස්සාපදානං පඨමං.