8. චඞ්කමනදායකත්ථෙරඅපදානං

93. ‘‘අත්ථදස්සිස්ස මුනිනො, ලොකජෙට්ඨස්ස තාදිනො;

ඉට්ඨකාහි චිනිත්වාන, චඞ්කමං කාරයිං අහං.

94. ‘‘උච්චතො පඤ්චරතනං, චඞ්කමං සාධුමාපිතං;

ආයාමතො හත්ථසතං, භාවනීය්‍යං මනොරමං.

95. ‘‘පටිග්ගහෙසි භගවා, අත්ථදස්සී නරුත්තමො;

හත්ථෙන පුලිනං ගය්හ, ඉමා ගාථා අභාසථ.

96. ‘‘‘ඉමිනා පුලිනදානෙන, චඞ්කමං සුකතෙන ච;

සත්තරතනසම්පන්නං, පුලිනං අනුභොස්සති.

97. ‘‘‘තීණි කප්පානි දෙවෙසු, දෙවරජ්ජං කරිස්සති;

අනුභොස්සති සම්පත්තිං, අච්ඡරාහි පුරක්ඛතො.

98. ‘‘‘මනුස්සලොකමාගන්ත්වා, රාජා රට්ඨෙ භවිස්සති;

තික්ඛත්තුං චක්කවත්තී ච, මහියා සො භවිස්සති’.

99. ‘‘අට්ඨාරසෙ කප්පසතෙ, යං කම්මමකරිං තදා;

දුග්ගතිං නාභිජානාමි, චඞ්කමස්ස ඉදං ඵලං.

100. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා චඞ්කමනදායකො ථෙරො ඉමා ගාථායො අභාසිත්ථාති.

චඞ්කමනදායකත්ථෙරස්සාපදානං අට්ඨමං.