4. සන්නිට්ඨාපකත්ථෙරඅපදානං

70. ‘‘අරඤ්ඤෙ කුටිකං කත්වා, වසාමි පබ්බතන්තරෙ;

ලාභාලාභෙන සන්තුට්ඨො, යසෙන අයසෙන ච.

71. ‘‘පදුමුත්තරො ලොකවිදූ, ආහුතීනං පටිග්ගහො;

වසීසතසහස්සෙහි [භික්ඛුසතසහස්සෙහි (ස්‍යා.)], ආගච්ඡි මම සන්තිකං.

72. ‘‘උපාගතං මහානාගං [මහාවීරං (සී.)], ජලජුත්තමනාමකං;

තිණසන්ථරං [තිණත්ථරං (ක.)] පඤ්ඤාපෙත්වා, අදාසිං සත්ථුනො අහං.

73. ‘‘පසන්නචිත්තො සුමනො, ආමණ්ඩං පානීයඤ්චහං;

අදාසිං උජුභූතස්ස, විප්පසන්නෙන චෙතසා.

74. ‘‘සතසහස්සිතො කප්පෙ [සතසහස්සෙ ඉතො කප්පෙ (සී.)], යං දානමදදිං තදා;

දුග්ගතිං නාභිජානාමි, ආමණ්ඩස්ස ඉදං ඵලං.

75. ‘‘එකතාලීසකප්පම්හි, එකො ආසිං අරින්දමො;

සත්තරතනසම්පන්නො, චක්කවත්තී මහබ්බලො.

76. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සන්නිට්ඨාපකො [සන්නිධාපකො (සී.)] ථෙරො ඉමා ගාථායො අභාසිත්ථාති.

සන්නිට්ඨාපකත්ථෙරස්සාපදානං චතුත්ථං.