5. පඤ්චහත්ථියත්ථෙරඅපදානං

77. ‘‘සුමෙධො නාම සම්බුද්ධො, ගච්ඡතෙ අන්තරාපණෙ;

ඔක්ඛිත්තචක්ඛු [ඛිත්තචක්ඛු (ක. සී. ක.)] මිතභාණී, සතිමා සංවුතින්ද්‍රියො.

78. ‘‘පඤ්ච උප්පලහත්ථානි, ආවෙළත්ථං අහංසු මෙ;

තෙන බුද්ධං අපූජෙසිං, පසන්නො සෙහි පාණිභි.

79. ‘‘ආරොපිතා ච තෙ පුප්ඵා, ඡදනං අස්සු සත්ථුනො;

සමාධිංසු [සංසාවිංසු (සී.)] මහානාගං, සිස්සා ආචරියං යථා.

80. ‘‘තිංසකප්පසහස්සම්හි, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

81. ‘‘ඉතො වීසකප්පසතෙ, අහෙසුං පඤ්ච ඛත්තියා;

හත්ථියා නාම නාමෙන, චක්කවත්තී මහබ්බලා.

82. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පඤ්චහත්ථියො ථෙරො ඉමා ගාථායො අභාසිත්ථාති.

පඤ්චහත්ථියත්ථෙරස්සාපදානං පඤ්චමං.