10. චුන්දත්ථෙරඅපදානං

125. ‘‘සිද්ධත්ථස්ස භගවතො, ලොකජෙට්ඨස්ස තාදිනො;

අග්ඝියං කාරයිත්වාන, ජාතිපුප්ඵෙහි ඡාදයිං.

126. ‘‘නිට්ඨාපෙත්වාන තං පුප්ඵං, බුද්ධස්ස උපනාමයිං;

පුප්ඵාවසෙසං පග්ගය්හ, බුද්ධස්ස අභිරොපයිං.

127. ‘‘කඤ්චනග්ඝියසඞ්කාසං, බුද්ධං ලොකග්ගනායකං;

පසන්නචිත්තො සුමනො, පුප්ඵග්ඝියමුපානයිං.

128. ‘‘විතිණ්ණකඞ්ඛො සම්බුද්ධො, තිණ්ණොඝෙහි පුරක්ඛතො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

129. ‘‘‘දිබ්බගන්ධං පවායන්තං, යො මෙ පුප්ඵග්ඝියං අදා;

තමහං කිත්තයිස්සාමි, සුණාථ මම භාසතො.

130. ‘‘‘ඉතො චුතො අයං පොසො, දෙවසඞ්ඝපුරක්ඛතො;

ජාතිපුප්ඵෙහි පරිකිණ්ණො, දෙවලොකං ගමිස්සති.

131. ‘‘‘උබ්බිද්ධං භවනං තස්ස, සොවණ්ණඤ්ච මණීමයං;

බ්‍යම්හං පාතුභවිස්සති, පුඤ්ඤකම්මප්පභාවිතං.

132. ‘‘‘චතුසත්තතික්ඛත්තුං සො, දෙවරජ්ජං කරිස්සති;

අනුභොස්සති සම්පත්තිං, අච්ඡරාහි පුරක්ඛතො.

133. ‘‘‘පථබ්‍යා රජ්ජං තිසතං, වසුධං ආවසිස්සති;

පඤ්චසත්තතික්ඛත්තුඤ්ච, චක්කවත්තී භවිස්සති.

134. ‘‘‘දුජ්ජයො නාම නාමෙන, හෙස්සති මනුජාධිපො;

අනුභොත්වාන තං පුඤ්ඤං, සකකම්මං අපස්සිතො [සකකම්මූපසංහිතො (ස්‍යා.)].

135. ‘‘‘විනිපාතං අගන්ත්වාන, මනුස්සත්තං ගමිස්සති;

හිරඤ්ඤං තස්ස [හිරඤ්ඤස්ස ච (සී. ක.)] නිචිතං, කොටිසතමනප්පකං.

136. ‘‘‘නිබ්බත්තිස්සති යොනිම්හි, බ්‍රාහ්මණෙ සො භවිස්සති;

වඞ්ගන්තස්ස සුතො ධීමා, සාරියා ඔරසො පියො.

137. ‘‘‘සො ච පච්ඡා පබ්බජිත්වා, අඞ්ගීරසස්ස සාසනෙ;

චූළචුන්දොති [චූලචුන්දොති (සී.)] නාමෙන, හෙස්සති සත්ථු සාවකො.

138. ‘‘‘සාමණෙරොව සො සන්තො, ඛීණාසවො භවිස්සති;

සබ්බාසවෙ පරිඤ්ඤාය, නිබ්බායිස්සතිනාසවො’.

139. ‘‘උපට්ඨහිං මහාවීරං, අඤ්ඤෙ ච පෙසලෙ බහූ;

භාතරං මෙ චුපට්ඨාසිං, උත්තමත්ථස්ස පත්තියා.

140. ‘‘භාතරං මෙ උපට්ඨිත්වා, ධාතුං පත්තම්හි ඔහිය [ඔපිය (සී.), ඔචිය (ස්‍යා.)];

සම්බුද්ධං උපනාමෙසිං, ලොකජෙට්ඨං නරාසභං.

141. ‘‘උභො හත්ථෙහි පග්ගය්හ, බුද්ධො ලොකෙ සදෙවකෙ;

සන්දස්සයන්තො තං ධාතුං, කිත්තයි අග්ගසාවකං.

142. ‘‘චිත්තඤ්ච සුවිමුත්තං මෙ, සද්ධා මය්හං පතිට්ඨිතා;

සබ්බාසවෙ පරිඤ්ඤාය, විහරාමි අනාසවො.

143. ‘‘පටිසම්භිදානුප්පත්තා, විමොක්ඛාපි ච ඵස්සිතා [පටිසම්භිදා චතස්සො, විමොක්ඛාපි ච අට්ඨිමෙ (ස්‍යා.)];

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා චුන්දො ථෙරො ඉමා ගාථායො අභාසිත්ථාති.

චුන්දත්ථෙරස්සාපදානං දසමං.

උපාලිවග්ගො පඤ්චමො.