6. බීජනිවග්ගො

1. විධූපනදායකත්ථෙරඅපදානං

1. ‘‘පදුමුත්තරබුද්ධස්ස, ලොකජෙට්ඨස්ස තාදිනො;

බීජනිකා [වීජනිකා (සී. ස්‍යා.)] මයා දින්නා, ද්විපදින්දස්ස තාදිනො.

2. ‘‘සකං චිත්තං පසාදෙත්වා, පග්ගහෙත්වාන අඤ්ජලිං;

සම්බුද්ධමභිවාදෙත්වා, පක්කමිං උත්තරාමුඛො.

3. ‘‘බීජනිං පග්ගහෙත්වාන, සත්ථා ලොකග්ගනායකො [ලොකෙ අනුත්තරො (සී.)];

භික්ඛුසඞ්ඝෙ ඨිතො සන්තො, ඉමා ගාථා අභාසථ.

4. ‘‘‘ඉමිනා බීජනිදානෙන, චිත්තස්ස පණිධීහි [චෙතනාපණිධීහි (අඤ්ඤත්ථ)] ච;

කප්පානං සතසහස්සං, විනිපාතං න ගච්ඡති’.

5. ‘‘ආරද්ධවීරියො පහිතත්තො, චෙතොගුණසමාහිතො;

ජාතියා සත්තවස්සොහං, අරහත්තං අපාපුණිං.

6. ‘‘සට්ඨිකප්පසහස්සම්හි, බීජමානසනාමකා;

සොළසාසිංසු රාජානො, චක්කවත්තී මහබ්බලා.

7. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා විධූපනදායකො ථෙරො ඉමා ගාථායො අභාසිත්ථාති.

විධූපනදායකත්ථෙරස්සාපදානං පඨමං.

2. සතරංසිත්ථෙරඅපදානං

8. ‘‘උබ්බිද්ධං සෙලමාරුය්හ, නිසීදි පුරිසුත්තමො;

පබ්බතස්සාවිදූරම්හි, බ්‍රාහ්මණො මන්තපාරගූ.

9. ‘‘උපවිට්ඨං මහාවීරං, දෙවදෙවං නරාසභං;

අඤ්ජලිං පග්ගහෙත්වාන, සන්ථවිං ලොකනායකං.

10. ‘‘‘එස බුද්ධො මහාවීරො, වරධම්මප්පකාසකො;

ජලති අග්ගිඛන්ධොව, භික්ඛුසඞ්ඝපුරක්ඛතො.

11. ‘‘‘මහාසමුද්දොව‘ක්ඛුබ්භො [’ක්ඛොභො (සී. ස්‍යා.)], අණ්ණවොව දුරුත්තරො;

මිගරාජාවසම්භීතො [ඡම්භිතො (ක.)], ධම්මං දෙසෙති චක්ඛුමා’.

12. ‘‘මම සඞ්කප්පමඤ්ඤාය, පදුමුත්තරනායකො;

භික්ඛුසඞ්ඝෙ ඨිතො සත්ථා, ඉමා ගාථා අභාසථ.

13. ‘‘‘යෙනායං [යෙනාහං (ක.)] අඤ්ජලී දින්නො, බුද්ධසෙට්ඨො ච ථොමිතො;

තිංසකප්පසහස්සානි, දෙවරජ්ජං කරිස්සති.

14. ‘‘‘කප්පසතසහස්සම්හි, අඞ්ගීරසසනාමකො;

විවට්ටච්ඡදො [විවත්ථච්ඡද්දො (සී.)] සම්බුද්ධො, උප්පජ්ජිස්සති තාවදෙ.

15. ‘‘‘තස්ස ධම්මෙසු දායාදො, ඔරසො ධම්මනිම්මිතො;

සතරංසීති නාමෙන, අරහා සො භවිස්සති’.

16. ‘‘ජාතියා සත්තවස්සොහං, පබ්බජිං අනගාරියං;

සතරංසිම්හි නාමෙන, පභා නිද්ධාවතෙ මම.

17. ‘‘මණ්ඩපෙ රුක්ඛමූලෙ වා, ඣායී ඣානරතො අහං;

ධාරෙමි අන්තිමං දෙහං, සම්මාසම්බුද්ධසාසනෙ.

18. ‘‘සට්ඨිකප්පසහස්සම්හි, චතුරො රාමනාමකා;

සත්තරතනසම්පන්නා, චක්කවත්තී මහබ්බලා.

19. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සතරංසි ථෙරො ඉමා ගාථායො අභාසිත්ථාති.

සතරංසිත්ථෙරස්සාපදානං දුතියං.

3. සයනදායකත්ථෙරඅපදානං

20. ‘‘පදුමුත්තරබුද්ධස්ස, සබ්බලොකානුකම්පිනො;

සයනං තස්ස පාදාසිං, විප්පසන්නෙන චෙතසා.

21. ‘‘තෙන සයනදානෙන, සුඛෙත්තෙ බීජසම්පදා;

භොගා නිබ්බත්තරෙ තස්ස, සයනස්ස ඉදං ඵලං.

22. ‘‘ආකාසෙ සෙය්‍යං කප්පෙමි, ධාරෙමි පථවිං ඉමං;

පාණෙසු මෙ ඉස්සරියං, සයනස්ස ඉදං ඵලං.

23. ‘‘පඤ්චකප්පසහස්සම්හි, අට්ඨ ආසුං මහාතෙජා [මහාවරා (සී.), මහාවීරා (ස්‍යා.)];

චතුත්තිංසෙ කප්පසතෙ, චතුරො ච මහබ්බලා.

24. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සයනදායකො ථෙරො ඉමා ගාථායො අභාසිත්ථාති.

සයනදායකත්ථෙරස්සාපදානං තතියං.

4. ගන්ධොදකියත්ථෙරඅපදානං

25. ‘‘පදුමුත්තරබුද්ධස්ස, මහාබොධිමහො අහු;

විචිත්තං ඝටමාදාය, ගන්ධොදකමදාසහං.

26. ‘‘න්හානකාලෙ ච බොධියා, මහාමෙඝො පවස්සථ;

නින්නාදො ච මහා ආසි, අසනියා ඵලන්තියා.

27. ‘‘තෙනෙවාසනිවෙගෙන, තත්ථ කාලඞ්කතො [කාලකතො (සී. ස්‍යා.)] අහං [අහුං (සී.)];

දෙවලොකෙ ඨිතො සන්තො, ඉමා ගාථා අභාසහං.

28. ‘‘‘අහො බුද්ධො අහො ධම්මො, අහො නො සත්ථුසම්පදා;

කළෙවරං [කලෙබරං (සී.)] මෙ පතිතං, දෙවලොකෙ රමාමහං.

29. ‘‘‘උබ්බිද්ධං භවනං මය්හං, සතභූමං සමුග්ගතං;

කඤ්ඤාසතසහස්සානි, පරිවාරෙන්ති මං සදා.

30. ‘‘‘ආබාධා මෙ න විජ්ජන්ති, සොකො මය්හං න විජ්ජති;

පරිළාහං න පස්සාමි, පුඤ්ඤකම්මස්සිදං ඵලං.

31. ‘‘‘අට්ඨවීසෙ කප්පසතෙ, රාජා සංවසිතො අහුං;

සත්තරතනසම්පන්නො, චක්කවත්තී මහබ්බලො’.

32. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ගන්ධොදකියො ථෙරො ඉමා ගාථායො අභාසිත්ථාති.

ගන්ධොදකියත්ථෙරස්සාපදානං චතුත්ථං.

5. ඔපවය්හත්ථෙරඅපදානං

33. ‘‘පදුමුත්තරබුද්ධස්ස, ආජානීයමදාසහං;

නිය්‍යාදෙත්වාන සම්බුද්ධෙ [සම්බුද්ධං (සී. ක.)], අගමාසිං සකං ඝරං.

34. ‘‘දෙවලො නාම නාමෙන, සත්ථුනො අග්ගසාවකො;

වරධම්මස්ස දායාදො, ආගච්ඡි මම සන්තිකං.

35. ‘‘සපත්තභාරො භගවා, ආජානෙය්‍යො න කප්පති;

තව සඞ්කප්පමඤ්ඤාය, අධිවාසෙසි චක්ඛුමා.

36. ‘‘අග්ඝාපෙත්වා වාතජවං, සින්ධවං සීඝවාහනං;

පදුමුත්තරබුද්ධස්ස, ඛමනීයමදාසහං.

37. ‘‘යං යං යොනුපපජ්ජාමි, දෙවත්තං අථ මානුසං [දෙවෙ ච මානුසෙ භවෙ (සී. ක.)];

ඛමනීයං වාතජවං, චිත්තං නිබ්බත්තතෙ [ආජානීයා වාතජවා, විත්ති නිබ්බත්තරෙ (ස්‍යා.), ඛමනීයා වාතජවා, චිත්තා නිබ්බත්තරෙ (සී.)] මම.

38. ‘‘ලාභං තෙසං සුලද්ධංව, යෙ ලභන්තුපසම්පදං;

පුනපි පයිරුපාසෙය්‍යං, බුද්ධො ලොකෙ සචෙ භවෙ.

39. ‘‘අට්ඨවීසතික්ඛත්තුංහං, රාජා ආසිං මහබ්බලො;

චාතුරන්තො විජිතාවී, ජම්බුසණ්ඩස්ස [ජම්බුදීපස්ස (ස්‍යා.), ජම්බුමණ්ඩස්ස (ක.)] ජම්බුඉස්සරො.

40. ‘‘ඉදං පච්ඡිමකං මය්හං, චරිමො වත්තතෙ භවො;

පත්තොස්මි අචලං ඨානං, හිත්වා ජයපරාජයං.

41. ‘‘චතුතිංසසහස්සම්හි, මහාතෙජොසි ඛත්තියො;

සතරතනසම්පන්නො, චක්කවත්තී මහබ්බලො.

42. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඔපවය්හො ථෙරො ඉමා ගාථායො අභාසිත්ථාති.

ඔපවය්හත්ථෙරස්සාපදානං පඤ්චමං.

6. සපරිවාරාසනත්ථෙරඅපදානං

43. ‘‘පදුමුත්තරබුද්ධස්ස, පිණ්ඩපාතං අදාසහං;

ගන්ත්වා කිලිට්ඨකං ඨානං [තං භොජනට්ඨානං (සී.)], මල්ලිකාහි පරික්ඛිතං [පරික්ඛිපිං (සී.)].

44. ‘‘තම්හාසනම්හි ආසීනො, බුද්ධො ලොකග්ගනායකො;

අකිත්තයි පිණ්ඩපාතං, උජුභූතො සමාහිතො.

45. ‘‘යථාපි භද්දකෙ ඛෙත්තෙ, බීජං අප්පම්පි රොපිතං;

සම්මා ධාරං පවෙච්ඡන්තෙ, ඵලං තොසෙති කස්සකං.

46. ‘‘තථෙවායං පිණ්ඩපාතො, සුඛෙත්තෙ රොපිතො තයා;

භවෙ නිබ්බත්තමානම්හි, ඵලං තෙ [නිබ්බත්තමානං හි, ඵලතො (සී.)] තොසයිස්සති [තප්පයිස්සති (ක.)].

47. ‘‘ඉදං වත්වාන සම්බුද්ධො, ජලජුත්තමනාමකො;

පිණ්ඩපාතං ගහෙත්වාන, පක්කාමි උත්තරාමුඛො.

48. ‘‘සංවුතො පාතිමොක්ඛස්මිං, ඉන්ද්‍රියෙසු ච පඤ්චසු;

පවිවෙකමනුයුත්තො, විහරාමි අනාසවො.

49. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සපරිවාරාසනො ථෙරො ඉමා ගාථායො අභාසිත්ථාති.

සපරිවාරාසනත්ථෙරස්සාපදානං ඡට්ඨං.

7. පඤ්චදීපකත්ථෙරඅපදානං

50. ‘‘පදුමුත්තරබුද්ධස්ස, සබ්බභූතානුකම්පිනො;

සද්දහිත්වාන [සුසණ්ඨහිත්වා (සී.)] සද්ධම්මෙ, උජුදිට්ඨි අහොසහං.

51. ‘‘පදීපදානං පාදාසිං, පරිවාරෙත්වාන බොධියං;

සද්දහන්තො පදීපානි, අකරිං තාවදෙ අහං.

52. ‘‘යං යං යොනුපපජ්ජාමි, දෙවත්තං අථ මානුසං;

ආකාසෙ උක්කං ධාරෙන්ති, දීපදානස්සිදං ඵලං.

53. ‘‘තිරොකුට්ටං තිරොසෙලං, සමතිග්ගය්හ පබ්බතං;

සමන්තා යොජනසතං, දස්සනං අනුභොමහං.

54. ‘‘තෙන කම්මාවසෙසෙන, පත්තොම්හි ආසවක්ඛයං;

ධාරෙමි අන්තිමං දෙහං, ද්විපදින්දස්ස සාසනෙ.

55. ‘‘චතුත්තිංසෙ කප්පසතෙ, සතචක්ඛුසනාමකා;

රාජාහෙසුං මහාතෙජා, චක්කවත්තී මහබ්බලා.

56. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පඤ්චදීපකො ථෙරො ඉමා ගාථායො අභාසිත්ථාති.

පඤ්චදීපකත්ථෙරස්සාපදානං සත්තමං.

8. ධජදායකත්ථෙරඅපදානං

57. ‘‘පදුමුත්තරබුද්ධස්ස, බොධියා පාදපුත්තමෙ;

හට්ඨො හට්ඨෙන චිත්තෙන, ධජමාරොපයිං අහං.

58. ‘‘පතිතපත්තානි ගණ්හිත්වා, බහිද්ධා ඡඩ්ඩයිං අහං;

අන්තොසුද්ධං බහිසුද්ධං, අධිමුත්තමනාසවං.

59. ‘‘සම්මුඛා විය සම්බුද්ධං, අවන්දිං බොධිමුත්තමං;

පදුමුත්තරො ලොකවිදූ, ආහුතීනං පටිග්ගහො.

60. ‘‘භික්ඛුසඞ්ඝෙ ඨිතො සත්ථා, ඉමා ගාථා අභාසථ;

‘‘‘ඉමිනා ධජදානෙන, උපට්ඨානෙන චූභයං.

61. ‘‘‘කප්පානං සතසහස්සං, දුග්ගතිං සො න ගච්ඡති;

දෙවෙසු දෙවසොභග්‍යං, අනුභොස්සතිනප්පකං.

62. ‘‘‘අනෙකසතක්ඛත්තුඤ්ච, රාජා රට්ඨෙ භවිස්සති;

උග්ගතො නාම නාමෙන, චක්කවත්තී භවිස්සති.

63. ‘‘‘සම්පත්තිං අනුභොත්වාන, සුක්කමූලෙන චොදිතො;

ගොතමස්ස භගවතො, සාසනෙභිරමිස්සති’.

64. ‘‘පධානපහිතත්තොම්හි, උපසන්තො නිරූපධි;

ධාරෙමි අන්තිමං දෙහං, සම්මාසම්බුද්ධසාසනෙ.

65. ‘‘එකපඤ්ඤාසසහස්සෙ, කප්පෙ උග්ගතසව්හයො [සව්හයා (ස්‍යා.)];

පඤ්ඤාසසතසහස්සෙ, ඛත්තියො මෙඝසව්හයො [ඛත්තියා ඛෙමසව්හයා (ස්‍යා.)].

66. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ධජදායකො ථෙරො ඉමා ගාථායො අභාසිත්ථාති.

ධජදායකත්ථෙරස්සාපදානං අට්ඨමං.