9. ජතුකණ්ණිත්ථෙරඅපදානං

276. ‘‘නගරෙ හංසවතියා, සෙට්ඨිපුත්තො අහොසහං;

සමප්පිතො කාමගුණෙ, පරිචාරෙමහං තදා.

277. ‘‘තතො [තයො (සී.)] පාසාදමාරුය්හ, මහාභොගෙ වලඤ්ජකො [උබ්බිද්ධා ගෙහලුඤ්ජකා (ක.), උබ්බිද්ධාගෙහලඤ්ඡකා (සී.)];

තත්ථ නච්චෙහි ගීතෙහි, පරිචාරෙමහං තදා.

278. ‘‘තූරියා ආහතා මය්හං, සම්මතාළසමාහිතා;

නච්චන්තා [රඤ්ජන්තී (ස්‍යා.), රජ්ජන්තා (ක.)] ඉත්ථියො සබ්බා, හරන්තියෙව මෙ මනො.

279. ‘‘චෙලාපිකා [චෙලාවකා (ස්‍යා.), වෙලාමිකා (පී.)] ලාමණිකා [වාමනිකා (ස්‍යා. පී.)], කුඤ්ජවාසී තිමජ්ඣිකා [කුඤ්ජවා සීහිමජ්ඣිතා (ස්‍යා.), කුජ්ජා වා සීහිමජ්ඣිකා (පී.)];

ලඞ්ඝිකා සොකජ්ඣායී ච, පරිවාරෙන්ති මං සදා.

280. ‘‘වෙතාළිනො කුම්භථූනී, නටා ච නච්චකා බහූ;

නටකා නාටකා චෙව, පරිවාරෙන්ති මං සදා.

281. ‘‘කප්පකා න්හාපකා සූදා, මාලාකාරා සුපාසකා [සුමාපකා (සී. ස්‍යා.)];

ජල්ලා මල්ලා ච තෙ සබ්බෙ, පරිවාරෙන්ති මං සදා.

282. ‘‘එතෙසු කීළමානෙසු, සික්ඛිතෙ කතුපාසනෙ;

රත්තින්දිවං න ජානාමි, ඉන්දොව තිදසඞ්ගණෙ.

283. ‘‘අද්ධිකා පථිකා සබ්බෙ, යාචකා වරකා බහූ;

උපගච්ඡන්ති තෙ නිච්චං, භික්ඛයන්තා මමං ඝරං.

284. ‘‘සමණා බ්‍රාහ්මණා චෙව, පුඤ්ඤක්ඛෙත්තා අනුත්තරා;

වඩ්ඪයන්තා මමං පුඤ්ඤං, ආගච්ඡන්ති මමං ඝරං.

285. ‘‘පටගා [පටකා (සී. ස්‍යා.), පදකා (පී.)] ලටුකා [ලටකා (සී.)] සබ්බෙ, නිගණ්ඨා පුප්ඵසාටකා;

තෙදණ්ඩිකා එකසිඛා, ආගච්ඡන්ති මමං ඝරං.

286. ‘‘ආජීවකා විලුත්තාවී, ගොධම්මා දෙවධම්මිකා;

රජොජල්ලධරා එතෙ, ආගච්ඡන්ති මමං ඝරං.

287. ‘‘පරිත්තකා සන්තිපත්තා [පරිවත්තකා සිද්ධිපත්තා (සී. ස්‍යා. පී.)], කොධපුග්ගනිකා [කොණ්ඩපුග්ගණිකා (සී.), කොණ්ඩපුග්ගලිකා (පී.)] බහූ;

තපස්සී වනචාරී ච, ආගච්ඡන්ති මමං ඝරං.

288. ‘‘ඔඩ්ඩකා දමිළා චෙව, සාකුළා මලවාළකා [මලයාලකා (සී. ස්‍යා. පී.)];

සවරා යොනකා චෙව, ආගච්ඡන්ති මමං ඝරං.

289. ‘‘අන්ධකා මුණ්ඩකා සබ්බෙ, කොටලා හනුවින්දකා [කොලකා සානුවින්දකා (සී. පී.)];

ආරාවචීනරට්ඨා ච, ආගච්ඡන්ති මමං ඝරං.

290. ‘‘අලසන්දකා [අලසන්තා (ක.)] පල්ලවකා, ධම්මරා නිග්ගමානුසා [බබ්බරා භග්ගකාරුසා (සී.)];

ගෙහිකා [රොහිතා (සී.), බාහිකා (පී.)] චෙතපුත්තා ච, ආගච්ඡන්ති මමං ඝරං.

291. ‘‘මාධුරකා කොසලකා, කලිඞ්ගා [කාසිකා (සී.)] හත්ථිපොරිකා;

ඉසිණ්ඩා මක්කලා චෙව, ආගච්ඡන්ති මමං ඝරං.

292. ‘‘චෙලාවකා ආරබ්භා [අරම්මා (සී. පී.)] ච, ඔඝුළ්හා [ඔක්කලා (සී.)] මෙඝලා බහූ;

ඛුද්දකා සුද්දකා චෙව, ආගච්ඡන්ති මමං ඝරං.

293. ‘‘රොහණා සින්ධවා චෙව, චිතකා එකකණ්ණිකා;

සුරට්ඨා අපරන්තා ච, ආගච්ඡන්ති මමං ඝරං.

294. ‘‘සුප්පාරකා කුමාරා [කිකුමාරා (සී. පී.)] ච, මල්ලසොවණ්ණභූමිකා [මලයා සොණ්ණභූමිකා (සී. ස්‍යා. පී.)];

වජ්ජීතඞ්ගා [වජ්ජී තාරා (සී.), වජ්ජීහාරා (ස්‍යා. පී.)] ච තෙ සබ්බෙ, ආගච්ඡන්ති මමං ඝරං.

295. ‘‘නළකාරා පෙසකාරා, චම්මකාරා ච තච්ඡකා;

කම්මාරා කුම්භකාරා ච, ආගච්ඡන්ති මමං ඝරං.

296. ‘‘මණිකාරා ලොහකාරා, සොණ්ණකාරා ච දුස්සිකා;

තිපුකාරා ච තෙ සබ්බෙ, ආගච්ඡන්ති මමං ඝරං.

297. ‘‘උසුකාරා භමකාරා, පෙසකාරා ච ගන්ධිකා;

රජකා තුන්නවායා ච, ආගච්ඡන්ති මමං ඝරං.

298. ‘‘තෙලිකා කට්ඨහාරා ච, උදහාරා ච පෙස්සිකා;

සූපිකා සූපරක්ඛා ච, ආගච්ඡන්ති මමං ඝරං.

299. ‘‘දොවාරිකා අනීකට්ඨා, බන්ධිකා [වන්දිකා (සී.), ගන්ථිකා (ස්‍යා.), සන්දිකා (පී.)] පුප්ඵඡඩ්ඩකා;

හත්ථාරුහා හත්ථිපාලා, ආගච්ඡන්ති මමං ඝරං.

300. ‘‘ආනන්දස්ස මහාරඤ්ඤො [ආනන්දස්ස නාම රඤ්ඤො (ස්‍යා.), අරින්දමනාම රඤ්ඤො (පී.)], මමත්ථස්ස [පමත්තස්ස (සී. පී.), සමග්ගස්ස (ස්‍යා.)] අදාසහං;

සත්තවණ්ණෙන රතනෙන, ඌනත්ථං [ඌනත්තං (සී. ස්‍යා. පී.)] පූරයාමහං.

301. ‘‘යෙ මයා කිත්තිතා සබ්බෙ, නානාවණ්ණා බහූ ජනා;

තෙසාහං චිත්තමඤ්ඤාය, තප්පයිං රතනෙනහං.

302. ‘‘වග්ගූසු භාසමානාසු, වජ්ජමානාසු භෙරිසු;

සඞ්ඛෙසු ධමයන්තෙසු, සකගෙහෙ රමාමහං.

303. ‘‘භගවා තම්හි සමයෙ, පදුමුත්තරනායකො;

වසීසතසහස්සෙහි, පරික්ඛීණාසවෙහි සො.

304. ‘‘භික්ඛූහි සහිතො වීථිං, පටිපජ්ජිත්ථ චක්ඛුමා;

ඔභාසෙන්තො දිසා සබ්බා, දීපරුක්ඛොව ජොතති.

305. ‘‘වජ්ජන්ති භෙරියො සබ්බා, ගච්ඡන්තෙ ලොකනායකෙ;

පභා නිද්ධාවතෙ තස්ස, සතරංසීව උග්ගතො.

306. ‘‘කවාටන්තරිකායාපි, පවිට්ඨෙන ච රස්මිනා;

අන්තොඝරෙසු විපුලො, ආලොකො ආසි තාවදෙ.

307. ‘‘පභං දිස්වාන බුද්ධස්ස, පාරිසජ්ජෙ අවොචහං;

නිස්සංසයං බුද්ධසෙට්ඨො, ඉමං වීථිමුපාගතො.

308. ‘‘ඛිප්පං ඔරුය්හ පාසාදා, අගමිං අන්තරාපණං;

සම්බුද්ධං අභිවාදෙත්වා, ඉදං වචනමබ්‍රවිං.

309. ‘‘‘අනුකම්පතු මෙ බුද්ධො, ජලජුත්තමනායකො;

වසීසතසහස්සෙහි, අධිවාසෙසි සො මුනි’.

310. ‘‘නිමන්තෙත්වාන සම්බුද්ධං, අභිනෙසිං සකං ඝරං;

තත්ථ අන්නෙන පානෙන, සන්තප්පෙසිං මහාමුනිං.

311. ‘‘භුත්තාවිං කාලමඤ්ඤාය, බුද්ධසෙට්ඨස්ස තාදිනො;

සතඞ්ගිකෙන තූරියෙන, බුද්ධසෙට්ඨං උපට්ඨහිං.

312. ‘‘පදුමුත්තරො ලොකවිදූ, ආහුතීනං පටිග්ගහො;

අන්තොඝරෙ නිසීදිත්වා, ඉමා ගාථා අභාසථ.

313. ‘‘‘යො මං තූරියෙහුපට්ඨාසි, අන්නපානඤ්චදාසි මෙ;

තමහං කිත්තයිස්සාමි, සුණාථ මම භාසතො.

314. ‘‘‘පහූතභක්ඛො හුත්වාන, සහිරඤ්ඤො සභොජනො;

චතුදීපෙ එකරජ්ජං, කාරයිස්සතියං නරො.

315. ‘‘‘පඤ්චසීලෙ සමාදාය, දසකම්මපථෙ තතො;

සමාදාය පවත්තෙන්තො, පරිසං සික්ඛාපයිස්සති.

316. ‘‘‘තූරියසතසහස්සානි, භෙරියො සමලඞ්කතා;

වජ්ජයිස්සන්තිමං නිච්චං, උපට්ඨානස්සිදං ඵලං.

317. ‘‘‘තිංසකප්පසහස්සානි, දෙවලොකෙ රමිස්සති;

චතුසට්ඨික්ඛත්තුං දෙවින්දො, දෙවරජ්ජං කරිස්සති.

318. ‘‘‘චතුසට්ඨික්ඛත්තුං රාජා, චක්කවත්තී භවිස්සති;

පදෙසරජ්ජං විපුලං, ගණනාතො අසඞ්ඛියං.

319. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

320. ‘‘‘උපපජ්ජති යං යොනිං, දෙවත්තං අථ මානුසං;

අනූනභොගො හුත්වාන, මනුස්සත්තං ගමිස්සති.

321. ‘‘‘අජ්ඣායකො භවිත්වාන, තිණ්ණං වෙදාන පාරගූ;

උත්තමත්ථං ගවෙසන්තො, චරිස්සති මහිං ඉමං.

322. ‘‘‘සො පච්ඡා පබ්බජිත්වාන, සුක්කමූලෙන චොදිතො;

ගොතමස්ස භගවතො, සාසනෙභිරමිස්සති.

323. ‘‘‘ආරාධයිත්වාන සම්බුද්ධං, ගොතමං සක්‍යපුඞ්ගවං;

කිලෙසෙ ඣාපයිත්වාන, අරහායං භවිස්සති’.

324. ‘‘විපිනෙ බ්‍යග්ඝරාජාව, මිගරාජාව කෙසරී;

අභීතො විහරාමජ්ජ, සක්‍යපුත්තස්ස සාසනෙ.

325. ‘‘දෙවලොකෙ මනුස්සෙ වා, දලිද්දෙ දුග්ගතිම්හි වා;

නිබ්බත්තිං මෙ න පස්සාමි, උපට්ඨානස්සිදං ඵලං.

326. ‘‘විවෙකමනුයුත්තොම්හි, උපසන්තො නිරූපධි;

නාගොව බන්ධනං ඡෙත්වා, විහරාමි අනාසවො.

327. ‘‘කිලෙසා ඣාපිතා මය්හං…පෙ… විහරාමි අනාසවො.

328. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

329. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ජතුකණ්ණිත්ථෙරො ඉමා ගාථායො අභාසිත්ථාති.

ජතුකණ්ණිත්ථෙරස්සාපදානං නවමං.