10. උදෙනත්ථෙරඅපදානං

330. ‘‘හිමවන්තස්සාවිදූරෙ, පදුමො නාම පබ්බතො;

අස්සමො සුකතො මය්හං, පණ්ණසාලා සුමාපිතා.

331. ‘‘නදියො සන්දරෙ තත්ථ, සුපතිත්ථා මනොරමා;

අච්ඡොදකා සීතජලා, සන්දරෙ නදියො සදා.

332. ‘‘පාඨීනා පාවුසා මච්ඡා, බලජා මුඤ්ජරොහිතා;

සොභෙන්තා නදියො එතෙ, වසන්ති නදියා සදා.

333. ‘‘අම්බජම්බූහි සඤ්ඡන්නා, කරෙරිතිලකා තථා;

උද්දාලකා පාටලියො, සොභෙන්ති මම අස්සමං.

334. ‘‘අඞ්කොලකා බිම්බිජාලා, මායාකාරී ච පුප්ඵිතා;

ගන්ධෙන උපවායන්තා, සොභෙන්ති මම අස්සමං.

335. ‘‘අතිමුත්තා සත්තලිකා, නාගා සාලා ච පුප්ඵිතා;

දිබ්බගන්ධං සම්පවන්තා, සොභෙන්ති මම අස්සමං.

336. ‘‘කොසම්බා සළලා නීපා, අට්ඨඞ්ගාපි ච පුප්ඵිතා [අට්ඨඞ්ගා ච සුපුප්ඵිතා (සී.), කට්ඨඞ්ගා ච සුපුප්ඵිතා (පී.)];

දිබ්බගන්ධං සම්පවන්තා, සොභෙන්ති මම අස්සමං.

337. ‘‘හරීතකා ආමලකා, අම්බජම්බුවිභීතකා;

කොලා භල්ලාතකා බිල්ලා, ඵලානි බහු අස්සමෙ.

338. ‘‘කලම්බා කන්දලී තත්ථ, පුප්ඵන්ති මම අස්සමෙ;

දිබ්බගන්ධං [දිබ්බගන්ධා (සී. ස්‍යා. පී.) එවං පරත්ථපි] සම්පවන්තා, සොභෙන්ති මම අස්සමං.

339. ‘‘අසොකපිණ්ඩිවාරී ච [අසොකපිණ්ඩී ච වරී (සී. ස්‍යා.), අසොකපිණ්ඩී ච වාරී (පී.)], නිම්බරුක්ඛා ච පුප්ඵිතා;

දිබ්බගන්ධං සම්පවන්තා, සොභෙන්ති මම අස්සමං.

340. ‘‘පුන්නාගා ගිරිපුන්නාගා, තිමිරා තත්ථ පුප්ඵිතා;

දිබ්බගන්ධං සම්පවන්තා, සොභෙන්ති මම අස්සමං.

341. ‘‘නිග්ගුණ්ඩී සිරිනිග්ගුණ්ඩී, චම්පරුක්ඛෙත්ථ පුප්ඵිතා;

දිබ්බගන්ධං සම්පවන්තා, සොභෙන්ති මම අස්සමං.

342. ‘‘අවිදූරෙ පොක්ඛරණී, චක්කවාකූපකූජිතා;

මන්දාලකෙහි සඤ්ඡන්නා, පදුමුප්පලකෙහි ච.

343. ‘‘අච්ඡොදකා සීතජලා, සුපතිත්ථා මනොරමා;

අච්ඡා ඵලිකසමානා, සොභෙන්ති මම අස්සමං.

344. ‘‘පදුමා පුප්ඵරෙ තත්ථ, පුණ්ඩරීකා ච උප්පලා;

මන්දාලකෙහි සඤ්ඡන්නා, සොභෙන්ති මම අස්සමං.

345. ‘‘පාඨීනා පාවුසා මච්ඡා, බලජා මුඤ්ජරොහිතා;

විචරන්තාව තෙ තත්ථ, සොභෙන්ති මම අස්සමං.

346. ‘‘කුම්භීලා සුසුමාරා ච, කච්ඡපා ච ගහා බහූ;

ඔගහා අජගරා ච, සොභෙන්ති මම අස්සමං.

347. ‘‘පාරෙවතා රවිහංසා, චක්කවාකා නදීචරා;

දින්දිභා සාළිකා චෙත්ථ, සොභෙන්ති මම අස්සමං.

348. ‘‘නයිතා අම්බගන්ධී ච, කෙතකා තත්ථ පුප්ඵිතා;

දිබ්බගන්ධං සම්පවන්තා, සොභෙන්ති මම අස්සමං.

349. ‘‘සීහා බ්‍යග්ඝා ච දීපී ච, අච්ඡකොකතරච්ඡකා;

අනුසඤ්චරන්තා පවනෙ, සොභෙන්ති මම අස්සමං.

350. ‘‘ජටාභාරෙන භරිතා, අජිනුත්තරවාසනා;

අනුසඤ්චරන්තා පවනෙ, සොභෙන්ති මම අස්සමං.

351. ‘‘අජිනානිධරා එතෙ, නිපකා සන්තවුත්තිනො;

අප්පාහාරාව තෙ සබ්බෙ, සොභෙන්ති මම අස්සමං.

352. ‘‘ඛාරිභාරං ගහෙත්වාන, අජ්ඣොගය්හ වනං තදා;

මූලඵලානි භුඤ්ජන්තා, වසන්ති අස්සමෙ තදා.

353. ‘‘න තෙ දාරුං ආහරන්ති, උදකං පාදධොවනං;

සබ්බෙසං ආනුභාවෙන, සයමෙවාහරීයති.

354. ‘‘චුල්ලාසීතිසහස්සානි, ඉසයෙත්ථ සමාගතා;

සබ්බෙව ඣායිනො එතෙ, උත්තමත්ථගවෙසකා.

355. ‘‘තපස්සිනො බ්‍රහ්මචාරී, චොදෙන්තා අප්පනාව තෙ;

අම්බරාවචරා සබ්බෙ, වසන්ති අස්සමෙ තදා.

356. ‘‘පඤ්චාහං සන්නිපතන්ති, එකග්ගා සන්තවුත්තිනො;

අඤ්ඤොඤ්ඤං අභිවාදෙත්වා, පක්කමන්ති දිසාමුඛා.

357. ‘‘පදුමුත්තරො නාම ජිනො, සබ්බධම්මාන පාරගූ;

තමන්ධකාරං විධමං, උප්පජ්ජි තාවදෙ ජිනො.

358. ‘‘මම අස්සමසාමන්තා, යක්ඛො ආසි මහිද්ධිකො;

සො මෙ සංසිත්ථ සම්බුද්ධං, ජලජුත්තමනායකං.

359. ‘‘එස බුද්ධො සමුප්පන්නො, පදුමුත්තරො මහාමුනි;

ඛිප්පං ගන්ත්වාන සම්බුද්ධං, පයිරූපාස මාරිස.

360. ‘‘යක්ඛස්ස වචනං සුත්වා, විප්පසන්නෙන චෙතසා;

අස්සමං සංසාමෙත්වාන, නික්ඛමිං විපිනා තදා.

361. ‘‘චෙළෙව ඩය්හමානම්හි, නික්ඛමිත්වාන අස්සමා;

එකරත්තිං නිවාසෙත්වා [නිවසිත්වා (සී.), නිවාසෙන (?)], උපගච්ඡිං විනායකං.

362. ‘‘පදුමුත්තරො ලොකවිදූ, ආහුතීනං පටිග්ගහො;

චතුසච්චං පකාසෙන්තො, දෙසෙසි අමතං පදං.

363. ‘‘සුඵුල්ලං පදුමං ගය්හ, උපගන්ත්වා මහෙසිනො;

පසන්නචිත්තො සුමනො, බුද්ධස්ස අභිරොපයිං.

364. ‘‘පූජයිත්වාන සම්බුද්ධං, ජලජුත්තමනායකං;

එකංසං අජිනං කත්වා, සන්ථවිං ලොකනායකං.

365. ‘‘යෙන ඤාණෙන සම්බුද්ධො, වසතීහ අනාසවො;

තං ඤාණං කිත්තයිස්සාමි, සුණාථ මම භාසතො.

366. ‘‘‘සංසාරසොතං ඡින්දිත්වා, තාරෙසි සබ්බපාණිනං;

තව ධම්මං සුණිත්වාන, තණ්හාසොතං තරන්ති තෙ.

367. ‘‘‘තුවං සත්ථා ච කෙතු ච, ධජො යූපො ච පාණිනං;

පරායණො පතිට්ඨා ච, දීපො ච ද්විපදුත්තම [දිපදුත්තම (සී. ස්‍යා. පී.)].

368. ‘‘‘යාවතා ගණිනො ලොකෙ, සත්ථවාහා පවුච්චරෙ;

තුවං අග්ගොසි සබ්බඤ්ඤු, තව අන්තොගධාව තෙ.

369. ‘‘‘තව ඤාණෙන සබ්බඤ්ඤු, තාරෙසි ජනතං බහුං;

තව දස්සනමාගම්ම, දුක්ඛස්සන්තං කරිස්සරෙ.

370. ‘‘‘යෙ කෙචිමෙ ගන්ධජාතා, ලොකෙ වායන්ති චක්ඛුම;

තව ගන්ධසමො නත්ථි, පුඤ්ඤක්ඛෙත්තෙ මහාමුනෙ’.

371. ‘‘‘තිරච්ඡානයොනිං නිරයං, පරිමොචෙසි [පරිමොචෙහි (ස්‍යා. ක.)] චක්ඛුම;

අසඞ්ඛතං පදං සන්තං, දෙසෙසි [දෙසෙහි (ස්‍යා. ක.)] ත්වං මහාමුනෙ’.

372. ‘‘පදුමුත්තරො ලොකවිදූ, ආහුතීනං පටිග්ගහො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

373. ‘‘‘යො මෙ ඤාණං අපූජෙසි, පසන්නො සෙහි පාණිභි;

තමහං කිත්තයිස්සාමි, සුණාථ මම භාසතො.

374. ‘‘‘තිංසකප්පසහස්සානි, දෙවලොකෙ රමිස්සති;

සහස්සක්ඛත්තුං රාජා ච, චක්කවත්තී භවිස්සති’.

375. ‘‘සුලද්ධලාභං ලද්ධොම්හි, තොසයිත්වාන සුබ්බතං;

සබ්බාසවෙ පරිඤ්ඤාය, විහරාමි අනාසවො.

376. ‘‘කිලෙසා ඣාපිතා මය්හං…පෙ… විහරාමි අනාසවො.

377. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

378. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උදෙනො ථෙරො ඉමා ගාථායො අභාසිත්ථාති.

උදෙනත්ථෙරස්සාපදානං දසමං.

මෙත්තෙය්‍යවග්ගො එකචත්තාලීසමො.