8. තොදෙය්‍යත්ථෙරඅපදානං

224. ‘‘රාජා අජිතඤ්ජයො [රාජාසි විජයො (සී. අට්ඨ.), රාජා විජිතජයො (ස්‍යා.)] නාම, කෙතුමතීපුරුත්තමෙ;

සූරො වික්කමසම්පන්නො, පුරමජ්ඣාවසී තදා.

225. ‘‘තස්ස රඤ්ඤො පමත්තස්ස, අටවියො සමුට්ඨහුං;

ඔතාරා [උත්තරා (ස්‍යා.), ඔචරා (පී.)] තුණ්ඩිකා චෙව, රට්ඨං විද්ධංසයුං තදා.

226. ‘‘පච්චන්තෙ කුපිතෙ ඛිප්පං, සන්නිපාතෙසිරින්දමො;

භටෙ චෙව බලත්ථෙ ච, අරිං නිග්ගාහයි තදා.

227. ‘‘හත්ථාරොහා අනීකට්ඨා, සූරා ච චම්මයොධිනො;

ධනුග්ගහා ච උග්ගා ච, සබ්බෙ සන්නිපතුං තදා.

228. ‘‘ආළාරිකා ච කප්පකා, න්හාපකා මාලකාරකා;

සූරා විජිතසඞ්ගාමා, සබ්බෙ සන්නිපතුං තදා.

229. ‘‘ඛග්ගහත්ථා ච පුරිසා, චාපහත්ථා ච වම්මිනො;

ලුද්දා විජිතසඞ්ගාමා, සබ්බෙ සන්නිපතුං තදා.

230. ‘‘තිධාපභින්නා මාතඞ්ගා, කුඤ්ජරා සට්ඨිහායනා;

සුවණ්ණකච්ඡාලඞ්කාරා, සබ්බෙ සන්නිපතුං තදා.

231. ‘‘ඛමා සීතස්ස උණ්හස්ස, උක්කාරුහරණස්ස ච;

යොධාජීවා කතකම්මා, සබ්බෙ සන්නිපතුං තදා.

232. ‘‘සඞ්ඛසද්දං භෙරිසද්දං, අථො උතුජ [උද්ධව (සී.), උද්දට (ස්‍යා.)] සද්දකං;

එතෙහි තෙ හාසයන්තා, සබ්බෙ සන්නිපතුං තදා.

233. ‘‘තිසූලකොන්තිමන්තෙහි [තිසූලකොන්තමන්තෙහි (සී.), කවචෙහි තොමරෙහි (සී.), ධනූහි තොමරෙහි (ස්‍යා.)] ච;

කොට්ටෙන්තානං නිපාතෙන්තා [කොට්ටයන්තා නිවත්තෙන්තා (ස්‍යා.)], සබ්බෙ සන්නිපතුං තදා.

234. ‘‘කිමෙවාතිනිසාමෙත්වා [කවචානිවාසෙත්වා (ස්‍යා.)], සරාජා අජිතඤ්ජයො [අජිනං ජිනො (සී.), අජිතඤ්ජිනො (ස්‍යා.)];

සට්ඨි පාණසහස්සානි, සූලෙ උත්තාසයිං තදා.

235. ‘‘සද්දං මානුසකාකංසු, අහො රාජා අධම්මිකො;

නිරයෙ පච්චමානස්ස, කදා අන්තො භවිස්සති.

236. ‘‘සයනෙහං තුවට්ටෙන්තො, පස්සාමි නිරයෙ තදා;

න සුපාමි දිවාරත්තිං, සූලෙන තජ්ජයන්ති මං.

237. ‘‘කිං පමාදෙන රජ්ජෙන, වාහනෙන බලෙන ච;

න තෙ පහොන්ති ධාරෙතුං, තාපයන්ති [තාසයන්ති (සී. ස්‍යා.)] මමං සදා.

238. ‘‘කිං මෙ පුත්තෙහි දාරෙහි, රජ්ජෙන සකලෙන ච;

යංනූන පබ්බජෙය්‍යාහං, ගතිමග්ගං විසොධයෙ.

239. ‘‘සට්ඨි නාගසහස්සානි, සබ්බාලඞ්කාරභූසිතෙ;

සුවණ්ණකච්ඡෙ මාතඞ්ගෙ, හෙමකප්පනවාසසෙ.

240. ‘‘ආරූළ්හෙ ගාමණීයෙහි, තොමරඞ්කුසපාණිභි;

සඞ්ගාමාවචරෙ ඨානෙ, අනපෙක්ඛො විහායහං;

සකකම්මෙන සන්තත්තො, නික්ඛමිං අනගාරියං.

241. ‘‘සට්ඨි අස්සසහස්සානි, සබ්බාලඞ්කාරභූසිතෙ;

ආජානීයෙව ජාතියා, සින්ධවෙ සීඝවාහනෙ.

242. ‘‘ආරූළ්හෙ ගාමණීයෙහි, චාපහත්ථෙහි වම්මිභි;

පහාරෙත්වාන [පහායිත්වාන (සී. පී.), ඡඩ්ඩයිත්වාන (ස්‍යා.)] තෙ සබ්බෙ, නික්ඛමිං අනගාරියං.

243. ‘‘සට්ඨි රථසහස්සානි, සබ්බාලඞ්කාරභූසිතෙ;

දීපෙ අථොපි වෙයග්ඝෙ, සන්නද්ධෙ උස්සිතද්ධජෙ;

තෙ සබ්බෙ පරිහාරෙත්වා [පරිවජ්ජෙත්වා (ස්‍යා.), පරිහායිත්වා (පී.)], පබ්බජිං අනගාරියං.

244. ‘‘සට්ඨි ධෙනුසහස්සානි, සබ්බා කංසූපධාරණා;

තායොපි [ගාවියො (ස්‍යා.), ධෙනුයො (ක.)] ඡඩ්ඩයිත්වාන, පබ්බජිං අනගාරියං.

245. ‘‘සට්ඨි ඉත්ථිසහස්සානි, සබ්බාලඞ්කාරභූසිතා;

විචිත්තවත්ථාභරණා, ආමුක්කමණිකුණ්ඩලා.

246. ‘‘අළාරපම්හා හසුලා, සුසඤ්ඤා තනුමජ්ඣිමා;

තා හිත්වා කන්දමානායො, පබ්බජිං අනගාරියං.

247. ‘‘සට්ඨි ගාමසහස්සානි, පරිපුණ්ණානි සබ්බසො;

ඡඩ්ඩයිත්වාන තං රජ්ජං, පබ්බජිං අනගාරියං.

248. ‘‘නගරා නික්ඛමිත්වාන, හිමවන්තමුපාගමිං;

භාගීරථීනදීතීරෙ, අස්සමං මාපයිං අහං.

249. ‘‘පණ්ණසාලං කරිත්වාන, අග්‍යාගාරං අකාසහං;

ආරද්ධවීරියො පහිතත්තො, වසාමි අස්සමෙ අහං.

250. ‘‘මණ්ඩපෙ රුක්ඛමූලෙ වා, සුඤ්ඤාගාරෙ ච ඣායතො;

න තු විජ්ජති තාසො මෙ, න පස්සෙ භයභෙරවං.

251. ‘‘සුමෙධො නාම සම්බුද්ධො, අග්ගො කාරුණිකො මුනි;

ඤාණාලොකෙන ජොතන්තො, ලොකෙ උප්පජ්ජි තාවදෙ.

252. ‘‘මම අස්සමසාමන්තා, යක්ඛො ආසි මහිද්ධිකො;

බුද්ධසෙට්ඨම්හි උප්පන්නෙ, ආරොචෙසි මමං තදා.

253. ‘‘බුද්ධො ලොකෙ සමුප්පන්නො, සුමෙධො නාම චක්ඛුමා;

තාරෙති ජනතං සබ්බං, තම්පි සො තාරයිස්සති.

254. ‘‘යක්ඛස්ස වචනං සුත්වා, සංවිග්ගො ආසි තාවදෙ;

බුද්ධො බුද්ධොති චින්තෙන්තො, අස්සමං පටිසාමයිං.

255. ‘‘අග්ගිදාරුඤ්ච ඡඩ්ඩෙත්වා, සංසාමෙත්වාන සන්ථතං;

අස්සමං අභිවන්දිත්වා, නික්ඛමිං විපිනා අහං.

256. ‘‘තතො චන්දනමාදාය, ගාමා ගාමං පුරා පුරං;

දෙවදෙවං ගවෙසන්තො, උපගච්ඡිං විනායකං.

257. ‘‘භගවා තම්හි සමයෙ, සුමෙධො ලොකනායකො;

චතුසච්චං පකාසෙන්තො, බොධෙති ජනතං බහුං.

258. ‘‘අඤ්ජලිං පග්ගහෙත්වාන, සීසෙ කත්වාන චන්දනං;

සම්බුද්ධං අභිවාදෙත්වා, ඉමා ගාථා අභාසහං.

259. ‘‘‘වස්සිකෙ පුප්ඵමානම්හි, සන්තිකෙ උපවායති;

ත්වං වීර ගුණගන්ධෙන, දිසා සබ්බා පවායසි.

260. ‘‘‘චම්පකෙ නාගවනිකෙ, අතිමුත්තකකෙතකෙ;

සාලෙසු පුප්ඵමානෙසු, අනුවාතං පවායති.

261. ‘‘‘තව ගන්ධං සුණිත්වාන, හිමවන්තා ඉධාගමිං;

පූජෙමි තං මහාවීර, ලොකජෙට්ඨ මහායස’.

262. ‘‘වරචන්දනෙනානුලිම්පිං, සුමෙධං ලොකනායකං;

සකං චිත්තං පසාදෙත්වා, තුණ්හී අට්ඨාසි තාවදෙ.

263. ‘‘සුමෙධො නාම භගවා, ලොකජෙට්ඨො නරාසභො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

264. ‘‘‘යො මෙ ගුණෙ පකිත්තෙසි, චන්දනඤ්ච අපූජයි;

තමහං කිත්තයිස්සාමි, සුණාථ මම භාසතො.

265. ‘‘‘ආදෙය්‍යවාක්‍යවචනො, බ්‍රහ්මා උජු පතාපවා;

පඤ්චවීසතිකප්පානි, සප්පභාසො භවිස්සති.

266. ‘‘‘ඡබ්බීසතිකප්පසතෙ, දෙවලොකෙ රමිස්සති;

සහස්සක්ඛත්තුං රාජා ච, චක්කවත්තී භවිස්සති.

267. ‘‘‘තෙත්තිංසක්ඛත්තුං දෙවින්දො, දෙවරජ්ජං කරිස්සති;

පදෙසරජ්ජං විපුලං, ගණනාතො අසඞ්ඛියං.

268. ‘‘‘තතො චුතොයං මනුජො, මනුස්සත්තං ගමිස්සති;

පුඤ්ඤකම්මෙන සංයුත්තො, බ්‍රහ්මබන්ධු භවිස්සති.

269. ‘‘‘අජ්ඣායකො මන්තධරො, තිණ්ණං වෙදාන පාරගූ;

තිලක්ඛණෙන සම්පන්නො, බාවරී නාම බ්‍රාහ්මණො.

270. ‘‘‘තස්ස සිස්සො භවිත්වාන, හෙස්සති මන්තපාරගූ;

උපගන්ත්වාන සම්බුද්ධං, ගොතමං සක්‍යපුඞ්ගවං.

271. ‘‘‘පුච්ඡිත්වා නිපුණෙ පඤ්හෙ, භාවයිත්වාන අඤ්ජසං [හාසයිත්වාන මානසං (ස්‍යා.), භාවයිත්වාන සඤ්චයං (ක.)];

සබ්බාසවෙ පරිඤ්ඤාය, විහරිස්සතිනාසවො’.

272. ‘‘තිවිධග්ගි නිබ්බුතා මය්හං, භවා සබ්බෙ සමූහතා;

සබ්බාසවෙ පරිඤ්ඤාය, විහරාමි අනාසවො.

273. ‘‘කිලෙසා ඣාපිතා මය්හං…පෙ… විහරාමි අනාසවො.

274. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

275. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තොදෙය්‍යො ථෙරො ඉමා ගාථායො අභාසිත්ථාති.

තොදෙය්‍යත්ථෙරස්සාපදානං අට්ඨමං.