7. හෙමකත්ථෙරඅපදානං

183. ‘‘පබ්භාරකූටං නිස්සාය, අනොමො නාම තාපසො;

අස්සමං සුකතං කත්වා, පණ්ණසාලෙ වසී තදා.

184. ‘‘සිද්ධං තස්ස තපො කම්මං, සිද්ධිපත්තො සකෙ බලෙ;

සකසාමඤ්ඤවික්කන්තො, ආතාපී නිපකො මුනි.

185. ‘‘විසාරදො සසමයෙ, පරවාදෙ ච කොවිදො;

පට්ඨො භූමන්තලික්ඛම්හි, උප්පාතම්හි ච කොවිදො.

186. ‘‘වීතසොකො නිරාරම්භො, අප්පාහාරො අලොලුපො;

ලාභාලාභෙන සන්තුට්ඨො, ඣායී ඣානරතො මුනි.

187. ‘‘පියදස්සී නාම සම්බුද්ධො, අග්ගො කාරුණිකො මුනි;

සත්තෙ තාරෙතුකාමො සො, කරුණාය ඵරී තදා.

188. ‘‘බොධනෙය්‍යං ජනං දිස්වා, පියදස්සී මහාමුනි;

චක්කවාළසහස්සම්පි, ගන්ත්වා ඔවදතෙ මුනි.

189. ‘‘මමුද්ධරිතුකාමො සො, මමස්සමමුපාගමි;

න දිට්ඨො මෙ ජිනො පුබ්බෙ, න සුතොපි ච කස්සචි.

190. ‘‘උප්පාතා සුපිනා මය්හං, ලක්ඛණා සුප්පකාසිතා;

පට්ඨො භූමන්තලික්ඛම්හි, නක්ඛත්තපදකොවිදො.

191. ‘‘සොහං බුද්ධස්ස සුත්වාන, තත්ථ චිත්තං පසාදයිං;

තිට්ඨන්තො [භුඤ්ජන්තො (සී. පී. ක.)] වා නිසින්නො වා, සරාමි නිච්චකාලිකං.

192. ‘‘මයි එවං සරන්තම්හි, භගවාපි අනුස්සරි;

බුද්ධං අනුස්සරන්තස්ස, පීති මෙ හොති තාවදෙ.

193. ‘‘කාලඤ්ච පුනරාගම්ම, උපෙසි මං මහාමුනි;

සම්පත්තෙපි න ජානාමි, අයං බුද්ධො මහාමුනි.

194. ‘‘අනුකම්පකො කාරුණිකො, පියදස්සී මහාමුනි;

සඤ්ජානාපෙසි අත්තානං, ‘අහං බුද්ධො සදෙවකෙ’.

195. ‘‘සඤ්ජානිත්වාන සම්බුද්ධං, පියදස්සිං මහාමුනිං;

සකං චිත්තං පසාදෙත්වා, ඉදං වචනමබ්‍රවිං.

196. ‘‘‘අඤ්ඤෙ [සබ්බෙ (ස්‍යා.)] පීඨෙ ච පල්ලඞ්කෙ, ආසන්දීසු නිසීදරෙ;

තුවම්පි සබ්බදස්සාවී, නිසීද රතනාසනෙ’.

197. ‘‘සබ්බරතනමයං පීඨං, නිම්මිනිත්වාන තාවදෙ;

පියදස්සිස්ස මුනිනො, අදාසිං ඉද්ධිනිම්මිතං.

198. ‘‘රතනෙ ච නිසින්නස්ස, පීඨකෙ ඉද්ධිනිම්මිතෙ;

කුම්භමත්තං ජම්බුඵලං, අදාසිං තාවදෙ අහං.

199. ‘‘මම හාසං ජනෙත්වාන, පරිභුඤ්ජි මහාමුනි;

තදා චිත්තං පසාදෙත්වා, සත්ථාරං අභිවාදයිං.

200. ‘‘පියදස්සී තු භගවා, ලොකජෙට්ඨො නරාසභො;

රතනාසනමාසීනො, ඉමා ගාථා අභාසථ.

201. ‘‘‘යො මෙ රතනමයං පීඨං, අමතඤ්ච ඵලං අදා;

තමහං කිත්තයිස්සාමි, සුණාථ මම භාසතො.

202. ‘‘‘සත්තසත්තති කප්පානි, දෙවලොකෙ රමිස්සති;

පඤ්චසත්තතික්ඛත්තුඤ්ච, චක්කවත්තී භවිස්සති.

203. ‘‘‘ද්වත්තිංසක්ඛත්තුං දෙවින්දො, දෙවරජ්ජං කරිස්සති;

පදෙසරජ්ජං විපුලං, ගණනාතො අසඞ්ඛියං.

204. ‘‘‘සොණ්ණමයං රූපිමයං, පල්ලඞ්කං සුකතං බහුං;

ලොහිතඞ්ගමයඤ්චෙව, ලච්ඡති රතනාමයං.

205. ‘‘‘චඞ්කමන්තම්පි මනුජං, පුඤ්ඤකම්මසමඞ්ගිනං;

පල්ලඞ්කානි අනෙකානි, පරිවාරෙස්සරෙ තදා.

206. ‘‘‘කූටාගාරා ච පාසාදා, සයනඤ්ච මහාරහං;

ඉමස්ස චිත්තමඤ්ඤාය, නිබ්බත්තිස්සන්ති තාවදෙ.

207. ‘‘‘සට්ඨි නාගසහස්සානි, සබ්බාලඞ්කාරභූසිතා;

සුවණ්ණකච්ඡා මාතඞ්ගා, හෙමකප්පනවාසසා [හෙමකප්පනිවාසනා (සී. ස්‍යා.), හෙමකප්පනිවාසසා (ක.)].

208. ‘‘‘ආරූළ්හා ගාමණීයෙහි, තොමරඞ්කුසපාණිභි;

ඉමං පරිචරිස්සන්ති, රත්නපීඨස්සිදං ඵලං.

209. ‘‘‘සට්ඨි අස්සසහස්සානි, සබ්බාලඞ්කාරභූසිතා;

ආජානීයාව ජාතියා, සින්ධවා සීඝවාහිනො.

210. ‘‘‘ආරූළ්හා ගාමණීයෙහි, ඉල්ලියාචාපධාරිභි;

තෙපිමං පරිචරිස්සන්ති, රත්නපීඨස්සිදං ඵලං.

211. ‘‘‘සට්ඨි රථසහස්සානි, සබ්බාලඞ්කාරභූසිතා;

දීපා අථොපි වෙයග්ඝා, සන්නද්ධා උස්සිතද්ධජා.

212. ‘‘‘ආරූළ්හා ගාමණීයෙහි, චාපහත්ථෙහි වම්මිභි;

පරිවාරෙස්සන්තිමං නිච්චං, රත්නපීඨස්සිදං ඵලං.

213. ‘‘‘සට්ඨි ධෙනුසහස්සානි, දොහඤ්ඤා පුඞ්ගවූසභෙ;

වච්ඡකෙ ජනයිස්සන්ති, රත්නපීඨස්සිදං ඵලං.

214. ‘‘‘සොළසිත්ථිසහස්සානි, සබ්බාලඞ්කාරභූසිතා;

විචිත්තවත්ථාභරණා, ආමුක්කමණිකුණ්ඩලා.

215. ‘‘‘අළාරපම්හා හසුලා, සුසඤ්ඤා තනුමජ්ඣිමා;

පරිවාරෙස්සන්තිමං නිච්චං, රත්නපීඨස්සිදං ඵලං.

216. ‘‘‘අට්ඨාරසෙ කප්පසතෙ, ගොතමො නාම චක්ඛුමා;

තමන්ධකාරං විධමිත්වා, බුද්ධො ලොකෙ භවිස්සති.

217. ‘‘‘තස්ස දස්සනමාගම්ම, පබ්බජිස්සතිකිඤ්චනො;

තොසයිත්වාන සත්ථාරං, සාසනෙභිරමිස්සති.

218. ‘‘‘තස්ස ධම්මං සුණිත්වාන, කිලෙසෙ ඝාතයිස්සති;

සබ්බාසවෙ පරිඤ්ඤාය, නිබ්බායිස්සතිනාසවො’.

219. ‘‘වීරියං මෙ ධුරධොරය්හං, යොගක්ඛෙමාධිවාහනං;

උත්තමත්ථං පත්ථයන්තො, සාසනෙ විහරාමහං.

220. ‘‘ඉදං පච්ඡිමකං මය්හං, චරිමො වත්තතෙ භවො;

සබ්බාසවා පරික්ඛීණා, නත්ථි දානි පුනබ්භවො.

221. ‘‘කිලෙසා ඣාපිතා මය්හං…පෙ… විහරාමි අනාසවො.

222. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

223. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා හෙමකො ථෙරො ඉමා ගාථායො අභාසිත්ථාති;

හෙමකත්ථෙරස්සාපදානං සත්තමං.

සත්තරසමං භාණවාරං.