6. නන්දකත්ථෙරඅපදානං

161. ‘‘මිගලුද්දො පුරෙ ආසිං, අරඤ්ඤෙ කානනෙ අහං;

පසදං මිගමෙසන්තො, සයම්භුං අද්දසං අහං [ජිනං (සී.)].

162. ‘‘අනුරුද්ධො නාම සම්බුද්ධො, සයම්භූ අපරාජිතො;

විවෙකකාමො සො ධීරො, වනමජ්ඣොගහී තදා.

163. ‘‘චතුදණ්ඩෙ ගහෙත්වාන, චතුට්ඨානෙ ඨපෙසහං;

මණ්ඩපං සුකතං කත්වා, පද්මපුප්ඵෙහි ඡාදයිං.

164. ‘‘මණ්ඩපං ඡාදයිත්වාන, සයම්භුං අභිවාදයිං;

ධනුං තත්ථෙව නික්ඛිප්ප, පබ්බජිං අනගාරියං.

165. ‘‘නචිරං පබ්බජිතස්ස [පබ්බජිතස්ස අචිරං (සී.)], බ්‍යාධි මෙ උදපජ්ජථ;

පුබ්බකම්මං සරිත්වාන, තත්ථ කාලඞ්කතො අහං.

166. ‘‘පුබ්බකම්මෙන සංයුත්තො, තුසිතං අගමාසහං;

තත්ථ සොණ්ණමයං බ්‍යම්හං, නිබ්බත්තති යදිච්ඡකං.

167. ‘‘සහස්සයුත්තං හයවාහිං, දිබ්බයානමධිට්ඨිතො;

ආරුහිත්වාන තං යානං, ගච්ඡාමහං යදිච්ඡකං.

168. ‘‘තතො මෙ නිය්‍යමානස්ස, දෙවභූතස්ස මෙ සතො;

සමන්තා යොජනසතං, මණ්ඩපො මෙ ධරීයති.

169. ‘‘සයනෙහං තුවට්ටාමි, අච්ඡන්නෙ [අච්චන්තං (සී.), අච්චන්ත (පී.)] පුප්ඵසන්ථතෙ;

අන්තලික්ඛා ච පදුමා, වස්සන්තෙ නිච්චකාලිකං.

170. ‘‘මරීචිකෙ ඵන්දමානෙ, තප්පමානෙ ච ආතපෙ;

න මං තාපෙති ආතාපො, මණ්ඩපස්ස ඉදං ඵලං.

171. ‘‘දුග්ගතිං සමතික්කන්තො, අපායා පිහිතා මම;

මණ්ඩපෙ රුක්ඛමූලෙ වා, සන්තාපො මෙ න විජ්ජති.

172. ‘‘මහීසඤ්ඤං අධිට්ඨාය, ලොණතොයං තරාමහං;

තස්ස මෙ සුකතං කම්මං, බුද්ධපූජායිදං ඵලං.

173. ‘‘අපථම්පි [අබ්භම්හි (ස්‍යා. ක.)] පථං කත්වා, ගච්ඡාමි අනිලඤ්ජසෙ;

අහො මෙ සුකතං කම්මං, බුද්ධපූජායිදං ඵලං.

174. ‘‘පුබ්බෙනිවාසං ජානාමි, දිබ්බචක්ඛු විසොධිතං;

ආසවා මෙ පරික්ඛීණා, බුද්ධපූජායිදං ඵලං.

175. ‘‘ජහිතා පුරිමා ජාති, බුද්ධස්ස ඔරසො අහං;

දායාදොම්හි ච සද්ධම්මෙ, බුද්ධපූජායිදං ඵලං.

176. ‘‘ආරාධිතොම්හි සුගතං, ගොතමං සක්‍යපුඞ්ගවං;

ධම්මධජො ධම්මදායාදො [ධම්මාදාසො (ක.)], බුද්ධපූජායිදං ඵලං.

177. ‘‘උපට්ඨිත්වාන සම්බුද්ධං, ගොතමං සක්‍යපුඞ්ගවං;

පාරඞ්ගමනියං මග්ගං, අපුච්ඡිං ලොකනායකං.

178. ‘‘අජ්ඣිට්ඨො කථයී බුද්ධො, ගම්භීරං නිපුණං පදං;

තස්සාහං ධම්මං සුත්වාන, පත්තොම්හි ආසවක්ඛයං.

179. ‘‘අහො මෙ සුකතං කම්මං, පරිමුත්තොම්හි ජාතියා;

සබ්බාසවපරික්ඛීණො, නත්ථි දානි පුනබ්භවො.

180. ‘‘කිලෙසා ඣාපිතා මය්හං…පෙ… විහරාමි අනාසවො.

181. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

182. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නන්දකො ථෙරො ඉමා ගාථායො අභාසිත්ථාති.

නන්දකත්ථෙරස්සාපදානං ඡට්ඨං.