5. උපසීවත්ථෙරඅපදානං

100. ‘‘හිමවන්තස්සාවිදූරෙ, අනොමො නාම පබ්බතො;

අස්සමො සුකතො මය්හං, පණ්ණසාලා සුමාපිතා.

101. ‘‘නදී ච සන්දතී තත්ථ, සුපතිත්ථා මනොරමා;

අනූපතිත්ථෙ ජායන්ති, පදුමුප්පලකා බහූ.

102. ‘‘පාඨීනා පාවුසා මච්ඡා, බලජා මුඤ්ජරොහිතා;

මච්ඡකච්ඡපසඤ්ඡන්නා [මච්ඡකච්ඡපසම්පන්නා (?)], නදිකා සන්දතෙ තදා.

103. ‘‘තිමිරා පුප්ඵිතා තත්ථ, අසොකා ඛුද්දමාලකා;

පුන්නාගා ගිරිපුන්නාගා, සම්පවන්ති මමස්සමං.

104. ‘‘කුටජා පුප්ඵිතා තත්ථ, තිණසූලවනානි ච;

සාලා ච සළලා තත්ථ, චම්පකා පුප්ඵිතා බහූ.

105. ‘‘අජ්ජුනා අතිමුත්තා ච, මහානාමා ච පුප්ඵිතා;

අසනා මධුගන්ධී ච, පුප්ඵිතා තෙ මමස්සමෙ.

106. ‘‘උද්දාලකා පාටලිකා, යූථිකා ච පියඞ්ගුකා;

බිම්බිජාලකසඤ්ඡන්නා, සමන්තා අඩ්ඪයොජනං.

107. ‘‘මාතග්ගාරා [මාතඞ්ගවා (සී.), මාතකරා (ස්‍යා.), මාතඞ්ගා වා (පී.)] සත්තලියො, පාටලී සින්දුවාරකා;

අඞ්කොලකා බහූ තත්ථ, තාලකුට්ඨි [තාලකූටා (සී. ස්‍යා.), තාලකුට්ඨා (පී.)] ච පුප්ඵිතා;

සෙලෙය්‍යකා බහූ තත්ථ, පුප්ඵිතා මම අස්සමෙ.

108. ‘‘එතෙසු පුප්ඵජාතෙසු [පුප්ඵමානෙසු (සී. පී.)], සොභන්ති පාදපා බහූ;

සමන්තා තෙන ගන්ධෙන, වායතෙ මම අස්සමො.

109. ‘‘හරීතකා ආමලකා, අම්බජම්බුවිභීතකා [විභිටකා (සී.)];

කොලා භල්ලාතකා බිල්ලා, ඵාරුසකඵලානි ච.

110. ‘‘තින්දුකා ච පියාලා ච, මධුකා කාසුමාරයො;

ලබුජා පනසා තත්ථ, කදලී බදරීඵලා [මන්දරිඵලා (ක.), චන්දරීඵලා (ස්‍යා. පී.)].

111. ‘‘අම්බාටකා බහූ තත්ථ, වල්ලිකාරඵලානි ච;

බීජපූරසපාරියො [චිරසංරසපාකා ච (ස්‍යා.), විටපා ච සපාකා ච (පී), විදපරපදාදයො (ක.)], ඵලිතා මම අස්සමෙ.

112. ‘‘ආළකා ඉසිමුග්ගා ච, තතො මොදඵලා බහූ;

අවටා පක්කභරිතා [සක්කරාරිතා (ක.)], පිලක්ඛුදුම්බරානි ච.

113. ‘‘පිප්ඵිලී මරීචා තත්ථ, නිග්‍රොධා ච කපිත්ථනා;

උදුම්බරකා බහවො, කණ්ඩුපණ්ණා ච හරියො [කණ්ඩපක්කා ච පාරියො (සී. ස්‍යා. පී.)].

114. ‘‘එතෙ චඤ්ඤෙ ච බහවො, ඵලිතා අස්සමෙ මම;

පුප්ඵරුක්ඛාපි බහවො, පුප්ඵිතා මම අස්සමෙ.

115. ‘‘ආලුවා ච කළම්බා ච, බිළාලී තක්කලානි ච;

ආලකා තාලකා චෙව, විජ්ජන්ති අස්සමෙ මම.

116. ‘‘අස්සමස්සාවිදූරෙ මෙ, මහාජාතස්සරො අහු;

අච්ඡොදකො සීතජලො, සුපතිත්ථො මනොරමො.

117. ‘‘පදුමුප්පලා බහූ තත්ථ, පුණ්ඩරීකසමායුතා;

මන්දාලකෙහි සඤ්ඡන්නා, නානාගන්ධසමෙරිතා.

118. ‘‘ගබ්භං ගණ්හන්ති පදුමා, අඤ්ඤෙ පුප්ඵන්ති කෙසරී;

ඔපුප්ඵපත්තා තිට්ඨන්ති, පදුමාකණ්ණිකා බහූ.

119. ‘‘මධු භිසම්හා සවති, ඛීරං සප්පි මුලාළිභි;

සමන්තා තෙන ගන්ධෙන, නානාගන්ධසමෙරිතා.

120. ‘‘කුමුදා අම්බගන්ධි ච, නයිතා දිස්සරෙ බහූ;

ජාතස්සරස්සානුකූලං, කෙතකා පුප්ඵිතා බහූ.

121. ‘‘සුඵුල්ලා බන්ධුජීවා ච, සෙතවාරී සුගන්ධිකා;

කුම්භිලා සුසුමාරා ච, ගහකා තත්ථ ජායරෙ.

122. ‘‘උග්ගාහකා අජගරා, තත්ථ ජාතස්සරෙ බහූ;

පාඨීනා පාවුසා මච්ඡා, බලජා මුඤ්ජරොහිතා.

123. ‘‘මච්ඡකච්ඡපසඤ්ඡන්නා, අථො පපටකාහි [පම්පටකෙහි (සී.), සපටකෙහි (ස්‍යා.), පප්පටකෙහි (පී)] ච;

පාරෙවතා රවිහංසා, කුකුත්ථා [කුක්කුත්ථා (ස්‍යා. ක.), කුත්ථකා (පී.)] ච නදීචරා.

124. ‘‘දින්දිභා [ටිට්ටිභා (පී.)] චක්කවාකා ච, පම්පකා ජීවජීවකා;

කලන්දකා උක්කුසා ච, සෙනකා උද්ධරා බහූ.

125. ‘‘කොට්ඨකා සුකපොතා ච, තුලියා චමරා බහූ;

කාරෙනියො [කාසෙනියා (ස්‍යා.)] ච තිලකා [කිලකා (ක.)], උපජීවන්ති තං සරං.

126. ‘‘සීහා බ්‍යග්ඝා ච දීපී ච, අච්ඡකොකතරච්ඡකා;

වානරා කින්නරා චෙව, දිස්සන්ති මම අස්සමෙ.

127. ‘‘තානි ගන්ධානි ඝායන්තො, භක්ඛයන්තො ඵලානහං;

ගන්ධොදකං පිවන්තො ච, වසාමි මම අස්සමෙ.

128. ‘‘එණීමිගා වරාහා ච, පසදා ඛුද්දරූපකා;

අග්ගිකා ජොතිකා චෙව, වසන්ති මම අස්සමෙ.

129. ‘‘හංසා කොඤ්චා මයූරා ච, සාලිකාපි ච කොකිලා;

මජ්ජාරිකා [මඤ්ජරිකා (සී. ස්‍යා. පී.)] බහූ තත්ථ, කොසිකා පොට්ඨසීසකා.

130. ‘‘පිසාචා දානවා චෙව, කුම්භණ්ඩා රක්ඛසා බහූ;

ගරුළා පන්නගා චෙව, වසන්ති මම අස්සමෙ.

131. ‘‘මහානුභාවා ඉසයො, සන්තචිත්තා සමාහිතා;

කමණ්ඩලුධරා සබ්බෙ, අජිනුත්තරවාසනා;

ජටාභාරභරිතාව [තෙ ජටාභාරභරිතා (සී. පී.), ජටාභාරභරිතා ච (ස්‍යා.)], වසන්ති මම අස්සමෙ.

132. ‘‘යුගමත්තඤ්ච පෙක්ඛන්තා, නිපකා සන්තවුත්තිනො;

ලාභාලාභෙන සන්තුට්ඨා, වසන්ති මම අස්සමෙ.

133. ‘‘වාකචීරං ධුනන්තා තෙ, ඵොටෙන්තාජිනචම්මකං;

සබලෙහි උපත්ථද්ධා, ගච්ඡන්ති අම්බරෙ තදා.

134. ‘‘න තෙ දකං ආහරන්ති, කට්ඨං වා අග්ගිදාරුකං;

සයඤ්ච උපසම්පන්නා, පාටිහීරස්සිදං ඵලං.

135. ‘‘ලොහදොණිං ගහෙත්වාන, වනමජ්ඣෙ වසන්ති තෙ;

කුඤ්ජරාව මහානාගා, අසම්භීතාව කෙසරී.

136. ‘‘අඤ්ඤෙ ගච්ඡන්ති ගොයානං, අඤ්ඤෙ පුබ්බවිදෙහකං [පුබ්බවිදෙහනං (ස්‍යා. පී. ක.)];

අඤ්ඤෙ ච උත්තරකුරුං, සකං බලමවස්සිතා [බලමපස්සිතා (ස්‍යා. පී. ක.)].

137. ‘‘තතො පිණ්ඩං ආහරිත්වා, පරිභුඤ්ජන්ති එකතො;

සබ්බෙසං පක්කමන්තානං, උග්ගතෙජාන තාදිනං.

138. ‘‘අජිනචම්මසද්දෙන, වනං සද්දායතෙ තදා;

එදිසා තෙ මහාවීර, සිස්සා උග්ගතපා මම.

139. ‘‘පරිවුතො අහං තෙහි, වසාමි මම අස්සමෙ;

තොසිතා සකකම්මෙන, විනීතාපි සමාගතා.

140. ‘‘ආරාධයිංසු මං එතෙ, සකකම්මාභිලාසිනො;

සීලවන්තො ච නිපකා, අප්පමඤ්ඤාසු කොවිදා.

141. ‘‘පදුමුත්තරො ලොකවිදූ, ආහුතීනං පටිග්ගහො;

සමයං සංවිදිත්වාන, උපගච්ඡි විනායකො.

142. ‘‘උපගන්ත්වාන සම්බුද්ධො, ආතාපී නිපකො මුනි;

පත්තං පග්ගය්හ සම්බුද්ධො, භික්ඛාය මමුපාගමි.

143. ‘‘උපාගතං මහාවීරං, ජලජුත්තමනායකං;

තිණසන්ථරං [තිණත්ථරං (ස්‍යා.), තිණත්ථතං (ක.)] පඤ්ඤාපෙත්වා, සාලපුප්ඵෙහි ඔකිරිං.

144. ‘‘නිසාදෙත්වාන [නිසීදෙත්වාන (සී.), නිසීදිත්වාන (ස්‍යා. පී.)] සම්බුද්ධං, හට්ඨො සංවිග්ගමානසො;

ඛිප්පං පබ්බතමාරුය්හ, අගළුං [අගරුං (සී.)] අග්ගහිං අහං.

145. ‘‘කුම්භමත්තං ගහෙත්වාන, පනසං දෙවගන්ධිකං;

ඛන්ධෙ ආරොපයිත්වාන, උපගච්ඡිං විනායකං.

146. ‘‘ඵලං බුද්ධස්ස දත්වාන, අගළුං අනුලිම්පහං;

පසන්නචිත්තො සුමනො, බුද්ධසෙට්ඨං අවන්දිහං.

147. ‘‘පදුමුත්තරො ලොකවිදූ, ආහුතීනං පටිග්ගහො;

ඉසිමජ්ඣෙ නිසීදිත්වා, ඉමා ගාථා අභාසථ.

148. ‘‘‘යො මෙ ඵලඤ්ච අගළුං, ආසනඤ්ච අදාසි මෙ;

තමහං කිත්තයිස්සාමි, සුණාථ මම භාසතො.

149. ‘‘‘ගාමෙ වා යදි වාරඤ්ඤෙ, පබ්භාරෙසු ගුහාසු වා;

ඉමස්ස චිත්තමඤ්ඤාය, නිබ්බත්තිස්සති භොජනං.

150. ‘‘‘දෙවලොකෙ මනුස්සෙ වා, උපපන්නො අයං නරො;

භොජනෙහි ච වත්ථෙහි, පරිසං තප්පයිස්සති.

151. ‘‘‘උපපජ්ජති යං යොනිං, දෙවත්තං අථ මානුසං;

අක්ඛොභභොගො හුත්වාන, සංසරිස්සතියං නරො.

152. ‘‘‘තිංසකප්පසහස්සානි, දෙවලොකෙ රමිස්සති;

සහස්සක්ඛත්තුං රාජා ච, චක්කවත්තී භවිස්සති.

153. ‘‘‘එකසත්තතික්ඛත්තුඤ්ච, දෙවරජ්ජං කරිස්සති;

පදෙසරජ්ජං විපුලං, ගණනාතො අසඞ්ඛියං.

154. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

155. ‘‘‘තස්ස ධම්මෙසු දායාදො, ඔරසො ධම්මනිම්මිතො [(උපසීවො නාම නාමෙන, හෙස්සති සත්ථු සාවකො) (ස්‍යා.)];

සබ්බාසවෙ පරිඤ්ඤාය, විහරිස්සතිනාසවො’.

156. ‘‘සුලද්ධලාභො ලද්ධො මෙ, යොහං අද්දක්ඛිං නායකං;

තිස්සො විජ්ජා අනුප්පත්තා, කතං බුද්ධස්ස සාසනං.

157. ‘‘ගාමෙ වා යදි වාරඤ්ඤෙ, පබ්භාරෙසු ගුහාසු වා;

මම සඞ්කප්පමඤ්ඤාය, භොජනං හොති මෙ සදා.

158. ‘‘කිලෙසා ඣාපිතා මය්හං…පෙ… විහරාමි අනාසවො.

159. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

160. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උපසීවො [උපසිවො (ක.)] ථෙරො ඉමා ගාථායො අභාසිත්ථාති.

උපසීවත්ථෙරස්සාපදානං පඤ්චමං.