4. ධොතකත්ථෙරඅපදානං

72. ‘‘ගඞ්ගා භාගීරථී නාම, හිමවන්තා පභාවිතා [හිමවන්තප්පභාවිතා (සී.)];

හංසවතියා ද්වාරෙන, අනුසන්දති තාවදෙ.

73. ‘‘සොභිතො නාම ආරාමො, ගඞ්ගාකූලෙ සුමාපිතො;

තත්ථ පදුමුත්තරො බුද්ධො, වසතෙ ලොකනායකො.

74. ‘‘තිදසෙහි යථා ඉන්දො, මනුජෙහි පුරක්ඛතො;

නිසීදි තත්ථ භගවා, අසම්භීතොව කෙසරී.

75. ‘‘නගරෙ හංසවතියා, වසාමි [අහොසිං (ස්‍යා.)] බ්‍රාහ්මණො අහං;

ඡළඞ්ගො නාම නාමෙන, එවංනාමො මහාමුනි.

76. ‘‘අට්ඨාරස සිස්සසතා, පරිවාරෙන්ති මං තදා;

තෙහි සිස්සෙහි සමිතො, ගඞ්ගාතීරං උපාගමිං.

77. ‘‘තත්ථද්දසාසිං සමණෙ, නික්කුහෙ ධොතපාපකෙ;

භාගීරථිං තරන්තෙහං [තරන්තොහං (ස්‍යා. පී.)], එවං චින්තෙසි තාවදෙ.

78. ‘‘සායං පාතං [සායපාතං (පී.)] තරන්තාමෙ, බුද්ධපුත්තා මහායසා;

විහෙසයන්ති අත්තානං, තෙසං අත්තා විහඤ්ඤති.

79. ‘‘සදෙවකස්ස ලොකස්ස, බුද්ධො අග්ගො පවුච්චති;

නත්ථි මෙ දක්ඛිණෙ කාරං, ගතිමග්ගවිසොධනං.

80. ‘‘යංනූන බුද්ධසෙට්ඨස්ස, සෙතුං ගඞ්ගාය කාරයෙ;

කාරාපෙත්වා ඉමං කම්මං [සෙතුං (ස්‍යා.)], සන්තරාමි ඉමං භවං.

81. ‘‘සතසහස්සං දත්වාන, සෙතුං කාරාපයිං අහං;

සද්දහන්තො කතං කාරං, විපුලං මෙ භවිස්සති.

82. ‘‘කාරාපෙත්වාන තං සෙතුං, උපෙසිං ලොකනායකං;

සිරසි අඤ්ජලිං කත්වා, ඉමං වචනමබ්‍රවිං.

83. ‘‘‘සතසහස්සස්ස වයං [වයං සතසහස්සංව (ක.)], දත්වා [කත්වා (සී. පී.)] කාරාපිතො මයා;

තවත්ථාය මහාසෙතු, පටිග්ගණ්හ මහාමුනෙ.

84. ‘‘‘පදුමුත්තරො ලොකවිදූ, ආහුතීනං පටිග්ගහො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

85. ‘‘‘යො මෙ සෙතුං අකාරෙසි, පසන්නො සෙහි පාණිභි;

තමහං කිත්තයිස්සාමි, සුණාථ මම භාසතො.

(සෙතුදානආනිසංසො)

86. ‘‘‘දරිතො පබ්බතතො වා, රුක්ඛතො පතිතොපියං;

චුතොපි ලච්ඡතී ඨානං, සෙතුදානස්සිදං ඵලං.

87. ‘‘‘විරූළ්හමූලසන්තානං, නිග්‍රොධමිව මාලුතො;

අමිත්තා නප්පසහන්ති, සෙතුදානස්සිදං ඵලං.

88. ‘‘‘නාස්ස චොරා පසහන්ති, නාතිමඤ්ඤන්ති ඛත්තියා;

සබ්බෙ තරිස්සතාමිත්තෙ, සෙතුදානස්සිදං ඵලං.

89. ‘‘‘අබ්භොකාසගතං සන්තං, කඨිනාතපතාපිතං;

පුඤ්ඤකම්මෙන සංයුත්තං, න භවිස්සති වෙදනා [තාවදෙ (ක.)].

90. ‘‘‘දෙවලොකෙ මනුස්සෙ වා, හත්ථියානං සුනිම්මිතං;

තස්ස සඞ්කප්පමඤ්ඤාය, නිබ්බත්තිස්සති තාවදෙ.

91. ‘‘‘සහස්සස්සා වාතජවා, සින්ධවා සීඝවාහනා;

සායං පාතං උපෙස්සන්ති, සෙතුදානස්සිදං ඵලං.

92. ‘‘‘ආගන්ත්වාන මනුස්සත්තං, සුඛිතොයං භවිස්සති;

වෙහාසං [ඉහාපි (සී. ස්‍යා. පී.)] මනුජස්සෙව, හත්ථියානං භවිස්සති.

93. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

94. ‘‘‘තස්ස ධම්මෙසු දායාදො, ඔරසො ධම්මනිම්මිතො;

සබ්බාසවෙ පරිඤ්ඤාය, නිබ්බායිස්සතිනාසවො’.

95. ‘‘අහො මෙ සුකතං කම්මං, ජලජුත්තමනාමකෙ;

තත්ථ කාරං කරිත්වාන, පත්තොහං ආසවක්ඛයං.

96. ‘‘පධානං පහිතත්තොම්හි, උපසන්තො නිරූපධි;

නාගොව බන්ධනං ඡෙත්වා, විහරාමි අනාසවො.

97. ‘‘කිලෙසා ඣාපිතා මය්හං…පෙ… විහරාමි අනාසවො.

98. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

99. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ධොතකො ථෙරො ඉමා ගාථායො අභාසිත්ථාති.

ධොතකත්ථෙරස්සාපදානං චතුත්ථං.