9. සබ්බදායකත්ථෙරඅපදානං

456. ‘‘මහාසමුද්දං ඔගය්හ, භවනං මෙ සුනිම්මිතං;

සුනිම්මිතා පොක්ඛරණී, චක්කවාකපකූජිතා.

457. ‘‘මන්දාලකෙහි සඤ්ඡන්නා, පදුමුප්පලකෙහි ච;

නදී ච සන්දතෙ තත්ථ, සුපතිත්ථා මනොරමා.

458. ‘‘මච්ඡකච්ඡපසඤ්ඡන්නා, නානාදිජසමොත්ථතා;

මයූරකොඤ්චාභිරුදා, කොකිලාදීහි වග්ගුහි.

459. ‘‘පාරෙවතා රවිහංසා ච, චක්කවාකා නදීචරා;

දින්දිභා සාළිකා චෙත්ථ, පම්මකා [පම්පකා (සී.), චප්පකා (ස්‍යා.)] ජීවජීවකා.

460. ‘‘හංසා කොඤ්චාපි නදිතා [කොඤ්චාභිනදිතා (සී. ස්‍යා.)], කොසියා පිඞ්ගලා බහූ;

සත්තරතනසම්පන්නා, මණිමුත්තිකවාලුකා.

461. ‘‘සබ්බසොණ්ණමයා රුක්ඛා, නානාගන්ධසමෙරිතා;

උජ්ජොතෙන්ති දිවාරත්තිං, භවනං සබ්බකාලිකං.

462. ‘‘සට්ඨි තූරියසහස්සානි, සායං පාතො පවජ්ජරෙ;

සොළසිත්ථිසහස්සානි, පරිවාරෙන්ති මං සදා.

463. ‘‘අභිනික්ඛම්ම භවනා, සුමෙධං ලොකනායකං;

පසන්නචිත්තො සුමනො, වන්දයිං තං මහායසං.

464. ‘‘සම්බුද්ධං අභිවාදෙත්වා, සසඞ්ඝං තං නිමන්තයිං;

අධිවාසෙසි සො ධීරො, සුමෙධො ලොකනායකො.

465. ‘‘මම ධම්මකථං කත්වා, උය්‍යොජෙසි මහාමුනි;

සම්බුද්ධං අභිවාදෙත්වා, භවනං මෙ උපාගමිං.

466. ‘‘ආමන්තයිං පරිජනං, සබ්බෙ සන්නිපතාථ [සන්නිපතත්ථ (ක.)] වො;

පුබ්බණ්හසමයං බුද්ධො, භවනං ආගමිස්සති.

467. ‘‘ලාභා අම්හං සුලද්ධං නො, යෙ වසාම තවන්තිකෙ;

මයම්පි බුද්ධසෙට්ඨස්ස, පූජං කස්සාම සත්ථුනො.

468. ‘‘අන්නපනං පට්ඨපෙත්වා, කාලං ආරොචයිං අහං;

වසීසතසහස්සෙහි, උපෙසි ලොකනායකො.

469. ‘‘පඤ්චඞ්ගිකෙහි තූරියෙහි, පච්චුග්ගමනමකාසහං;

සබ්බසොණ්ණමයෙ පීඨෙ, නිසීදි පුරිසුත්තමො.

470. ‘‘උපරිච්ඡදනං ආසි, සබ්බසොණ්ණමයං තදා;

බීජනියො පවායන්ති, භික්ඛුසඞ්ඝස්ස අන්තරෙ.

471. ‘‘පහූතෙනන්නපානෙන, භික්ඛුසඞ්ඝමතප්පයිං;

පච්චෙකදුස්සයුගළෙ, භික්ඛුසඞ්ඝස්සදාසහං.

472. ‘‘යං වදන්ති සුමෙධොති, ලොකාහුතිපටිග්ගහං;

භික්ඛුසඞ්ඝෙ නිසීදිත්වා, ඉමා ගාථා අභාසථ.

473. ‘‘යො මෙ අන්නෙන පානෙන, සබ්බෙ ඉමෙ ච තප්පයිං;

තමහං කිත්තයිස්සාමි, සුණාථ මම භාසතො.

474. ‘‘අට්ඨාරසෙ කප්පසතෙ, දෙවලොකෙ රමිස්සති;

සහස්සක්ඛත්තුං රාජා ච, චක්කවත්තී භවිස්සති.

475. ‘‘උප්පජ්ජති [උපගච්ඡති (සී.)] යං යොනිං, දෙවත්තං අථ මානුසං;

සබ්බදා සබ්බසොවණ්ණං, ඡදනං ධාරයිස්සති.

476. ‘‘තිංසකප්පසහස්සම්හි, ඔක්කාකකුසලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

477. ‘‘තස්ස ධම්මෙසු දායාදො, ඔරසො ධම්මනිම්මිතො;

සබ්බාසවෙ පරිඤ්ඤාය, නිබ්බායිස්සතිනාසවො.

478. ‘‘‘භික්ඛුසඞ්ඝෙ නිසීදිත්වා, සීහනාදං නදිස්සති;

චිතකෙ ඡත්තං ධාරෙන්ති, හෙට්ඨා ඡත්තම්හි ඩය්හථ’.

479. ‘‘සාමඤ්ඤං මෙ අනුප්පත්තං, කිලෙසා ඣාපිතා මයා;

මණ්ඩපෙ රුක්ඛමූලෙ වා, සන්තාපො මෙ න විජ්ජති.

480. ‘‘තිංසකප්පසහස්සම්හි, යං දානමදදිං තදා;

දුග්ගතිං නාභිජානාමි, සබ්බදානස්සිදං ඵලං.

481. ‘‘කිලෙසා ඣාපිතා මය්හං…පෙ… විහරාමි අනාසවො.

482. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

483. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සබ්බදායකො ථෙරො ඉමා ගාථායො අභාසිත්ථාති.

සබ්බදායකත්ථෙරස්සාපදානං නවමං.