10. අජිතත්ථෙරඅපදානං

484. ‘‘පදුමුත්තරො නාම ජිනො, සබ්බධම්මාන පාරගූ;

අජ්ඣොගාහෙත්වා හිමවන්තං, නිසීදි ලොකනායකො.

485. ‘‘නාහං අද්දක්ඛිං [පස්සාමි (?)] සම්බුද්ධං, නපි සද්දං සුණොමහං;

මම භක්ඛං ගවෙසන්තො, ආහිණ්ඩාමි වනෙ අහං [තදා (සී.)].

486. ‘‘තත්ථද්දස්සාසිං සම්බුද්ධං, ද්වත්තිංසවරලක්ඛණං;

දිස්වාන විත්තිමාපජ්ජිං [චිත්තමාපජ්ජි (සී.), චිත්තමාපජ්ජිං (ස්‍යා.)], සත්තො කො නාමයං භවෙ.

487. ‘‘ලක්ඛණානි විලොකෙත්වා, මම විජ්ජං අනුස්සරිං;

සුතඤ්හි මෙතං වුඩ්ඪානං, පණ්ඩිතානං සුභාසිතං.

488. ‘‘තෙසං යථා තං වචනං, අයං බුද්ධො භවිස්සති;

යංනූනාහං සක්කරෙය්‍යං, ගතිං මෙ සොධයිස්සති.

489. ‘‘ඛිප්පං අස්සමමාගන්ත්වා, මධුතෙලං ගහිං අහං;

කොලම්බකං ගහෙත්වාන, උපගච්ඡිං විනායකං [නරාසභං (සී.)].

490. ‘‘තිදණ්ඩකෙ ගහෙත්වාන, අබ්භොකාසෙ ඨපෙසහං;

පදීපං පජ්ජලිත්වාන, අට්ඨක්ඛත්තුං අවන්දහං.

491. ‘‘සත්තරත්තින්දිවං බුද්ධො, නිසීදි පුරිසුත්තමො;

තතො රත්‍යා විවසානෙ, වුට්ඨාසි ලොකනායකො.

492. ‘‘පසන්නචිත්තො සුමනො, සබ්බරත්තින්දිවං අහං;

දීපං බුද්ධස්ස පාදාසිං, පසන්නො සෙහි පාණිභි.

493. ‘‘සබ්බෙ වනා ගන්ධමයා, පබ්බතෙ ගන්ධමාදනෙ;

බුද්ධස්ස ආනුභාවෙන, ආගච්ඡුං බුද්ධසන්තිකං [උපගච්ඡුං තදා ජිනං (සී.)].

494. ‘‘යෙ කෙචි පුප්ඵගන්ධාසෙ, පුප්ඵිතා ධරණීරුහා;

බුද්ධස්ස ආනුභාවෙන, සබ්බෙ සන්නිපතුං තදා.

495. ‘‘යාවතා හිමවන්තම්හි, නාගා ච ගරුළා උභො;

ධම්මඤ්ච සොතුකාමා තෙ, ආගච්ඡුං බුද්ධසන්තිකං.

496. ‘‘දෙවලො නාම සමණො, බුද්ධස්ස අග්ගසාවකො;

වසීසතසහස්සෙහි, බුද්ධසන්තිකුපාගමි.

497. ‘‘පදුමුත්තරො ලොකවිදූ, ආහුතීනං පටිග්ගහො;

භික්ඛුසඞ්ඝෙ නිසීදිත්වා, ඉමා ගාථා අභාසථ.

498. ‘‘‘යො මෙ දීපං පදීපෙසි, පසන්නො සෙහි පාණිභි;

තමහං කිත්තයිස්සාමි, සුණාථ මම භාසතො.

499. ‘‘‘සට්ඨි කප්පසහස්සානි, දෙවලොකෙ රමිස්සති;

සහස්සක්ඛත්තුං රාජා ච, චක්කවත්තී භවිස්සති.

සොළසමං භාණවාරං.

500. ‘‘‘ඡත්තිසක්ඛත්තුං දෙවින්දො, දෙවරජ්ජං කරිස්සති;

පථවියං සත්තසතං, විපුලං රජ්ජං කරිස්සති.

501. ‘‘‘පදෙසරජ්ජං විපුලං, ගණනාතො අසඞ්ඛියං;

ඉමිනා දීපදානෙන, දිබ්බචක්ඛු භවිස්සති.

502. ‘‘‘සමන්තතො අට්ඨකොසං [අඩ්ඪකොසං (සී. ස්‍යා.)], පස්සිස්සති අයං සදා;

දෙවලොකා චවන්තස්ස, නිබ්බත්තන්තස්ස ජන්තුනො.

503. ‘‘‘දිවා වා යදි වා රත්තිං, පදීපං ධාරයිස්සති;

ජායමානස්ස සත්තස්ස, පුඤ්ඤකම්මසමඞ්ගිනො.

504. ‘‘‘යාවතා නගරං ආසි, තාවතා ජොතයිස්සති;

උපපජ්ජති යං යොනිං, දෙවත්තං අථ මානුසං.

505. ‘‘‘අස්සෙව දීපදානස්ස, [අට්ඨදීපඵලෙන හි; උපට්ඨිස්සන්තිමං ජන්තුං (ස්‍යා.), අට්ඨ දීපා ඵලෙන හි; න ජහිස්සන්ති’මං ජන්තුං (?)] අට්ඨදීපඵලෙන හි;

න ජයිස්සන්තිමං ජන්තූ [අට්ඨදීපඵලෙන හි; උපට්ඨිස්සන්තිමං ජන්තුං (ස්‍යා.), අට්ඨ දීපා ඵලෙන හි; න ජහිස්සන්ති’මං ජන්තුං (?)], දීපදානස්සිදං ඵලං.

506. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

507. ‘‘‘තස්ස ධම්මෙසු දායාදො, ඔරසො ධම්මනිම්මිතො;

සබ්බාසවෙ පරිඤ්ඤාය, නිබ්බායිස්සතිනාසවො.

508. ‘‘‘තොසයිත්වාන සම්බුද්ධං, ගොතමං සක්‍යපුඞ්ගවං;

අජිතො නාම නාමෙන, හෙස්සති සත්ථු සාවකො’.

509. ‘‘සට්ඨි කප්පසහස්සානි, දෙවලොකෙ රමිං අහං;

තත්‍රාපි මෙ දීපසතං, ජොතතෙ නිච්චකාලිකං [සබ්බකාලිකං (සී.)].

510. ‘‘දෙවලොකෙ මනුස්සෙ වා, නිද්ධාවන්ති පභා මම;

බුද්ධසෙට්ඨං සරිත්වාන, භිය්‍යො හාසං ජනෙසහං.

511. ‘‘තුසිතාහං චවිත්වාන, ඔක්කමිං මාතුකුච්ඡියං;

ජායමානස්ස සන්තස්ස, ආලොකො විපුලො අහු.

512. ‘‘අගාරා අභිනික්ඛම්ම, පබ්බජිං අනගාරියං;

බාවරිං උපසඞ්කම්ම, සිස්සත්තං අජ්ඣුපාගමිං.

513. ‘‘හිමවන්තෙ වසන්තොහං, අස්සොසිං ලොකනායකං;

උත්තමත්ථං ගවෙසන්තො, උපගච්ඡිං විනායකං.

514. ‘‘දන්තො බුද්ධො දමෙතාවී, ඔඝතිණ්ණො නිරූපධි;

නිබ්බානං කථයී බුද්ධො, සබ්බදුක්ඛප්පමොචනං.

515. ‘‘තං මෙ ආගමනං සිද්ධං, තොසිතොහං මහාමුනිං;

තිස්සො විජ්ජා අනුප්පත්තා, කතං බුද්ධස්ස සාසනං.

516. ‘‘සතසහස්සිතො කප්පෙ, යං දීපමදදිං තදා;

දුග්ගතිං නාභිජානාමි, දීපදානස්සිදං ඵලං.

517. ‘‘කිලෙසා ඣාපිතා මය්හං…පෙ… විහරාමි අනාසවො.

518. ‘‘ස්වාගතං වත මෙ ආසි…පෙ… කතං බුද්ධස්ස සාසනං.

519. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අජිතො ථෙරො ඉමා ගාථායො අභාසිත්ථාති.

අජිතත්ථෙරස්සාපදානං දසමං.

පිලින්දවච්ඡවග්ගො චත්තාලීසමො.

තස්සුද්දානං –

පිලින්දවච්ඡො සෙලො ච, සබ්බකිත්තී මධුංදදො;

කූටාගාරී බාකුලො ච, ගිරි සළලසව්හයො.

සබ්බදො අජිතො චෙව, ගාථායො ගණිතා ඉහ;

සතානි පඤ්ච ගාථානං, වීසති ච තදුත්තරීති.

අථ වග්ගුද්දානං –

පදුමාරක්ඛදො චෙව, උමා ගන්ධොදකෙන ච;

එකපද්ම සද්දසඤ්ඤී, මන්දාරං බොධිවන්දකො.

අවටඤ්ච පිලින්දි [එවමෙව දිස්සති] ච, ගාථායො ගණිතා ඉහ;

චතුසත්තති ගාථායො, එකාදස සතානි ච.

පදුමවග්ගදසකං.