9. ධම්මචක්කිකත්ථෙරඅපදානං

102. ‘‘සිද්ධත්ථස්ස භගවතො, සීහාසනස්ස සම්මුඛා;

ධම්මචක්කං මෙ ඨපිතං, සුකතං විඤ්ඤුවණ්ණිතං.

103. ‘‘චාරුවණ්ණොව සොභාමි, සයොග්ගබලවාහනො;

පරිවාරෙන්ති මං නිච්චං, අනුයන්තා බහුජ්ජනා.

104. ‘‘සට්ඨිතූරියසහස්සෙහි, පරිචාරෙමහං සදා;

පරිවාරෙන සොභාමි, පුඤ්ඤකම්මස්සිදං ඵලං.

105. ‘‘චතුන්නවුතිතො කප්පෙ, යං චක්කං ඨපයිං අහං;

දුග්ගතිං නාභිජානාමි, ධම්මචක්කස්සිදං ඵලං.

106. ‘‘ඉතො එකාදසෙ කප්පෙ, අට්ඨාසිංසු ජනාධිපා;

සහස්සරාජනාමෙන, චක්කවත්තී මහබ්බලා.

107. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ධම්මචක්කිකො ථෙරො ඉමා ගාථායො අභාසිත්ථාති.

ධම්මචක්කිකත්ථෙරස්සාපදානං නවමං.