10. කප්පරුක්ඛියත්ථෙරඅපදානං

108. ‘‘සිද්ධත්ථස්ස භගවතො, ථූපසෙට්ඨස්ස සම්මුඛා;

විචිත්තදුස්සෙ ලගෙත්වා [ලග්ගෙත්වා (සී. ස්‍යා.)], කප්පරුක්ඛං ඨපෙසහං.

109. ‘‘යං යං යොනුපපජ්ජාමි, දෙවත්තං අථ මානුසං;

සොභයන්තො මම ද්වාරං, කප්පරුක්ඛො පතිට්ඨති.

110. ‘‘අහඤ්ච පරිසා චෙව, යෙ කෙචි මම වස්සිතා [නිස්සිතා (සී.)];

තම්හා දුස්සං ගහෙත්වාන, නිවාසෙම මයං සදා [තදා (ස්‍යා.)].

111. ‘‘චතුන්නවුතිතො කප්පෙ, යං රුක්ඛං ඨපයිං අහං;

දුග්ගතිං නාභිජානාමි, කප්පරුක්ඛස්සිදං ඵලං.

112. ‘‘ඉතො ච සත්තමෙ කප්පෙ, සුචෙළා අට්ඨ ඛත්තියා;

සත්තරතනසම්පන්නා, චක්කවත්තී මහබ්බලා.

113. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කප්පරුක්ඛියො ථෙරො ඉමා ගාථායො අභාසිත්ථාති.

කප්පරුක්ඛියත්ථෙරස්සාපදානං දසමං.

කුණ්ඩධානවග්ගො චතුත්ථො.