2. සාගතත්ථෙරඅපදානං

17. ‘‘සොභිතො නාම නාමෙන, අහොසිං බ්‍රාහ්මණො තදා;

පුරක්ඛතො සසිස්සෙහි, ආරාමං අගමාසහං.

18. ‘‘භගවා තම්හි සමයෙ, භික්ඛුසඞ්ඝපුරක්ඛතො;

ආරාමද්වාරා නික්ඛම්ම, අට්ඨාසි පුරිසුත්තමො.

19. ‘‘තමද්දසාසිං සම්බුද්ධං, දන්තං දන්තපුරක්ඛතං;

සකං චිත්තං පසාදෙත්වා, සන්ථවිං ලොකනායකං.

20. ‘‘යෙ කෙචි පාදපා සබ්බෙ, මහියා තෙ විරූහරෙ;

බුද්ධිමන්තො තථා සත්තා, රුහන්ති ජිනසාසනෙ.

21. ‘‘සත්ථවාහොසි සප්පඤ්ඤො, මහෙසි බහුකෙ ජනෙ;

විපථා උද්ධරිත්වාන, පථං ආචික්ඛසෙ තුවං.

22. ‘‘දන්තො දන්තපරිකිණ්ණො [පුරක්ඛතො (ස්‍යා.)], ඣායී ඣානරතෙහි ච;

ආතාපී පහිතත්තෙහි, උපසන්තෙහි තාදිභි.

23. ‘‘අලඞ්කතො පරිසාහි, පුඤ්ඤඤාණෙහි සොභති;

පභා නිද්ධාවතෙ තුය්හං, සූරියොදයනෙ යථා.

24. ‘‘පසන්නචිත්තං දිස්වාන, මහෙසී පදුමුත්තරො;

භික්ඛුසඞ්ඝෙ ඨිතො සත්ථා, ඉමා ගාථා අභාසථ.

25. ‘‘‘යො සො හාසං ජනෙත්වාන, මමං කිත්තෙසි බ්‍රාහ්මණො;

කප්පානං සතසහස්සං, දෙවලොකෙ රමිස්සති.

26. ‘‘‘තුසිතා හි චවිත්වාන, සුක්කමූලෙන චොදිතො;

ගොතමස්ස භගවතො, සාසනෙ පබ්බජිස්සති.

27. ‘‘‘තෙන කම්මෙන සුකතෙන, අරහත්තං [තුට්ඨහට්ඨං (ස්‍යා. ක.)] ලභිස්සති;

සාගතො නාම නාමෙන, හෙස්සති සත්ථු සාවකො’.

28. ‘‘පබ්බජිත්වාන කායෙන, පාපකම්මං විවජ්ජයිං;

වචීදුච්චරිතං හිත්වා, ආජීවං පරිසොධයිං.

29. ‘‘එවං විහරමානොහං, තෙජොධාතූසු කොවිදො;

සබ්බාසවෙ පරිඤ්ඤාය, විහරාමි අනාසවො.

30. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සාගතො ථෙරො ඉමා ගාථායො අභාසිත්ථාති.

සාගතත්ථෙරස්සාපදානං දුතියං.