3. මහාකච්චානත්ථෙරඅපදානං

31. ‘‘පදුමුත්තරනාථස්ස, පදුමං නාම චෙතියං;

සිලාසනං [සීහාසනං (ක.)] කාරයිත්වා, සුවණ්ණෙනාභිලෙපයිං.

32. ‘‘රතනාමයඡත්තඤ්ච, පග්ගය්හ වාළබීජනිං [වාළබීජනී (සී. ස්‍යා.)];

බුද්ධස්ස අභිරොපෙසිං, ලොකබන්ධුස්ස තාදිනො.

33. ‘‘යාවතා දෙවතා භුම්මා [භූමා (ක.)], සබ්බෙ සන්නිපතුං තදා;

රතනාමයඡත්තානං, විපාකං කථයිස්සති.

34. ‘‘තඤ්ච සබ්බං සුණිස්සාම, කථයන්තස්ස සත්ථුනො;

භිය්‍යො හාසං ජනෙය්‍යාම, සම්මාසම්බුද්ධසාසනෙ.

35. ‘‘හෙමාසනෙ නිසීදිත්වා, සයම්භූ අග්ගපුග්ගලො;

භික්ඛුසඞ්ඝපරිබ්‍යූළ්හො [පරිබ්බූළ්හො (සී.)], ඉමා ගාථා අභාසථ.

36. ‘‘‘යෙනිදං ආසනං දින්නං, සොවණ්ණං රතනාමයං;

තමහං කිත්තයිස්සාමි, සුණාථ මම භාසතො.

37. ‘‘‘තිංසකප්පානි දෙවින්දො, දෙවරජ්ජං කරිස්සති;

සමන්තා යොජනසතං, ආභායාභිභවිස්සති.

38. ‘‘‘මනුස්සලොකමාගන්ත්වා, චක්කවත්තී භවිස්සති;

පභස්සරොති නාමෙන, උග්ගතෙජො භවිස්සති.

39. ‘‘‘දිවා වා යදි වා රත්තිං, සතරංසීව උග්ගතො;

සමන්තා අට්ඨරතනං, උජ්ජොතිස්සති ඛත්තියො.

40. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

41. ‘‘‘තුසිතා හි චවිත්වාන, සුක්කමූලෙන චොදිතො;

කච්චානො නාම නාමෙන, බ්‍රහ්මබන්ධු භවිස්සති.

42. ‘‘‘සො පච්ඡා පබ්බජිත්වාන, අරහා හෙස්සතිනාසවො;

ගොතමො ලොකපජ්ජොතො, අග්ගට්ඨානෙ ඨපෙස්සති.

43. ‘‘‘සංඛිත්තපුච්ඡිතං [සංඛිත්තං පුච්ඡිතං (ස්‍යා. ක.)] පඤ්හං, විත්ථාරෙන කථෙස්සති;

කථයන්තො ච තං පඤ්හං, අජ්ඣාසයං [අජ්ඣාසං (සී.), අබ්භාසං (ක.)] පූරයිස්සති’.

44. ‘‘අඩ්ඪෙ කුලෙ අභිජාතො, බ්‍රාහ්මණො මන්තපාරගූ;

ඔහාය ධනධඤ්ඤානි, පබ්බජිං අනගාරියං.

45. ‘‘සංඛිත්තෙනපි පුච්ඡන්තෙ, විත්ථාරෙන කථෙමහං;

අජ්ඣාසයං තෙසං පූරෙමි, තොසෙමි ද්විපදුත්තමං.

46. ‘‘තොසිතො මෙ මහාවීරො, සයම්භූ අග්ගපුග්ගලො;

භික්ඛුසඞ්ඝෙ නිසීදිත්වා, එතදග්ගෙ ඨපෙසි මං.

47. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මහාකච්චානො ථෙරො ඉමා ගාථායො අභාසිත්ථාති.

මහාකච්චානත්ථෙරස්සාපදානං තතියං.