1. සද්දසඤ්ඤකත්ථෙරඅපදානං

1. ‘‘මිගලුද්දො පුරෙ ආසිං, අරඤ්ඤෙ කානනෙ අහං;

තත්ථද්දසාසිං සම්බුද්ධං, දෙවසඞ්ඝපුරක්ඛතං.

2. ‘‘චතුසච්චං පකාසෙන්තං, උද්ධරන්තං මහාජනං;

අස්සොසිං මධුරං වාචං, කරවීකරුදොපමං [රුතොපමං (?)].

3. ‘‘බ්‍රහ්මසරස්ස මුනිනො, සිඛිනො ලොකබන්ධුනො;

ඝොසෙ චිත්තං පසාදෙත්වා, පත්තොම්හි ආසවක්ඛයං.

4. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, පසාදස්ස ඉදං ඵලං.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.

සද්දසඤ්ඤකත්ථෙරස්සාපදානං පඨමං.