2. යවකලාපියත්ථෙරඅපදානං

6. ‘‘නගරෙ අරුණවතියා, ආසිං යවසිකො තදා;

පන්ථෙ දිස්වාන සම්බුද්ධං, යවකලාපං සන්ථරිං [යවකලාපමවත්ථරිං (සී.)].

7. ‘‘අනුකම්පකො කාරුණිකො, සිඛී ලොකග්ගනායකො;

මම සඞ්කප්පමඤ්ඤාය, නිසීදි යවසන්ථරෙ.

8. ‘‘දිස්වා නිසින්නං විමලං, මහාඣායිං විනායකං;

පාමොජ්ජං ජනයිත්වාන, තත්ථ කාලඞ්කතො අහං.

9. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, යවත්ථරෙ ඉදං ඵලං.

10. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා යවකලාපියො ථෙරො ඉමා ගාථායො අභාසිත්ථාති.

යවකලාපියත්ථෙරස්සාපදානං දුතියං.