36. සද්දසඤ්ඤකවග්ගො

1. සද්දසඤ්ඤකත්ථෙරඅපදානං

1. ‘‘මිගලුද්දො පුරෙ ආසිං, අරඤ්ඤෙ කානනෙ අහං;

තත්ථද්දසාසිං සම්බුද්ධං, දෙවසඞ්ඝපුරක්ඛතං.

2. ‘‘චතුසච්චං පකාසෙන්තං, උද්ධරන්තං මහාජනං;

අස්සොසිං මධුරං වාචං, කරවීකරුදොපමං [රුතොපමං (?)].

3. ‘‘බ්‍රහ්මසරස්ස මුනිනො, සිඛිනො ලොකබන්ධුනො;

ඝොසෙ චිත්තං පසාදෙත්වා, පත්තොම්හි ආසවක්ඛයං.

4. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, පසාදස්ස ඉදං ඵලං.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.

සද්දසඤ්ඤකත්ථෙරස්සාපදානං පඨමං.

2. යවකලාපියත්ථෙරඅපදානං

6. ‘‘නගරෙ අරුණවතියා, ආසිං යවසිකො තදා;

පන්ථෙ දිස්වාන සම්බුද්ධං, යවකලාපං සන්ථරිං [යවකලාපමවත්ථරිං (සී.)].

7. ‘‘අනුකම්පකො කාරුණිකො, සිඛී ලොකග්ගනායකො;

මම සඞ්කප්පමඤ්ඤාය, නිසීදි යවසන්ථරෙ.

8. ‘‘දිස්වා නිසින්නං විමලං, මහාඣායිං විනායකං;

පාමොජ්ජං ජනයිත්වාන, තත්ථ කාලඞ්කතො අහං.

9. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, යවත්ථරෙ ඉදං ඵලං.

10. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා යවකලාපියො ථෙරො ඉමා ගාථායො අභාසිත්ථාති.

යවකලාපියත්ථෙරස්සාපදානං දුතියං.

3. කිංසුකපූජකත්ථෙරඅපදානං

11. ‘‘කිංසුකං පුප්ඵිතං දිස්වා, පග්ගහෙත්වාන අඤ්ජලිං;

බුද්ධං සරිත්වා සිද්ධත්ථං, ආකාසෙ අභිපූජයිං.

12. ‘‘චතුන්නවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

13. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා කිංසුකපූජකො ථෙරො ඉමා ගාථායො අභාසිත්ථාති.

කිංසුකපූජකත්ථෙරස්සාපදානං තතියං.

4. සකොසකකොරණ්ඩදායකත්ථෙරඅපදානං

14. ‘‘අක්කන්තඤ්ච පදං දිස්වා, සිඛිනො ලොකබන්ධුනො;

එකංසං අජිනං කත්වා, පදසෙට්ඨං අවන්දහං.

15. ‘‘කොරණ්ඩං පුප්ඵිතං දිස්වා, පාදපං ධරණීරුහං;

සකොසකං [සකොටකං (සී. ස්‍යා.)] ගහෙත්වාන, පදචක්කං අපූජයිං.

16. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, පදපූජායිදං ඵලං.

17. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සකොසක [සකොටක (සී. ස්‍යා.)] කොරණ්ඩදායකො ථෙරො ඉමා ගාථායො අභාසිත්ථාති.

සකොසකකොරණ්ඩදායකත්ථෙරස්සාපදානං චතුත්ථං.

5. දණ්ඩදායකත්ථෙරඅපදානං

18. ‘‘කානනං වනමොගය්හ, වෙළුං ඡෙත්වානහං තදා;

ආලම්බනං කරිත්වාන, සඞ්ඝස්ස අදදං අහං.

19. ‘‘තෙන චිත්තප්පසාදෙන, සුබ්බතෙ අභිවාදිය;

ආලම්බනම්පි දත්වාන, පක්කාමිං උත්තරාමුඛො.

20. ‘‘චතුන්නවුතිතො කප්පෙ, යං දණ්ඩමදදිං තදා;

දුග්ගතිං නාභිජානාමි, දණ්ඩදානස්සිදං ඵලං.

21. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා දණ්ඩදායකො ථෙරො ඉමා ගාථායො අභාසිත්ථාති.

දණ්ඩදායකත්ථෙරස්සාපදානං පඤ්චමං.

6. අම්බයාගුදායකත්ථෙරඅපදානං

22. ‘‘සතරංසී නාම සම්බුද්ධො, සයම්භූ අපරාජිතො;

වුට්ඨහිත්වා සමාධිම්හා, භික්ඛාය මමුපාගමි.

23. ‘‘පච්චෙකබුද්ධං දිස්වාන, අම්බයාගුං අදාසහං;

විප්පසන්නමනං තස්ස, විප්පසන්නෙන චෙතසා.

24. ‘‘චතුන්නවුතිතො කප්පෙ, යං කම්මමකරිං තදා;

දුග්ගතිං නාභිජානාමි, අම්බයාගුයිදං ඵලං.

25. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අම්බයාගුදායකො ථෙරො ඉමා ගාථායො අභාසිත්ථාති.

අම්බයාගුදායකත්ථෙරස්සාපදානං ඡට්ඨං.

7. සුපුටකපූජකත්ථෙරඅපදානං

26. ‘‘දිවාවිහාරා නික්ඛන්තො, විපස්සී ලොකනායකො;

භික්ඛාය විචරන්තො සො, මම සන්තිකුපාගමි.

27. ‘‘තතො පතීතො සුමනො, බුද්ධසෙට්ඨස්ස තාදිනො;

ලොණසුපුටකං දත්වා, කප්පං සග්ගම්හි මොදහං.

28. ‘‘එකනවුතිතො කප්පෙ, යං පුටකමදාසහං;

දුග්ගතිං නාභිජානාමි, පුටකස්ස ඉදං ඵලං.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සුපුටකපූජකො ථෙරො ඉමා ගාථායො අභාසිත්ථාති.

සුපුටකපූජකත්ථෙරස්සාපදානං සත්තමං.

8. මඤ්චදායකත්ථෙරඅපදානං

30. ‘‘විපස්සිනො භගවතො, ලොකජෙට්ඨස්ස තාදිනො;

එකං මඤ්චං මයා දින්නං, පසන්නෙන සපාණිනා.

31. ‘‘හත්ථියානං අස්සයානං, දිබ්බයානං සමජ්ඣගං;

තෙන මඤ්චකදානෙන, පත්තොම්හි ආසවක්ඛයං.

32. ‘‘එකනවුතිතො කප්පෙ, යං මඤ්චමදදිං තදා;

දුග්ගතිං නාභිජානාමි, මඤ්චදානස්සිදං ඵලං.

33. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මඤ්චදායකො ථෙරො ඉමා ගාථායො අභාසිත්ථාති.

මඤ්චදායකත්ථෙරස්සාපදානං අට්ඨමං.

9. සරණගමනියත්ථෙරඅපදානං

34. ‘‘ආරුහිම්හ තදා නාවං, භික්ඛු චාජීවකො චහං;

නාවාය භිජ්ජමානාය, භික්ඛු මෙ සරණං අදා.

35. ‘‘එකත්තිංසෙ ඉතො කප්පෙ, යඤ්ච මෙ සරණං අදා;

දුග්ගතිං නාභිජානාමි, සරණාගමනෙ ඵලං.

36. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සරණගමනියො ථෙරො ඉමා ගාථායො අභාසිත්ථාති.

සරණගමනියත්ථෙරස්සාපදානං නවමං.

10. පිණ්ඩපාතිකත්ථෙරඅපදානං

37. ‘‘තිස්සො නාමාසි සම්බුද්ධො, විහාසි විපිනෙ තදා;

තුසිතා හි ඉධාගන්ත්වා, පිණ්ඩපාතං අදාසහං.

38. ‘‘සම්බුද්ධමභිවාදෙත්වා, තිස්සං නාම මහායසං;

සකං චිත්තං පසාදෙත්වා, තුසිතං අගමාසහං.

39. ‘‘ද්වෙනවුතෙ ඉතො කප්පෙ, යං දානමදදිං තදා;

දුග්ගතිං නාභිජානාමි, පිණ්ඩපාතස්සිදං ඵලං.

40. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පිණ්ඩපාතිකො ථෙරො ඉමා ගාථායො අභාසිත්ථාති.

පිණ්ඩපාතිකත්ථෙරස්සාපදානං දසමං.

සද්දසඤ්ඤකවග්ගො ඡත්තිංසතිමො.