10. එකඤ්ජලියත්ථෙරඅපදානං

63. ‘‘රොමසො [රෙවතො (සී.)] නාම සම්බුද්ධො, නදීකූලෙ වසී තදා;

අද්දසං විරජං බුද්ධං, පීතරංසිංව භාණුමං.

64. ‘‘උක්කාමුඛපහට්ඨංව, ඛදිරඞ්ගාරසන්නිභං;

ඔසධිංව විරොචන්තං, එකඤ්ජලිමකාසහං.

65. ‘‘චතුන්නවුතිතො කප්පෙ, යං අඤ්ජලිමකාසහං;

දුග්ගතිං නාභිජානාමි, අඤ්ජලියා ඉදං ඵලං.

66. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකඤ්ජලියො ථෙරො ඉමා ගාථායො අභාසිත්ථාති.

එකඤ්ජලියත්ථෙරස්සාපදානං දසමං.

එකපදුමියවග්ගො පඤ්චතිංසතිමො.