35. එකපදුමියවග්ගො

1. එකපදුමියත්ථෙරඅපදානං

1. ‘‘පදුමුත්තරො නාම ජිනො, සබ්බධම්මාන පාරගූ;

භවාභවෙ විභාවෙන්තො, තාරෙසි ජනතං බහුං.

2. ‘‘හංසරාජා තදා හොමි, දිජානං පවරො අහං;

ජාතස්සරං සමොගය්හ, කීළාමි හංසකීළිතං.

3. ‘‘පදුමුත්තරො ලොකවිදූ, ආහුතීනං පටිග්ගහො;

ජාතස්සරස්ස උපරි, ආගච්ඡි තාවදෙ ජිනො.

4. ‘‘දිස්වානහං දෙවදෙවං, සයම්භුං ලොකනායකං;

වණ්ටෙ ඡෙත්වාන පදුමං, සතපත්තං මනොරමං.

5. ‘‘මුඛතුණ්ඩෙන පග්ගය්හ, පසන්නො ලොකනායකෙ [විප්පසන්නෙන චෙතසා (ස්‍යා.)];

උක්ඛිපිත්වාන ගගණෙ [උක්ඛිපිත්වා නලාටෙන (ක.)], බුද්ධසෙට්ඨං අපූජයිං.

6. ‘‘පදුමුත්තරො ලොකවිදූ, ආහුතීනං පටිග්ගහො;

අන්තලික්ඛෙ ඨිතො සත්ථා, අකා මෙ අනුමොදනං.

7. ‘‘‘ඉමිනා එකපදුමෙන, චෙතනාපණිධීහි ච;

කප්පානං සතසහස්සං, විනිපාතං න ගච්ඡසි’.

8. ‘‘ඉදං වත්වාන සම්බුද්ධො, ජලජුත්තමනාමකො;

මම කම්මං පකිත්තෙත්වා, අගමා යෙන පත්ථිතං.

9. ‘‘සතසහස්සිතො කප්පෙ, යං කම්මමකරිං තදා;

දුග්ගතිං නාභිජානාමි, බුද්ධපූජායිදං ඵලං.

10. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා එකපදුමියො ථෙරො ඉමා ගාථායො අභාසිත්ථාති.

එකපදුමියත්ථෙරස්සාපදානං පඨමං.

2. තීණුප්පලමාලියත්ථෙරඅපදානං

11. ‘‘චන්දභාගානදීතීරෙ, අහොසිං වානරො තදා;

අද්දසං විරජං බුද්ධං, නිසින්නං පබ්බතන්තරෙ.

12. ‘‘ඔභාසෙන්තං දිසා සබ්බා, සාලරාජංව ඵුල්ලිතං;

ලක්ඛණබ්‍යඤ්ජනූපෙතං, දිස්වා අත්තමනො අහුං.

13. ‘‘උදග්ගචිත්තො සුමනො, පීතියා හට්ඨමානසො;

තීණි උප්පලපුප්ඵානි, මත්ථකෙ අභිරොපයිං.

14. ‘‘පුප්ඵානි අභිරොපෙත්වා, විපස්සිස්ස මහෙසිනො;

සගාරවො භවිත්වාන [ගමිත්වාන (සී.), නමිත්වාන (ක.)], පක්කාමිං උත්තරාමුඛො.

15. ‘‘ගච්ඡන්තො පටිකුටිකො, විප්පසන්නෙන චෙතසා;

සෙලන්තරෙ පතිත්වාන [පපතිත්වා (ස්‍යා. ක.)], පාපුණිං ජීවිතක්ඛයං.

16. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං [පුරිමං ජාතිං (?) උපරි 38 වග්ගෙ තතියාපදානෙ එවමෙව දිස්සති], තාවතිංසමගච්ඡහං.

17. ‘‘සතානං තීණික්ඛත්තුඤ්ච, දෙවරජ්ජං අකාරයිං;

සතානං පඤ්චක්ඛත්තුඤ්ච, චක්කවත්තී අහොසහං.

18. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

19. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තීණුප්පලමාලියො [තිඋප්පලමාලියො (සී.)] ථෙරො ඉමා ගාථායො අභාසිත්ථාති.

තීණුප්පලමාලියත්ථෙරස්සාපදානං දුතියං.

3. ධජදායකත්ථෙරඅපදානං

20. ‘‘තිස්සො නාම අහු සත්ථා, ලොකජෙට්ඨො නරාසභො;

තයොපධික්ඛයෙ [තස්සොපධික්ඛයෙ (සී.)] දිස්වා, ධජං ආරොපිතං මයා.

21. ‘‘තෙන කම්මෙන සුකතෙන, චෙතනාපණිධීහි ච;

ජහිත්වා මානුසං දෙහං, තාවතිංසමගච්ඡහං.

22. ‘‘සතානං තීණික්ඛත්තුඤ්ච, දෙවරජ්ජං අකාරයිං;

සතානං පඤ්චක්ඛත්තුඤ්ච, චක්කවත්තී අහොසහං.

23. ‘‘පදෙසරජ්ජං විපුලං, ගණනාතො අසඞ්ඛියං;

අනුභොමි සකං කම්මං, පුබ්බෙ සුකතමත්තනො.

24. ‘‘ද්වෙනවුතෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, ධජදානස්සිදං ඵලං.

25. ‘‘ඉච්ඡමානො චහං අජ්ජ, සකානනං සපබ්බතං;

ඛොමදුස්සෙන ඡාදෙය්‍යං, තදා මය්හං කතෙ ඵලං.

26. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ධජදායකො ථෙරො ඉමා ගාථායො අභාසිත්ථාති.

ධජදායකත්ථෙරස්සාපදානං තතියං.

4. තිකිඞ්කණිපූජකත්ථෙරඅපදානං

27. ‘‘හිමවන්තස්සාවිදූරෙ, භූතගණො නාම පබ්බතො;

තත්ථද්දසං පංසුකූලං, දුමග්ගම්හි විලග්ගිතං.

28. ‘‘තීණි කිඞ්කණිපුප්ඵානි, ඔචිනිත්වානහං තදා;

හට්ඨො හට්ඨෙන චිත්තෙන, පංසුකූලං අපූජයිං.

29. ‘‘එකත්තිංසෙ ඉතො කප්පෙ, යං කම්මමකරිං තදා;

දුග්ගතිං නාභිජානාමි, තිණ්ණං පුප්ඵානිදං ඵලං.

30. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිකිඞ්කණිපූජකො ථෙරො ඉමා ගාථායො අභාසිත්ථාති.

තිකිඞ්කණිපූජකත්ථෙරස්සාපදානං චතුත්ථං.

5. නළාගාරිකත්ථෙරඅපදානං

31. ‘‘හිමවන්තස්සාවිදූරෙ, හාරිතො නාම පබ්බතො;

සයම්භූ නාරදො නාම, රුක්ඛමූලෙ වසී තදා.

32. ‘‘නළාගාරං කරිත්වාන, තිණෙන ඡාදයිං අහං;

චඞ්කමං සොධයිත්වාන, සයම්භුස්ස අදාසහං.

33. ‘‘චතුද්දසසු කප්පෙසු, දෙවලොකෙ රමිං අහං;

චතුසත්තතික්ඛත්තුඤ්ච, දෙවරජ්ජං අකාරයිං.

34. ‘‘චතුසත්තති [සත්තසත්තති (සී.)] ක්ඛත්තුඤ්ච, චක්කවත්තී අහොසහං;

පදෙසරජ්ජං විපුලං, ගණනාතො අසඞ්ඛියං.

35. ‘‘උබ්බිද්ධං භවනං මය්හං, ඉන්දලට්ඨීව උග්ගතං;

සහස්සථම්භං අතුලං, විමානං සපභස්සරං.

36. ‘‘ද්වෙ සම්පත්තී අනුභොත්වා, සුක්කමූලෙන චොදිතො;

ගොතමස්ස භගවතො, සාසනෙ පබ්බජිං අහං.

37. ‘‘පධානපහිතත්තොම්හි, උපසන්තො නිරූපධි;

නාගොව බන්ධනං ඡෙත්වා, විහරාමි අනාසවො.

38. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා නළාගාරිකො ථෙරො ඉමා ගාථායො අභාසිත්ථාති.

නළාගාරිකත්ථෙරස්සාපදානං පඤ්චමං.

6. චම්පකපුප්ඵියත්ථෙරඅපදානං

39. ‘‘හිමවන්තස්සාවිදූරෙ, ජාපලො [චාපලො (සී.), ඡාපලො (ස්‍යා.)] නාම පබ්බතො;

බුද්ධො සුදස්සනො නාම, විහාසි පබ්බතන්තරෙ.

40. ‘‘පුප්ඵං හෙමවන්තං [හෙමවතං (සී.), හෙමවණ්ණං (ස්‍යා.)] ගය්හ, ගච්ඡං වෙහායසෙනහං;

අද්දසං විරජං බුද්ධං, ඔඝතිණ්ණමනාසවං.

41. ‘‘සත්ත චම්පකපුප්ඵානි, සීසෙ කත්වානහං තදා;

බුද්ධස්ස අභිරොපෙසිං, සයම්භුස්ස මහෙසිනො.

42. ‘‘එකත්තිංසෙ ඉතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

43. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා චම්පකපුප්ඵියො ථෙරො ඉමා ගාථායො අභාසිත්ථාති.

චම්පකපුප්ඵියත්ථෙරස්සාපදානං ඡට්ඨං.

7. පදුමපූජකත්ථෙරඅපදානං

44. ‘‘හිමවන්තස්සාවිදූරෙ, රොමසො නාම පබ්බතො;

බුද්ධොපි සම්භවො නාම, අබ්භොකාසෙ වසී තදා.

45. ‘‘භවනා නික්ඛමිත්වාන, පදුමං ධාරයිං අහං;

එකාහං ධාරයිත්වාන, පුන භවනුපාගමිං.

46. ‘‘එකනවුතිතො කප්පෙ, යං පුප්ඵමභිරොපයිං;

දුග්ගතිං නාභිජානාමි, බුද්ධපූජායිදං ඵලං.

47. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පදුමපූජකො ථෙරො ඉමා ගාථායො අභාසිත්ථාති.

පදුමපූජකත්ථෙරස්සාපදානං සත්තමං.

තෙරසමං භාණවාරං.

8. තිණමුට්ඨිදායකත්ථෙරඅපදානං

48. ‘‘හිමවන්තස්සාවිදූරෙ, ලම්බකො නාම පබ්බතො;

උපතිස්සො නාම සම්බුද්ධො, අබ්භොකාසම්හි චඞ්කමි.

49. ‘‘මිගලුද්දො තදා ආසිං, අරඤ්ඤෙ කානනෙ අහං;

දිස්වාන තං දෙවදෙවං, සයම්භුං අපරාජිතං.

50. ‘‘විප්පසන්නෙන චිත්තෙන, තදා තස්ස මහෙසිනො;

නිසීදනත්ථං බුද්ධස්ස, තිණමුට්ඨිමදාසහං.

51. ‘‘දත්වාන දෙවදෙවස්ස, භිය්‍යො චිත්තං පසාදයිං;

සම්බුද්ධං අභිවාදෙත්වා, පක්කාමිං උත්තරාමුඛො.

52. ‘‘අචිරං ගතමත්තං මං, මිගරාජා අපොථයි [අහෙඨයි (සී. ස්‍යා.)];

සීහෙන පොථිතො [පාතිතො (සී. ස්‍යා.)] සන්තො, තත්ථ කාලඞ්කතො අහං.

53. ‘‘ආසන්නෙ මෙ කතං කම්මං, බුද්ධසෙට්ඨෙ අනාසවෙ;

සුමුත්තො සරවෙගොව, දෙවලොකං අගඤ්ඡහං.

54. ‘‘යූපො තත්ථ සුභො ආසි, පුඤ්ඤකම්මාභිනිම්මිතො;

සහස්සකණ්ඩො සතභෙණ්ඩු, ධජාලු හරිතාමයො.

55. ‘‘පභා නිද්ධාවතෙ තස්ස, සතරංසීව උග්ගතො;

ආකිණ්ණො දෙවකඤ්ඤාහි, ආමොදිං කාමකාමහං.

56. ‘‘දෙවලොකා චවිත්වාන, සුක්කමූලෙන චොදිතො;

ආගන්ත්වාන මනුස්සත්තං, පත්තොම්හි ආසවක්ඛයං.

57. ‘‘චතුන්නවුතිතො කප්පෙ, නිසීදනමදාසහං;

දුග්ගතිං නාභිජානාමි, තිණමුට්ඨියිදං ඵලං.

58. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තිණමුට්ඨිදායකො ථෙරො ඉමා ගාථායො අභාසිත්ථාති.

තිණමුට්ඨිදායකත්ථෙරස්සාපදානං අට්ඨමං.

9. තින්දුකඵලදායකත්ථෙරඅපදානං

59. ‘‘කණිකාරංව ජොතන්තං, නිසින්නං පබ්බතන්තරෙ;

අද්දසං විරජං බුද්ධං, ඔඝතිණ්ණමනාසවං.

60. ‘‘තින්දුකං සඵලං දිස්වා, භින්දිත්වාන සකොසකං [සකොටකං (සී.), සකොටිකං (ස්‍යා.)];

පසන්නචිත්තො සුමනො, සයම්භුස්ස මදාසහං [වෙස්සභුස්ස අදාසහං (සී.)].

61. ‘‘එකනවුතිතො කප්පෙ, යං ඵලමදදිං තදා;

දුග්ගතිං නාභිජානාමි, ඵලදානස්සිදං ඵලං.

62. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තින්දුකඵලදායකො ථෙරො ඉමා ගාථායො අභාසිත්ථාති.

තින්දුකඵලදායකත්ථෙරස්සාපදානං නවමං.

10. එකඤ්ජලියත්ථෙරඅපදානං

63. ‘‘රොමසො [රෙවතො (සී.)] නාම සම්බුද්ධො, නදීකූලෙ වසී තදා;

අද්දසං විරජං බුද්ධං, පීතරංසිංව භාණුමං.

64. ‘‘උක්කාමුඛපහට්ඨංව, ඛදිරඞ්ගාරසන්නිභං;

ඔසධිංව විරොචන්තං, එකඤ්ජලිමකාසහං.