5. ගොසීසනික්ඛෙපකත්ථෙරඅපදානං

21. ‘‘ආරාමද්වාරා නික්ඛම්ම, ගොසීසං සන්ථතං මයා;

අනුභොමි සකං කම්මං, පුබ්බකම්මස්සිදං ඵලං.

22. ‘‘ආජානියා වාතජවා, සින්ධවා සීඝවාහනා;

අනුභොමි සබ්බමෙතං, ගොසීසස්ස ඉදං ඵලං.

23. ‘‘අහො කාරං පරමකාරං, සුඛත්තෙ සුකතං මයා;

සඞ්ඝෙ කතස්ස කාරස්ස, න අඤ්ඤං කලමග්ඝති.

24. ‘‘චතුන්නවුතිතො කප්පෙ, යං සීසං සන්ථරිං අහං;

දුග්ගතිං නාභිජානාමි, සන්ථරස්ස ඉදං ඵලං.

25. ‘‘පඤ්චසත්තතිකප්පම්හි, සුප්පතිට්ඨිතනාමකො;

එකො ආසිං මහාතෙජො, චක්කවත්තී මහබ්බලො.

26. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ගොසීසනික්ඛෙපකො ථෙරො ඉමා ගාථායො අභාසිත්ථාති.

ගොසීසනික්ඛෙපකත්ථෙරස්සාපදානං පඤ්චමං.