30. චිතකපූජකවග්ගො

1. චිතකපූජකත්ථෙරඅපදානං

1. ‘‘අජිතො නාම නාමෙන, අහොසිං බ්‍රාහ්මණො තදා;

ආහුතිං යිට්ඨුකාමොහං, නානාපුප්ඵං සමානයිං.

2. ‘‘ජලන්තං චිතකං දිස්වා, සිඛිනො ලොකබන්ධුනො;

තඤ්ච පුප්ඵං සමානෙත්වා, චිතකෙ ඔකිරිං අහං.

3. ‘‘එකත්තිංසෙ ඉතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

4. ‘‘සත්තවීසෙ [සත්තතිංසෙ (ක.)] ඉතො කප්පෙ, සත්තාසුං මනුජාධිපා;

සුපජ්ජලිතනාමා තෙ, චක්කවත්තී මහබ්බලා.

5. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා චිතකපූජකො ථෙරො ඉමා ගාථායො අභාසිත්ථාති.

චිතකපූජකත්ථෙරස්සාපදානං පඨමං.

2. පුප්ඵධාරකත්ථෙරඅපදානං

6. ‘‘වාකචීරධරො ආසිං, අජිනුත්තරවාසනො;

අභිඤ්ඤා පඤ්ච නිබ්බත්තා, චන්දස්ස පරිමජ්ජකො.

7. ‘‘විපස්සිං ලොකපජ්ජොතං, දිස්වා අභිගතං මමං;

පාරිච්ඡත්තකපුප්ඵානි, ධාරෙසිං සත්ථුනො අහං.

8. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, ධාරණාය ඉදං ඵලං.

9. ‘‘සත්තාසීතිම්හිතො කප්පෙ, එකො ආසිං මහීපති;

සමන්තධාරණො නාම, චක්කවත්තී මහබ්බලො.

10. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පුප්ඵධාරකො ථෙරො ඉමා ගාථායො අභාසිත්ථාති.

පුප්ඵධාරකත්ථෙරස්සාපදානං දුතියං.

3. ඡත්තදායකත්ථෙරඅපදානං

11. ‘‘පුත්තො මම පබ්බජිතො, කාසායවසනො තදා;

සො ච බුද්ධත්තං සම්පත්තො, නිබ්බුතො ලොකපූජිතො.

12. ‘‘විචිනන්තො සකං පුත්තං, අගමං පච්ඡතො අහං;

නිබ්බුතස්ස මහන්තස්ස, චිතකං අගමාසහං.

13. ‘‘පග්ගය්හ අඤ්ජලිං තත්ථ, වන්දිත්වා චිතකං අහං;

සෙතච්ඡත්තඤ්ච පග්ගය්හ, ආරොපෙසිං අහං තදා.

14. ‘‘චතුන්නවුතිතො කප්පෙ, යං ඡත්තමභිරොපයිං;

දුග්ගතිං නාභිජානාමි, ඡත්තදානස්සිදං ඵලං.

15. ‘‘පඤ්චවීසෙ ඉතො කප්පෙ, සත්ත ආසුං ජනාධිපා;

මහාරහසනාමා තෙ, චක්කවත්තී මහබ්බලා.

16. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඡත්තදායකො ථෙරො ඉමා ගාථායො අභාසිත්ථාති.

ඡත්තදායකත්ථෙරස්සාපදානං තතියං.

4. සද්දසඤ්ඤකත්ථෙරඅපදානං

17. ‘‘අනුග්ගතම්හි ආදිච්චෙ, පනාදො [පසාදො (ස්‍යා. අට්ඨ.)] විපුලො අහු;

බුද්ධසෙට්ඨස්ස ලොකම්හි, පාතුභාවො මහෙසිනො.

18. ‘‘ඝොස [සද්ද (සී. ස්‍යා.)] මස්සොසහං තත්ථ, න ච පස්සාමි තං ජිනං;

මරණඤ්ච අනුප්පත්තො, බුද්ධසඤ්ඤමනුස්සරිං.

19. ‘‘චතුන්නවුතිතො කප්පෙ, යං සඤ්ඤමලභිං තදා;

දුග්ගතිං නාභිජානාමි, බුද්ධපූජායිදං ඵලං.

20. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සද්දසඤ්ඤකො ථෙරො ඉමා ගාථායො අභාසිත්ථාති.

සද්දසඤ්ඤකත්ථෙරස්සාපදානං චතුත්ථං.

5. ගොසීසනික්ඛෙපකත්ථෙරඅපදානං

21. ‘‘ආරාමද්වාරා නික්ඛම්ම, ගොසීසං සන්ථතං මයා;

අනුභොමි සකං කම්මං, පුබ්බකම්මස්සිදං ඵලං.

22. ‘‘ආජානියා වාතජවා, සින්ධවා සීඝවාහනා;

අනුභොමි සබ්බමෙතං, ගොසීසස්ස ඉදං ඵලං.

23. ‘‘අහො කාරං පරමකාරං, සුඛත්තෙ සුකතං මයා;

සඞ්ඝෙ කතස්ස කාරස්ස, න අඤ්ඤං කලමග්ඝති.

24. ‘‘චතුන්නවුතිතො කප්පෙ, යං සීසං සන්ථරිං අහං;

දුග්ගතිං නාභිජානාමි, සන්ථරස්ස ඉදං ඵලං.

25. ‘‘පඤ්චසත්තතිකප්පම්හි, සුප්පතිට්ඨිතනාමකො;

එකො ආසිං මහාතෙජො, චක්කවත්තී මහබ්බලො.

26. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ගොසීසනික්ඛෙපකො ථෙරො ඉමා ගාථායො අභාසිත්ථාති.

ගොසීසනික්ඛෙපකත්ථෙරස්සාපදානං පඤ්චමං.

6. පාදපූජකත්ථෙරඅපදානං

27. ‘‘පබ්බතෙ හිමවන්තම්හි, අහොසිං කින්නරො තදා;

අද්දසං විරජං බුද්ධං, පීතරංසිංව භාණුමං.

28. ‘‘උපෙතං තමහං [උපෙතොපි තදා (ස්‍යා.), උපෙසිං තමහං (?)] බුද්ධං, විපස්සිං ලොකනායකං;

චන්දනං තගරඤ්චාපි, පාදෙ ඔසිඤ්චහං තදා.

29. ‘‘එකනවුතිතො කප්පෙ, යං පාදං අභිපූජයිං;

දුග්ගතිං නාභිජානාමි, පාදපූජායිදං ඵලං.

30. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පාදපූජකො ථෙරො ඉමා ගාථායො අභාසිත්ථාති.

පාදපූජකත්ථෙරස්සාපදානං ඡට්ඨං.

7. දෙසකිත්තකත්ථෙරඅපදානං

31. ‘‘උපසාලකනාමොහං, අහොසිං බ්‍රාහ්මණො තදා;

කානනං වනමොගාළ්හං, ලොකජෙට්ඨං නරාසභං.

32. ‘‘දිස්වාන වන්දිං පාදෙසු, ලොකාහුතිපටිග්ගහං;

පසන්නචිත්තං මං ඤත්වා, බුද්ධො අන්තරධායථ.

33. ‘‘කානනා අභිනික්ඛම්ම, බුද්ධසෙට්ඨමනුස්සරිං;

තං දෙසං කිත්තයිත්වාන, කප්පං සග්ගම්හි මොදහං.

34. ‘‘ද්වෙනවුතෙ ඉතො කප්පෙ, යං දෙසමභිකිත්තයිං;

දුග්ගතිං නාභිජානාමි, කිත්තනාය ඉදං ඵලං.

35. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා දෙසකිත්තකො ථෙරො ඉමා ගාථායො අභාසිත්ථාති.

දෙසකිත්තකත්ථෙරස්සාපදානං සත්තමං.

8. සරණගමනියත්ථෙරඅපදානං

36. ‘‘පබ්බතෙ හිමවන්තම්හි, අහොසිං ලුද්දකො තදා;

විපස්සිං අද්දසං බුද්ධං, ලොකජෙට්ඨං නරාසභං.

37. ‘‘උපාසිත්වාන සම්බුද්ධං, වෙය්‍යාවච්චමකාසහං;

සරණඤ්ච උපාගච්ඡිං, ද්විපදින්දස්ස තාදිනො.

38. ‘‘එකනවුතිතො කප්පෙ, සරණං උපගච්ඡහං;

දුග්ගතිං නාභිජානාමි, සරණාගමනප්ඵලං.

39. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සරණගමනියො ථෙරො ඉමා ගාථායො අභාසිත්ථාති.

සරණගමනියත්ථෙරස්සාපදානං අට්ඨමං.

9. අම්බපිණ්ඩියත්ථෙරඅපදානං

40. ‘‘රොමසො නාම නාමෙන, දානවො ඉති විස්සුතො;

අම්බපිණ්ඩී මයා දින්නා [අම්බපිණ්ඩො මයා දින්නො (ස්‍යා.)], විපස්සිස්ස මහෙසිනො.

41. ‘‘එකනවුතිතො කප්පෙ, යමම්බමදදිං තදා;

දුග්ගතිං නාභිජානාමි, අම්බදානස්සිදං ඵලං.

42. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අම්බපිණ්ඩියො ථෙරො ඉමා ගාථායො අභාසිත්ථාති.

අම්බපිණ්ඩියත්ථෙරස්සාපදානං නවමං.

10. අනුසංසාවකත්ථෙරඅපදානං

43. ‘‘පිණ්ඩාය චරමානාහං, විපස්සිමද්දසං ජිනං;

උළුඞ්ගභික්ඛං පාදාසිං, ද්විපදින්දස්ස තාදිනො.

44. ‘‘පසන්නචිත්තො සුමනො, අභිවාදෙසහං තදා;

අනුසංසාවයිං බුද්ධං, උත්තමත්ථස්ස පත්තියා.

45. ‘‘එකනවුතිතො කප්පෙ, අනුසංසාවයිං අහං;

දුග්ගතිං නාභිජානාමි, අනුසංසාවනා ඵලං.

46. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අනුසංසාවකො ථෙරො ඉමා ගාථායො අභාසිත්ථාති.

අනුසංසාවකත්ථෙරස්සාපදානං දසමං.

චිතකපූජකවග්ගො තිංසතිමො.

තස්සුද්දානං –

චිතකං පාරිඡත්තො ච, සද්දගොසීසසන්ථරං;

පාදො පදෙසං සරණං, අම්බො සංසාවකොපි ච;

අට්ඨතාලීස ගාථායො, ගණිතායො විභාවිභි.

අථ වග්ගුද්දානං –

කණිකාරො හත්ථිදදො, ආලම්බණුදකාසනං;

තුවරං ථොමකො චෙව, උක්ඛෙපං සීසුපධානං.

පණ්ණදො චිතපූජී ච, ගාථායො චෙව සබ්බසො;

චත්තාරි ච සතානීහ, එකපඤ්ඤාසමෙව ච.

පඤ්චවීසසතා සබ්බා, ද්වාසත්තති තදුත්තරි;

තිසතං අපදානානං, ගණිතා අත්ථදස්සිභි.

කණිකාරවග්ගදසකං.