3. ඡත්තදායකත්ථෙරඅපදානං

11. ‘‘පුත්තො මම පබ්බජිතො, කාසායවසනො තදා;

සො ච බුද්ධත්තං සම්පත්තො, නිබ්බුතො ලොකපූජිතො.

12. ‘‘විචිනන්තො සකං පුත්තං, අගමං පච්ඡතො අහං;

නිබ්බුතස්ස මහන්තස්ස, චිතකං අගමාසහං.

13. ‘‘පග්ගය්හ අඤ්ජලිං තත්ථ, වන්දිත්වා චිතකං අහං;

සෙතච්ඡත්තඤ්ච පග්ගය්හ, ආරොපෙසිං අහං තදා.

14. ‘‘චතුන්නවුතිතො කප්පෙ, යං ඡත්තමභිරොපයිං;

දුග්ගතිං නාභිජානාමි, ඡත්තදානස්සිදං ඵලං.

15. ‘‘පඤ්චවීසෙ ඉතො කප්පෙ, සත්ත ආසුං ජනාධිපා;

මහාරහසනාමා තෙ, චක්කවත්තී මහබ්බලා.

16. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඡත්තදායකො ථෙරො ඉමා ගාථායො අභාසිත්ථාති.

ඡත්තදායකත්ථෙරස්සාපදානං තතියං.