7. පුලිනපූජකත්ථෙරඅපදානං

165. ‘‘විපස්සිස්ස භගවතො, බොධියා පාදපුත්තමෙ;

පුරාණපුලිනං හිත්වා [ඡඩ්ඩෙත්වා (සී. ස්‍යා.)], සුද්ධපුලිනමාකිරිං.

166. ‘‘එකනවුතිතො කප්පෙ, යං පුලිනමදාසහං;

දුග්ගතිං නාභිජානාමි, පුලිනදානස්සිදං ඵලං.

167. ‘‘තිංසතිමෙ [තිපඤ්ඤාසෙ (සී. ස්‍යා.)] ඉතො කප්පෙ, රාජා ආසිං ජනාධිභූ;

මහාපුලිනනාමෙන, චක්කවත්තී මහබ්බලො.

168. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පුලිනපූජකො ථෙරො ඉමා ගාථායො අභාසිත්ථාති.

පුලිනපූජකත්ථෙරස්සාපදානං සත්තමං.