5. අන්නසංසාවකත්ථෙරඅපදානං

155. ‘‘සුවණ්ණවණ්ණං සම්බුද්ධං, ගච්ඡන්තං අන්තරාපණෙ;

කඤ්චනග්ඝියසංකාසං, බාත්තිංසවරලක්ඛණං.

156. ‘‘සිද්ධත්ථං ලොකපජ්ජොතං, අප්පමෙය්‍යං අනොපමං;

අලත්ථං පරමං පීතිං, දිස්වා දන්තං ජුතින්ධරං.

157. ‘‘සම්බුද්ධං අභිනාමෙත්වා, භොජයිං තං මහාමුනිං;

මහාකාරුණිකො ලොකෙ [නාථො (සී.)], අනුමොදි මමං තදා.

158. ‘‘තස්මිං මහාකාරුණිකෙ, පරමස්සාසකාරකෙ;

බුද්ධෙ චිත්තං පසාදෙත්වා, කප්පං සග්ගම්හි මොදහං.

159. ‘‘චතුන්නවුතිතො කප්පෙ, යං දානමදදිං තදා;

දුග්ගතිං නාභිජානාමි, භික්ඛාදානස්සිදං ඵලං.

160. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා අන්නසංසාවකො ථෙරො ඉමා ගාථායො අභාසිත්ථාති.

අන්නසංසාවකත්ථෙරස්සාපදානං පඤ්චමං.