4. පඤ්චසීලසමාදානියත්ථෙරඅපදානං

134. ‘‘නගරෙ චන්දවතියා, භතකො ආසහං තදා;

පරකම්මායනෙ යුත්තො, පබ්බජ්ජං න ලභාමහං.

135. ‘‘මහන්ධකාරපිහිතා, තිවිධග්ගීහි ඩය්හරෙ;

කෙන නු ඛො උපායෙන, විසංයුත්තො භවෙ අහං.

136. ‘‘දෙය්‍යධම්මො ච මෙ නත්ථි, වරාකො භතකො අහං;

යංනූනාහං පඤ්චසීලං, රක්ඛෙය්‍යං පරිපූරයං.

137. ‘‘අනොමදස්සිස්ස මුනිනො, නිසභො නාම සාවකො;

තමහං උපසඞ්කම්ම, පඤ්චසික්ඛාපදග්ගහිං.

138. ‘‘වස්සසතසහස්සානි, ආයු විජ්ජති තාවදෙ;

තාවතා පඤ්චසීලානි, පරිපුණ්ණානි ගොපයිං.

139. ‘‘මච්චුකාලෙ ච සම්පත්තෙ, දෙවා අස්සාසයන්ති මං;

‘රථො සහස්සයුත්තො තෙ, මාරිසායං [මාරිසස්ස (ක.)] උපට්ඨිතො’.

140. ‘‘වත්තන්තෙ චරිමෙ චිත්තෙ, මම සීලං අනුස්සරිං;

තෙන කම්මෙන සුකතෙන, තාවතිංසං අගච්ඡහං.

141. ‘‘තිංසක්ඛත්තුඤ්ච දෙවින්දො, දෙවරජ්ජමකාරයිං;

දිබ්බසුඛං [දිබ්බං සුඛං (සී.)] අනුභවිං, අච්ඡරාහි පුරක්ඛතො.

142. ‘‘පඤ්චසත්තතික්ඛත්තුඤ්ච, චක්කවත්තී අහොසහං;

පදෙසරජ්ජං විපුලං, ගණනාතො අසඞ්ඛියං.

143. ‘‘දෙවලොකා චවිත්වාන, සුක්කමූලෙන චොදිතො;

පුරෙ වෙසාලියං ජාතො, මහාසාලෙ සුඅඩ්ඪකෙ.

144. ‘‘වස්සූපනායිකෙ කාලෙ, දිප්පන්තෙ [දිබ්බන්ති (ක.)] ජිනසාසනෙ;

මාතා ච මෙ පිතා චෙව, පඤ්චසික්ඛාපදග්ගහුං.

145. ‘‘සහ සුත්වානහං සීලං, මම සීලං අනුස්සරිං;

එකාසනෙ නිසීදිත්වා, අරහත්තමපාපුණිං.

146. ‘‘ජාතියා පඤ්චවස්සෙන, අරහත්තමපාපුණිං;

උපසම්පාදයි බුද්ධො, ගුණමඤ්ඤාය චක්ඛුමා.

147. ‘‘පරිපුණ්ණානි ගොපෙත්වා, පඤ්චසික්ඛාපදානහං;

අපරිමෙය්‍යෙ ඉතො කප්පෙ, විනිපාතං න ගච්ඡහං.

148. ‘‘ස්වාහං යසමනුභවිං, තෙසං සීලාන වාහසා;

කප්පකොටිම්පි කිත්තෙන්තො, කිත්තයෙ එකදෙසකං.

149. ‘‘පඤ්චසීලානි ගොපෙත්වා, තයො හෙතූ ලභාමහං;

දීඝායුකො මහාභොගො, තික්ඛපඤ්ඤො භවාමහං.

150. ‘‘සංකිත්තෙන්තො ච [පකිත්තෙන්තොව (සී.), පකිත්තෙන්තෙ ච (ස්‍යා.)] සබ්බෙසං, අභිමත්තඤ්ච පොරිසං;

භවාභවෙ සංසරිත්වා, එතෙ ඨානෙ ලභාමහං.

151. ‘‘අපරිමෙය්‍යසීලෙසු, වත්තන්තා ජිනසාවකා;

භවෙසු යදි රජ්ජෙය්‍යුං, විපාකො කීදිසො භවෙ.

152. ‘‘සුචිණ්ණං මෙ පඤ්චසීලං, භතකෙන තපස්සිනා [විපස්සිනා (සී.)];

තෙන සීලෙනහං අජ්ජ, මොචයිං සබ්බබන්ධනා.

153. ‘‘අපරිමෙය්‍යෙ ඉතො කප්පෙ, පඤ්චසීලානි ගොපයිං;

දුග්ගතිං නාභිජානාමි, පඤ්චසීලානිදං ඵලං.

154. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පඤ්චසීලසමාදානියො ථෙරො ඉමා ගාථායො අභාසිත්ථාති.

පඤ්චසීලසමාදානියත්ථෙරස්සාපදානං චතුත්ථං.