3. තිසරණගමනියත්ථෙරඅපදානං

106. ‘‘නගරෙ චන්දවතියා [බන්ධුමතියා (අට්ඨ.)], මාතුඋපට්ඨාකො [මාතුපට්ඨායකො (සී.), මාතුපට්ඨානකො (ස්‍යා.)] අහුං;

අන්ධා මාතා පිතා මය්හං, තෙ පොසෙමි අහං තදා.

107. ‘‘රහොගතො නිසීදිත්වා, එවං චින්තෙසහං තදා;

පොසෙන්තො මාතාපිතරො, පබ්බජ්ජං න ලභාමහං.

108. ‘‘මහන්ධකාරපිහිතා [තමන්ධකාරපිහිතා (ස්‍යා.)], තිවිධග්ගීහි ඩය්හරෙ;

එතාදිසෙ භවෙ [භයෙ (සී.)] ජාතෙ, නත්ථි කොචි විනායකො.

109. ‘‘බුද්ධො ලොකෙ සමුප්පන්නො, දිප්පති [දිබ්බති (ක.)] [ජිනසාසනං (සී.)] දානි සාසනං;

සක්කා උද්ධරිතුං අත්තා, පුඤ්ඤකාමෙන ජන්තුනා.

110. ‘‘උග්ගය්හ තීණි සරණෙ, පරිපුණ්ණානි ගොපයිං;

තෙන කම්මෙන සුකතෙන, පටිමොක්ඛාමි දුග්ගතිං.

111. ‘‘නිසභො නාම සමණො, බුද්ධස්ස අග්ගසාවකො;

තමහං උපගන්ත්වාන, සරණගමනං ගහිං.

112. ‘‘වස්සසතසහස්සානි, ආයු විජ්ජති තාවදෙ;

තාවතා සරණගමනං, පරිපුණ්ණං අගොපයිං.

113. ‘‘චරිමෙ වත්තමානම්හි, සරණං තං අනුස්සරිං;

තෙන කම්මෙන සුකතෙන, තාවතිංසං අගච්ඡහං.

114. ‘‘දෙවලොකගතො සන්තො, පුඤ්ඤකම්මසමාහිතො;

යං දෙසං [යං යං දෙසං (ස්‍යා.)] උපපජ්ජාමි [උපගච්ඡාමි (සී.)], අට්ඨ හෙතූ ලභාමහං.

115. ‘‘දිසාසු පූජිතො හොමි, තික්ඛපඤ්ඤො භවාමහං;

සබ්බෙ දෙවානුවත්තන්ති, අමිතභොගං ලභාමහං.

116. ‘‘සුවණ්ණවණ්ණො සබ්බත්ථ, පටිකන්තො භවාමහං;

මිත්තානං අචලො හොමි, යසො අබ්භුග්ගතො මමං.

117. ‘‘අසීතික්ඛත්තු දෙවින්දො, දෙවරජ්ජමකාරයිං;

දිබ්බසුඛං අනුභවිං, අච්ඡරාහි පුරක්ඛතො.

118. ‘‘පඤ්චසත්තතික්ඛත්තුඤ්ච, චක්කවත්තී අහොසහං;

පදෙසරජ්ජං විපුලං, ගණනාතො අසඞ්ඛියං.

119. ‘‘පච්ඡිමෙ භවෙ සම්පත්තෙ, පුඤ්ඤකම්මසමාහිතො;

පුරෙ සාවත්ථියං ජාතො, මහාසාලෙ සුඅඩ්ඪකෙ.

120. ‘‘නගරා නික්ඛමිත්වාන, දාරකෙහි පුරක්ඛතො;

හසඛිඩ්ඩසමඞ්ගීහං [සාහං ඛිඩ්ඩසමඞ්ගී (ස්‍යා.)], සඞ්ඝාරාමං උපාගමිං.

121. ‘‘තත්ථද්දසාසිං [තත්ථද්දසාහං (ක.)] සමණං, විප්පමුත්තං නිරූපධිං;

සො මෙ ධම්මමදෙසෙසි, සරණඤ්ච අදාසි මෙ.

122. ‘‘සොහං සුත්වාන සරණං, සරණං මෙ අනුස්සරිං;

එකාසනෙ නිසීදිත්වා, අරහත්තමපාපුණිං.

123. ‘‘ජාතියා සත්තමෙ වස්සෙ, අරහත්තමපාපුණිං;

උපසම්පාදයි බුද්ධො, ගුණමඤ්ඤාය චක්ඛුමා.

124. ‘‘අපරිමෙය්‍යෙ ඉතො කප්පෙ, සරණානි අගච්ඡහං;

තතො මෙ සුකතං කම්මං, ඵලං දස්සෙසි මෙ ඉධ.

125. ‘‘සුගොපිතං මෙ සරණං, මානසං සුප්පණීහිතං;

අනුභොත්වා යසං සබ්බං, පත්තොම්හි අචලං පදං.

126. ‘‘යෙසං සොතාවධානත්ථි, සුණොථ මම භාසතො;

අහං [අත්ථං (ස්‍යා.)] වො කථයිස්සාමි, සාමං දිට්ඨං පදං මම.

127. ‘‘‘බුද්ධො ලොකෙ සමුප්පන්නො, වත්තතෙ ජිනසාසනං;

අමතා වාදිතා භෙරී, සොකසල්ලවිනොදනා.

128. ‘‘‘යථාසකෙන ථාමෙන, පුඤ්ඤක්ඛෙත්තෙ අනුත්තරෙ;

අධිකාරං කරෙය්‍යාථ, පස්සයිස්සථ නිබ්බුතිං.

129. ‘‘‘පග්ගය්හ තීණි සරණෙ, පඤ්චසීලානි ගොපිය;

බුද්ධෙ චිත්තං පසාදෙත්වා, දුක්ඛස්සන්තං කරිස්සථ.

130. ‘‘‘සම්මා ධම්මං භාවෙත්වාන [මමොපමං කරිත්වාන (සී. ස්‍යා.)], සීලානි පරිගොපිය;

අචිරං අරහත්තං වො, සබ්බෙපි පාපුණිස්සථ.

131. ‘‘‘තෙවිජ්ජො ඉද්ධිපත්තොම්හි, චෙතොපරියකොවිදො;

සාවකො තෙ මහාවීර, සරණො [චරණෙ (සී. ස්‍යා.)] වන්දති සත්ථුනො’.

132. ‘‘අපරිමෙය්‍යෙ ඉතො කප්පෙ, සරණං බුද්ධස්ස ගච්ඡහං;

දුග්ගතිං නාභිජානාමි, සරණං ගමනෙ ඵලං.

133. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා තිසරණගමනියො ථෙරො ඉමා ගාථායො අභාසිත්ථාති.

තිසරණගමනියත්ථෙරස්සාපදානං තතියං.