2. උපවානත්ථෙරඅපදානං

52. ‘‘පදුමුත්තරො නාම ජිනො, සබ්බධම්මාන පාරගූ;

ජලිත්වා අග්ගික්ඛන්ධොව, සම්බුද්ධො පරිනිබ්බුතො.

53. ‘‘මහාජනා සමාගම්ම, පූජයිත්වා තථාගතං;

චිතං කත්වාන සුකතං, සරීරං අභිරොපයුං.

54. ‘‘සරීරකිච්චං කත්වාන, ධාතුං තත්ථ සමානයුං;

සදෙවමානුසා සබ්බෙ, බුද්ධථූපං අකංසු තෙ.

55. ‘‘පඨමා කඤ්චනමයා, දුතියාසි මණීමයා;

තතියා රූපියමයා, චතුත්ථී ඵලිකාමයා.

56. ‘‘තථා [තත්ථ (ස්‍යා. ක.)] පඤ්චමියා භූමි [නෙමි (සී.)], ලොහිතඞ්ගමයා අහු;

ඡට්ඨා මසාරගල්ලස්ස, සබ්බරතනමයූපරි.

57. ‘‘ජඞ්ඝා මණිමයා ආසි, වෙදිකා රතනමයා;

සබ්බසොණ්ණමයො ථූපො, උද්ධං යොජනමුග්ගතො.

58. ‘‘දෙවා තත්ථ සමාගන්ත්වා, එකතො මන්තයුං තදා;

මයම්පි ථූපං කස්සාම, ලොකනාථස්ස තාදිනො.

59. ‘‘ධාතු ආවෙණිකා නත්ථි, සරීරං එකපිණ්ඩිතං;

ඉමම්හි බුද්ධථූපම්හි, කස්සාම කඤ්චුකං මයං.

60. ‘‘දෙවා සත්තහි රත්නෙහි [සත්තරතනෙහි (සී.)], අඤ්ඤං වඩ්ඪෙසු යොජනං;

ථූපො ද්වියොජනුබ්බෙධො, තිමිරං බ්‍යපහන්ති සො.

61. ‘‘නාගා තත්ථ සමාගන්ත්වා, එකතො මන්තයුං තදා;

මනුස්සා චෙව දෙවා ච, බුද්ධථූපං අකංසු තෙ.

62. ‘‘මා නො පමත්තා අස්සුම්හ [අස්සුම්හා (සී. ස්‍යා.), ආසිම්හා (?)], අප්පමත්තා සදෙවකා;

මයම්පි ථූපං කස්සාම, ලොකනාථස්ස තාදිනො.

63. ‘‘ඉන්දනීලං මහානීලං, අථො ජොතිරසං මණිං;

එකතො සන්නිපාතෙත්වා, බුද්ධථූපං අඡාදයුං.

64. ‘‘සබ්බං මණිමයං ආසි, තාවතා බුද්ධචෙතියං;

තියොජනසමුබ්බිද්ධං [තීණි යොජනමුබ්බිද්ධං (සී. ක.)], ආලොකකරණං තදා.

65. ‘‘ගරුළා ච සමාගන්ත්වා, එකතො මන්තයුං තදා;

මනුස්සා දෙවා නාගා ච, බුද්ධථූපං අකංසු තෙ.

66. ‘‘‘මා නො පමත්තා අස්සුම්හ, අප්පමත්තා සදෙවකා;

මයම්පි ථූපං කස්සාම, ලොකනාථස්ස තාදිනො’.

67. ‘‘සබ්බං මණිමයං ථූපං, අකරුං තෙ ච කඤ්චුකං [සබ්බමණිමයං ථූපෙ, අකරුත්තරකඤ්චුකං (සී.)];

යොජනං තෙපි වඩ්ඪෙසුං, ආයතං බුද්ධචෙතියං.

68. ‘‘චතුයොජනමුබ්බිද්ධො, බුද්ධථූපො විරොචති;

ඔභාසෙති දිසා සබ්බා, සතරංසීව උග්ගතො.

69. ‘‘කුම්භණ්ඩා ච සමාගන්ත්වා, එකතො මන්තයුං තදා;

මනුස්සා චෙව දෙවා ච, නාගා ච ගරුළා තථා.

පච්චෙකං බුද්ධසෙට්ඨස්ස, අකංසු ථූපමුත්තමං.

70. ‘‘‘මා නො පමත්තා අස්සුම්හ, අප්පමත්තා සදෙවකා;

මයම්පි ථූපං කස්සාම, ලොකනාථස්ස තාදිනො;

රතනෙහි ඡාදෙස්සාම, ආයතං බුද්ධචෙතියං’.

71. ‘‘යොජනං තෙපි වඩ්ඪෙසුං, ආයතං බුද්ධචෙතියං;

පඤ්චයොජනමුබ්බිද්ධො, ථූපො ඔභාසතෙ තදා.

72. ‘‘යක්ඛා තත්ථ සමාගන්ත්වා, එකතො මන්තයුං තදා;

මනුස්සා දෙවා නාගා ච, ගරුළා කුම්භඅණ්ඩකා.

73. ‘‘පච්චෙකං බුද්ධසෙට්ඨස්ස, අකංසු ථූපමුත්තමං;

‘මා නො පමත්තා අස්සුම්හ, අප්පමත්තා සදෙවකා.

74. ‘‘‘මයම්පි ථූපං කස්සාම, ලොකනාථස්ස තාදිනො;

ඵලිකාහි ඡාදෙස්සාම, ආයතං බුද්ධචෙතියං’.

75. ‘‘යොජනං තෙපි වඩ්ඪෙසුං, ආයතං බුද්ධචෙතියං;

ඡ යොජනානි උබ්බිද්ධො, ථූපො ඔභාසතෙ තදා.

76. ‘‘ගන්ධබ්බා ච සමාගන්ත්වා, එකතො මන්තයුං තදා;

‘මනුජා දෙවතා නාගා, ගරුළා කුම්භයක්ඛකා.

77. ‘‘‘සබ්බෙකංසු බුද්ධථූපං, මයමෙත්ථ අකාරකා;

මයම්පි ථූපං කස්සාම, ලොකනාථස්ස තාදිනො’.

78. ‘‘වෙදියො සත්ත කත්වාන, ඡත්තමාරොපයිංසු තෙ;

සබ්බසොණ්ණමයං ථූපං, ගන්ධබ්බා කාරයුං තදා.

79. ‘‘සත්තයොජනමුබ්බිද්ධො, ථූපො ඔභාසතෙ තදා;

රත්තින්දිවා න ඤායන්ති, ආලොකො හොති [ආලොකා හොන්ති (ස්‍යා. ක.)] සබ්බදා.

80. ‘‘අභිභොන්ති න තස්සාභා, චන්දසූරා සතාරකා;

සමන්තා යොජනසතෙ, පදීපොපි න පජ්ජලි.

81. ‘‘තෙන කාලෙන යෙ කෙචි, ථූපං පූජෙන්ති මානුසා;

න තෙ ථූපමාරුහන්ති, අම්බරෙ උක්ඛිපන්ති තෙ.

82. ‘‘දෙවෙහි ඨපිතො යක්ඛො, අභිසම්මතනාමකො;

ධජං වා පුප්ඵදාමං වා, අභිරොපෙති උත්තරි.

83. ‘‘න තෙ පස්සන්ති තං යක්ඛං, දාමං පස්සන්ති ගච්ඡතො;

එවං පස්සිත්වා ගච්ඡන්තා, සබ්බෙ ගච්ඡන්ති සුග්ගතිං.

84. ‘‘විරුද්ධා [විසද්ධා (සී.)] යෙ පාවචනෙ, පසන්නා යෙ ච සාසනෙ;

පාටිහෙරං දට්ඨුකාමා, ථූපං පූජෙන්ති මානුසා.

85. ‘‘නගරෙ හංසවතියා, අහොසිං භතකො [වරකො (ස්‍යා. ක.)] තදා;

ආමොදිතං ජනං දිස්වා, එවං චින්තෙසහං තදා.

86. ‘‘‘උළාරො භගවා හෙසො, යස්ස ධාතුධරෙදිසං;

ඉමා ච ජනතා තුට්ඨා, කාරං කුබ්බං න තප්පරෙ [කුබ්බන්තනප්පකං (සී.)].

87. ‘‘‘අහම්පි කාරං කස්සාමි, ලොකනාථස්ස තාදිනො;

තස්ස ධම්මෙසු දායාදො, භවිස්සාමි අනාගතෙ’.

88. ‘‘සුධොතං රජකෙනාහං, උත්තරෙය්‍යපටං මම;

වෙළග්ගෙ ආලගෙත්වාන, ධජං උක්ඛිපිමම්බරෙ.

89. ‘‘අභිසම්මතකො ගය්හ, අම්බරෙහාසි මෙ ධජං;

වාතෙරිතං ධජං දිස්වා, භිය්‍යො හාසං ජනෙසහං.

90. ‘‘තත්ථ චිත්තං පසාදෙත්වා, සමණං උපසඞ්කමිං;

තං භික්ඛුං අභිවාදෙත්වා, විපාකං පුච්ඡහං ධජෙ.

91. ‘‘සො මෙ කථෙසි ආනන්ද, පීතිසඤ්ජනනං මම;

‘තස්ස ධජස්ස විපාකං, අනුභොස්සසි සබ්බදා.

92. ‘‘‘හත්ථී අස්සා රථා පත්තී, සෙනා ච චතුරඞ්ගිනී;

පරිවාරෙස්සන්ති තං නිච්චං, ධජදානස්සිදං ඵලං.

93. ‘‘‘සට්ඨිතූරියසහස්සානි, භෙරියො සමලඞ්කතා;

පරිවාරෙස්සන්ති තං නිච්චං, ධජදානස්සිදං ඵලං.

94. ‘‘‘ඡළාසීතිසහස්සානි, නාරියො සමලඞ්කතා;

විචිත්තවත්ථාභරණා, ආමුත්තමණිකුණ්ඩලා.

95. ‘‘‘අළාරපම්හා හසුලා, සුසඤ්ඤා තනුමජ්ඣිමා;

පරිවාරෙස්සන්ති තං නිච්චං, ධජදානස්සිදං ඵලං.

96. ‘‘‘තිංසකප්පසහස්සානි, දෙවලොකෙ රමිස්සසි;

අසීතික්ඛත්තුං දෙවින්දො, දෙවරජ්ජං කරිස්සසි.

97. ‘‘‘සහස්සක්ඛත්තුං රාජා ච, චක්කවත්තී භවිස්සසි;

පදෙසරජ්ජං විපුලං, ගණනාතො අසඞ්ඛියං.

98. ‘‘‘කප්පසතසහස්සම්හි, ඔක්කාකකුලසම්භවො;

ගොතමො නාම ගොත්තෙන, සත්ථා ලොකෙ භවිස්සති.

99. ‘‘‘දෙවලොකා චවිත්වාන, සුක්කමූලෙන චොදිතො;

පුඤ්ඤකම්මෙන සංයුත්තො, බ්‍රහ්මබන්ධු භවිස්සසි.

100. ‘‘‘අසීතිකොටිං ඡඩ්ඩෙත්වා, දාසෙ කම්මකරෙ බහූ;

ගොතමස්ස භගවතො, සාසනෙ පබ්බජිස්සසි.

101. ‘‘‘ආරාධයිත්වා සම්බුද්ධං, ගොතමං සක්‍යපුඞ්ගවං;

උපවානොති නාමෙන, හෙස්සසි සත්ථු සාවකො’.

102. ‘‘සතසහස්සෙ කතං කම්මං, ඵලං දස්සෙසි මෙ ඉධ;

සුමුත්තො සරවෙගොව කිලෙසෙ ඣාපයී මම.

103. ‘‘චක්කවත්තිස්ස සන්තස්ස, චතුදීපිස්සරස්ස මෙ;

තියොජනානි සමන්තා, උස්සීසන්ති ධජා සදා.

104. ‘‘සතසහස්සිතො කප්පෙ, යං කම්මමකරිං තදා;

දුග්ගතිං නාභිජානාමි, ධජදානස්සිදං ඵලං.

105. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා උපවානො ථෙරො ඉමා ගාථායො අභාසිත්ථාති.

උපවානත්ථෙරස්සාපදානං දුතියං.