10. පුබ්බඞ්ගමියත්ථෙරඅපදානං

43. ‘‘චුල්ලාසීතිසහස්සානි, පබ්බජිම්හ අකිඤ්චනා;

තෙසං පුබ්බඞ්ගමො ආසිං, උත්තමත්ථස්ස පත්තියා.

44. ‘‘සරාගා සභවා [සමොහා (ස්‍යා.)] චෙතෙ, විප්පසන්නමනාවිලා;

උපට්ඨහිංසු සක්කච්චං, පසන්නා සෙහි පාණිභි.

45. ‘‘ඛීණාසවා වන්තදොසා, කතකිච්චා අනාසවා;

ඵරිංසු මෙත්තචිත්තෙන, සයම්භූ අපරාජිතා.

46. ‘‘තෙසං උපට්ඨහිත්වාන, සම්බුද්ධානං පතිස්සතො;

මරණඤ්ච අනුප්පත්තො, දෙවත්තඤ්ච අගම්හසෙ.

47. ‘‘චතුන්නවුතිතො කප්පෙ, යං සීලමනුපාලයිං;

දුග්ගතිං නාභිජානාමි, සඤ්ඤමස්ස ඉදං ඵලං.

48. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පුබ්බඞ්ගමියො ථෙරො ඉමා ගාථායො අභාසිත්ථාති.

පුබ්බඞ්ගමියත්ථෙරස්සාපදානං දසමං.

පණ්ණදායකවග්ගො එකූනතිංසතිමො.