29. පණ්ණදායකවග්ගො

1. පණ්ණදායකත්ථෙරඅපදානං

1. ‘‘පණ්ණසාලෙ නිසින්නොම්හි, පණ්ණභොජනභොජනො;

උපවිට්ඨඤ්ච මං සන්තං, උපාගච්ඡි මහාඉසි [මහාමුනි (සී.)].

2. ‘‘සිද්ධත්ථො ලොකපජ්ජොතො, සබ්බලොකතිකිච්ඡකො;

තස්ස පණ්ණං මයා දින්නං, නිසින්නං [නිසින්නස්ස (ස්‍යා. අට්ඨ.)] පණ්ණසන්ථරෙ.

3. ‘‘චතුන්නවුතිතො කප්පෙ, යං පණ්ණමදදිං තදා;

දුග්ගතිං නාභිජානාමි, පණ්ණදානස්සිදං ඵලං.

4. ‘‘පටිසම්භිදා චතස්සො, විමොක්ඛාපි ච අට්ඨිමෙ;

ඡළභිඤ්ඤා සච්ඡිකතා, කතං බුද්ධස්ස සාසනං’’.

ඉත්ථං සුදං ආයස්මා පණ්ණදායකො ථෙරො ඉමා ගාථායො අභාසිත්ථාති.

පණ්ණදායකත්ථෙරස්සාපදානං පඨමං.

2. ඵලදායකත්ථෙරඅපදානං

5. ‘‘සිනෙරුසමසන්තොසො, ධරණීසම [ධරණීධර (සී. ස්‍යා.)] සාදිසො;

වුට්ඨහිත්වා සමාධිම්හා, භික්ඛාය මමුපට්ඨිතො.

6. ‘‘හරීතකං [හරීතකිං (ස්‍යා.)] ආමලකං, අම්බජම්බුවිභීතකං;

කොලං භල්ලාතකං බිල්ලං, ඵාරුසකඵලානි ච.

7. ‘‘සිද්ධත්ථස්ස මහෙසිස්ස, සබ්බලොකානුකම්පිනො;

තඤ්ච සබ්බං මයා දින්නං, විප්පසන්නෙන චෙතසා.

8. ‘‘චතුන්නවුතිතො කප්පෙ, යං ඵලං අදදිං තදා;

දුග්ගතිං නාභිජානාමි, ඵලදානස්සිදං ඵලං.

9. ‘‘සත්තපඤ්ඤාසිතො කප්පෙ, එකජ්ඣො නාම ඛත්තියො;

සත්තරතනසම්පන්නො, චක්කවත්තී මහබ්බලො.

10. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඵලදායකො ථෙරො ඉමා ගාථායො අභාසිත්ථාති.

ඵලදායකත්ථෙරස්සාපදානං දුතියං.

3. පච්චුග්ගමනියත්ථෙරඅපදානං

11. ‘‘සීහං යථා වනචරං, නිසභාජානියං යථා;

කකුධං විලසන්තංව, ආගච්ඡන්තං නරාසභං.

12. ‘‘සිද්ධත්ථං ලොකපජ්ජොතං, සබ්බලොකතිකිච්ඡකං;

අකාසිං පච්චුග්ගමනං, විප්පසන්නෙන චෙතසා.

13. ‘‘චතුන්නවුතිතො කප්පෙ, පච්චුග්ගච්ඡිං නරාසභං;

දුග්ගතිං නාභිජානාමි, පච්චුග්ගමනෙ ඉදං ඵලං.

14. ‘‘සත්තතිංසෙ [සත්තවීසෙ (සී. ස්‍යා.)] ඉතො කප්පෙ, එකො ආසිං ජනාධිපො;

සපරිවාරොති නාමෙන, චක්කවත්තී මහබ්බලො.

15. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පච්චුග්ගමනියො ථෙරො ඉමා ගාථායො අභාසිත්ථාති.

පච්චුග්ගමනියත්ථෙරස්සාපදානං තතියං.

4. එකපුප්ඵියත්ථෙරඅපදානං

16. ‘‘දක්ඛිණම්හි දුවාරම්හි, පිසාචො ආසහං තදා;

අද්දසං විරජං බුද්ධං, පීතරංසිංව භාණුමං.

17. ‘‘විපස්සිස්ස නරග්ගස්ස, සබ්බලොකහිතෙසිනො;

එකපුප්ඵං මයා දින්නං, ද්විපදින්දස්ස තාදිනො.

18. ‘‘එකනවුතිතො කප්පෙ, යං පුප්ඵමදදිං තදා;

දුග්ගතිං නාභිජානාමි, බුද්ධපූජායිදං ඵලං.

19. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකපුප්ඵියො ථෙරො ඉමා ගාථායො අභාසිත්ථාති.

එකපුප්ඵියත්ථෙරස්සාපදානං චතුත්ථං.

5. මඝවපුප්ඵියත්ථෙරඅපදානං

20. ‘‘නම්මදානදියා තීරෙ, සයම්භූ අපරාජිතො;

සමාධිං සො සමාපන්නො, විප්පසන්නො අනාවිලො.

21. ‘‘දිස්වා පසන්නසුමනො, සම්බුද්ධං අපරාජිතං;

තාහං මඝවපුප්ඵෙන, සයම්භුං පූජයිං තදා.

22. ‘‘එකනවුතිතො කප්පෙ, යං පුප්ඵමභිපූජයිං;

දුග්ගතිං නාභිජානාමි, බුද්ධපූජායිදං ඵලං.

23. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා මඝවපුප්ඵියො ථෙරො ඉමා ගාථායො අභාසිත්ථාති.

මඝවපුප්ඵියත්ථෙරස්සාපදානං පඤ්චමං.

6. උපට්ඨාකදායකත්ථෙරඅපදානං

24. ‘‘රථියං පටිපජ්ජන්තං, ආහුතීනං පටිග්ගහං;

ද්විපදින්දං මහානාගං, ලොකජෙට්ඨං නරාසභං.

25. ‘‘පක්කොසාපිය තස්සාහං, සබ්බලොකහිතෙසිනො;

උපට්ඨාකො මයා දින්නො, සිද්ධත්ථස්ස මහෙසිනො.

26. ‘‘පටිග්ගහෙත්වා [පටිග්ගහෙසි (ක.)] සම්බුද්ධො, නිය්‍යාදෙසි මහාමුනි [මහාඉසි (ක.)];

උට්ඨාය ආසනා තම්හා, පක්කාමි පාචිනාමුඛො.

27. ‘‘චතුන්නවුතිතො කප්පෙ, උපට්ඨාකමදං තදා;

දුග්ගතිං නාභිජානාමි, උපට්ඨානස්සිදං ඵලං.

28. ‘‘සත්තපඤ්ඤාසිතො කප්පෙ, බලසෙනසනාමකො;

සත්තරතනසම්පන්නො, චක්කවත්තී මහබ්බලො.

29. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා උපට්ඨාකදායකො ථෙරො ඉමා ගාථායො අභාසිත්ථාති.

උපට්ඨාකදායකත්ථෙරස්සාපදානං ඡට්ඨං.

7. අපදානියත්ථෙරඅපදානං

30. ‘‘අපදානං සුගතානං, කිත්තයිංහං මහෙසිනං;

පාදෙ ච සිරසා වන්දිං, පසන්නො සෙහි පාණිභි.

31. ‘‘ද්වෙනවුතෙ ඉතො කප්පෙ, අපදානං පකිත්තයිං;

දුග්ගතිං නාභිජානාමි, කිත්තනාය ඉදං ඵලං.

32. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා අපදානියො ථෙරො ඉමා ගාථායො අභාසිත්ථාති.

අපදානියත්ථෙරස්සාපදානං සත්තමං.

8. සත්තාහපබ්බජිතත්ථෙරඅපදානං

33. ‘‘විපස්සිස්ස භගවතො, සඞ්ඝො සක්කතමානිතො;

බ්‍යසනං මෙ අනුප්පත්තං, ඤාතිභෙදො පුරෙ අහු.

34. ‘‘පබ්බජ්ජං උපගන්ත්වාන, බ්‍යසනුපසමායහං;

සත්තාහාභිරතො තත්ථ, සත්ථුසාසනකම්‍යතා.

35. ‘‘එකනවුතිතො කප්පෙ, යමහං පබ්බජිං තදා;

දුග්ගතිං නාභිජානාමි, පබ්බජ්ජාය ඉදං ඵලං.

36. ‘‘සත්තසට්ඨිම්හිතො කප්පෙ, සත්ත ආසුං මහීපතී;

සුනික්ඛමාති ඤායන්ති, චක්කවත්තී මහබ්බලා.

37. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සත්තාහපබ්බජිතො ථෙරො ඉමා ගාථායො අභාසිත්ථාති.

සත්තාහපබ්බජිතත්ථෙරස්සාපදානං අට්ඨමං.

9. බුද්ධුපට්ඨායිකත්ථෙරඅපදානං

38. ‘‘වෙටම්භිනීති [වෙටම්බරීති (සී.), වෙධම්භිනීති (ස්‍යා.)] මෙ නාමං, පිතුසන්තං [පිතා’සන්තං (?)] මමං තදා;

මම හත්ථං ගහෙත්වාන, උපානයි මහාමුනිං.

39. ‘‘ඉමෙමං උද්දිසිස්සන්ති, බුද්ධා ලොකග්ගනායකා;

තෙහං උපට්ඨිං සක්කච්චං, පසන්නො සෙහි පාණිභි.

40. ‘‘එකත්තිංසෙ ඉතො කප්පෙ, බුද්ධෙ උපට්ඨහිං [පරිචරිං (සී. ස්‍යා.)] තදා;

දුග්ගතිං නාභිජානාමි, උපට්ඨානස්සිදං ඵලං.

41. ‘‘තෙවීසම්හි ඉතො කප්පෙ, චතුරො ආසු ඛත්තියා;

සමණුපට්ඨාකා නාම, චක්කවත්තී මහබ්බලා.

42. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා බුද්ධුපට්ඨායිකො ථෙරො ඉමා ගාථායො අභාසිත්ථාති.

බුද්ධුපට්ඨායිකත්ථෙරස්සාපදානං නවමං.

10. පුබ්බඞ්ගමියත්ථෙරඅපදානං

43. ‘‘චුල්ලාසීතිසහස්සානි, පබ්බජිම්හ අකිඤ්චනා;

තෙසං පුබ්බඞ්ගමො ආසිං, උත්තමත්ථස්ස පත්තියා.

44. ‘‘සරාගා සභවා [සමොහා (ස්‍යා.)] චෙතෙ, විප්පසන්නමනාවිලා;

උපට්ඨහිංසු සක්කච්චං, පසන්නා සෙහි පාණිභි.

45. ‘‘ඛීණාසවා වන්තදොසා, කතකිච්චා අනාසවා;

ඵරිංසු මෙත්තචිත්තෙන, සයම්භූ අපරාජිතා.

46. ‘‘තෙසං උපට්ඨහිත්වාන, සම්බුද්ධානං පතිස්සතො;

මරණඤ්ච අනුප්පත්තො, දෙවත්තඤ්ච අගම්හසෙ.

47. ‘‘චතුන්නවුතිතො කප්පෙ, යං සීලමනුපාලයිං;

දුග්ගතිං නාභිජානාමි, සඤ්ඤමස්ස ඉදං ඵලං.

48. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා පුබ්බඞ්ගමියො ථෙරො ඉමා ගාථායො අභාසිත්ථාති.

පුබ්බඞ්ගමියත්ථෙරස්සාපදානං දසමං.

පණ්ණදායකවග්ගො එකූනතිංසතිමො.