4. එකසඤ්ඤකත්ථෙරඅපදානං

17. ‘‘දුමග්ගෙ පංසුකූලිකං [පංසුකූලකං (?)], ලග්ගං දිස්වාන සත්ථුනො;

අඤ්ජලිං පග්ගහෙත්වාන, පංසුකූලං අවන්දහං.

18. ‘‘එකත්තිංසෙ ඉතො කප්පෙ, යං සඤ්ඤමලභිං තදා;

දුග්ගතිං නාභිජානාමි, බුද්ධපූජායිදං ඵලං.

19. ‘‘පඤ්චවීසෙ ඉතො කප්පෙ, එකො ආසිං ජනාධිපො;

අමිතාභොති නාමෙන, චක්කවත්තී මහබ්බලො.

20. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා එකසඤ්ඤකො ථෙරො ඉමා ගාථායො අභාසිත්ථාති.

එකසඤ්ඤකත්ථෙරස්සාපදානං චතුත්ථං.