3. සච්චසඤ්ඤකත්ථෙරඅපදානං

11. ‘‘වෙස්සභූ තම්හි සමයෙ, භික්ඛුසඞ්ඝපුරක්ඛතො;

දෙසෙති අරියසච්චානි, නිබ්බාපෙන්තො මහාජනං.

12. ‘‘පරමකාරුඤ්ඤපත්තොම්හි, සමිතිං අගමාසහං;

සොහං නිසින්නකො සන්තො, ධම්මමස්සොසි සත්ථුනො.

13. ‘‘තස්සාහං ධම්මං සුත්වාන, දෙවලොකං අගච්ඡහං;

තිංසකප්පානි දෙවෙසු, අවසිං තත්ථහං පුරෙ.

14. ‘‘එකත්තිංසෙ ඉතො කප්පෙ, යං සඤ්ඤමලභිං තදා;

දුග්ගතිං නාභිජානාමි, සච්චසඤ්ඤායිදං ඵලං.

15. ‘‘ඡබ්බීසම්හි ඉතො කප්පෙ, එකො ආසිං ජනාධිපො;

එකඵුසිතනාමෙන, චක්කවත්තී මහබ්බලො.

16. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා සච්චසඤ්ඤකො ථෙරො ඉමා ගාථායො අභාසිත්ථාති.

සච්චසඤ්ඤකත්ථෙරස්සාපදානං තතියං.