4. තරණියත්ථෙරඅපදානං

15. ‘‘අත්ථදස්සී තු භගවා, ද්විපදින්දො නරාසභො;

පුරක්ඛතො සාවකෙහි, ගඞ්ගාතීරමුපාගමි.

16. ‘‘සමතිත්ති කාකපෙය්‍යා, ගඞ්ගා ආසි දුරුත්තරා;

උත්තාරයිං භික්ඛුසඞ්ඝං, බුද්ධඤ්ච ද්විපදුත්තමං.

17. ‘‘අට්ඨාරසෙ කප්පසතෙ, යං කම්මමකරිං තදා;

දුග්ගතිං නාභිජානාමි, තරණාය ඉදං ඵලං.

18. ‘‘තෙරසෙතො කප්පසතෙ, පඤ්ච සබ්බොභවා [සබ්භොගවා (සී.)] අහුං;

සත්තරතනසම්පන්නා, චක්කවත්තී මහබ්බලා.

19. ‘‘පච්ඡිමෙ ච භවෙ අස්මිං, ජාතොහං බ්‍රාහ්මණෙ කුලෙ;

සද්ධිං තීහි සහායෙහි, පබ්බජිං සත්ථු සාසනෙ.

20. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා තරණියො ථෙරො ඉමා ගාථායො අභාසිත්ථාති;

තරණියත්ථෙරස්සාපදානං චතුත්ථං.